Read tsonga Matewu 4 Bible Online

Matewu 4 - tsonga bible

Matewu 4

¹Kutani Yesu a yisiwa hi Moya emananga ku ya ringiwa hi Diyavulosi.

²Kutani a tshama a nga dyi nchumu hi masiku ya mune wa makume, ni vusiku bya mune wa makume, a kondza a twa ndlala.

³Kutani muringi a n'wi tshinelela, a ku: “Loko u ri n'wana wa Xikwembu u nge maribye lawa, a ma hundzuke vuswa.”

⁴Kambe Yesu a hlamula, a ku: “Ku tsariwile va ku: ‘Munhu a nga ka a nga hanyi hi vuswa ntsena, kambe u ta hanya hi marito hinkwawo lama humaka enon'wini wa Xikwembu.’ ”

⁵Kutani Diyavulosi a n'wi yisa emutini lowu hlawuriweke, a n'wi veka exihlungweni xa tempele,

⁶a ku eka yena: “Loko u ri n'wana wa Xikwembu, jitama ehansi, hikuva ku tsariwile va ku: ‘Xi ta lerisa tintsumi ta xona, ti ta ku khawulela emavokweni ya tona leswaku nenge wa wena wu nga tshuki wu khunguvanyeka hi ribye.’ ”

⁷Yesu a ku eka yena: “Ku tsariwile kambe va ku: ‘U nga tshuki u ringa Hosi, Xikwembu xa wena.’ ”

⁸Diyavulosi a engeta a n'wi yisa entshaveni leyo leha ngopfu, a n'wi komba mimfumo hinkwayo ya misava ni ku twala ka yona,

⁹kutani a ku eka yena: “Swilo leswo hinkwaswo ndzi ta ku nyika swona, loko u ndzi khinsamela hi matsolo, u ndzi gandzela.”

¹⁰Kambe Yesu a ku eka yena: “Suka Satana hikuva ku tsariwile va ku: ‘U ta khinsamela Hosi, Xikwembu xa wena u tirhela xona ntsena.’ ”

¹¹Kwalaho Diyavulosi a n'wi tshika; kutani vonani, tintsumi ti n'wi tshinelela, ti n'wi tirhela.

¹²Kuteloko Yesu a tiva leswaku Yohane u nghenisiwile ekhotsweni, a tlhelela eGaleliya.

¹³Kutani a rhurha eNazareta, a ya tshama eKapernawume emutini lowu nga ekusuhi ni lwandle, hitlhelo ra Zebuloni ni ra Neftali;

¹⁴leswaku ku endleka leswi nga vula hi Esaya, muprofeta, loko a te:

¹⁵“Tiko ra Zebuloni, ni tiko ra Neftali, endleleni ya lwandle, entsungeni wa hase wa Yordani, Galeliya ya matiko.

¹⁶Tiko leri ngi ri tshame emunyameni, ri vonile ku vonakala lokukulu; volavo ingi va tshamile etikweni ra rifu ni le ndzhutini wa rona, ku vonakala ku va humelele.”

¹⁷Enkarhini wolowo, Yesu a sungula ku dyondzisa, a ku: “Hundzukani, hikuva ku fuma ka matilo ku kusuhi.”

¹⁸Kutani Yesu loko a lulama ni lwandle ra Galeliya, a vona vavanuna vambirhi, a a ri Simoni la vuriwaka Petro, na Andriya makwavo, va peta tinkoka ta vona elwandle, hikuva a va ri vaphasi va tinhlampfi.

¹⁹Kutani a ku eka vona: “Ndzi landzeni, ndzi ta mi endla lava phasaka vanhu.”

²⁰Kwalaho va hatlisa, va siya tinkoka ta vona, va n'wi landza.

²¹Kutani a hundzela emahlweni, a vona vavanuna vambirhi van'wana, a a ri Yakobo n'wana Zebediya na Yohane makwavo, va tshamile ebyatsweni na Zebediya tata wa vona, va tlhaviketela tinkoka ta vona, kutani a va vita.

²²Volavo va hatlisa, va siya byatso ni tata wa vona, va landza Yesu.

²³Kutani a famba hinkwako eGaleliya, a ri karhi a dyondzisa emasinagogeni ya kona, a vula Evhangeli ya ku fuma, a hanyisa vuvabyi byihi ni byihi, ni ku vaviseka hinkwako loku nga eka vanhu.

²⁴Kutani ku twakala ka yena ku hangalaka eSiriya hinkwako. Va tisa eka yena hinkwavo lava nga tsakangiki, ni lava xanisekaka hi vuvabyi bya tinxakaxaka ni nhlomulo, ni lava ngi va ri ni rihuhu ra mademona, ni lava ngi va ri ni rihuhu ra n'weti, ni lava omeke swirho; yena a va hanyisa.

²⁵Kutani mitshungu leyikulu yi n'wi landza, yi huma eGaleliya, na Dekapolisi, na Yerusalema, na Yudiya, ni le ntsungeni wa hase wa Yordani.