Read tsonga Matewu 6 Bible Online

Matewu 6 - tsonga bible

Matewu 6

¹“Tilanguteleni leswaku mi nga tshuki mi nyika swa n'wina eka swisiwana emahlweni ka vanhu, leswaku mi ta voniwa hi vona; loko mi endlisa sweswo, mi nga ka mi nga kumi hakelo eka Tata wa n'wina la nga ematilweni.

²Hikwalaho, loko u nyika swisiwana, u nga tshuki u yimba nanga emahlweni ka wena, u kotisa leswi vamandzendze va swi endlaka emasinagogeni, ni le mitsendzeleni, leswaku va ta dzunisiwa hi vanhu. Kunene ndza mi byela leswaku va kumile hakelo ya vona.

³Kambe wena loko u nyika xisiwana, voko ra wena ra ximatsi ri nga tshuki ri tiva leswi endliwaka hi lera xinene,

⁴leswaku ku nyika ka wena ku va exihundleni; kutani Tata wa wena la vonaka exihundleni, u ta ku tlherisela emahlweni ka vanhu.

⁵“Kutani loko mi khongela, mi nga tshuki mi kotisa vamandzendze lava rhandzaka ku khongela va yimile emasinagogeni ni le mahlanganeni ya mitsendzele, leswaku va ta voniwa hi vanhu. Kunene ndza mi byela leswaku va kumile hakelo ya vona.

⁶Kambe wena, loko u khongela, nghena endlwini ya wena, kutakuloko u pfarile nyangwa, khongela Tata wa wena la nga exihundleni, kutani Tata wa wena la vonaka exihundleni u ta ku tlherisela erivaleni.

⁷“Loko mi khongela, mi nga tshuki mi bokoxela kukota vamatiko, hikuva va anakanya leswaku va ta yingisiwa hi ku vulavula ngopfu.

⁸Mi nga tshuki mi fana na vona, hikuva Tata wa n'wina u tiva lexi ma xi pfumalaka, mi nga si kombela eka yena.

⁹“N'wina khongerisani xisweswo: ‘Tata wa hina la nga ematilweni, vito ra wena a ri hlawuriwe,

¹⁰a ku te ku fuma ka wena; ku rhandza ka wena a ku endliwe emisaveni swa nga hi le tilweni.

¹¹U hi ha namuntlha vuswa bya hina bya siku rin'wana ni rin'wana.

¹²Hi rivalele milandzu ya hina, tanihi loko na hina hi rivalela van'wana lava nga ni milandzu eka hina.

¹³U nga hi yisi emiringweni, kambe u hi lwela eka lowo biha.’

¹⁴Hikuva kungakuloko mi rivalela vanhu ku dyoha ka vona, Tata wa n'wina la nga ematilweni, u ta mi rivalela, na n'wina;

¹⁵kambe loko mi nga rivaleli vanhu ku dyoha ka vona, Tata wa n'wina, na yena, a nga ka a nga mi rivaleri ku dyoha ka n'wina.

¹⁶“Kutani loko mi titsona swakudya, mi nga tshuki mi fana ni vamandzendze lava khwanyalaka mimombo; hikuva va tionha nghohe va ku va ta voniwa hi vanhu leswaku va titsonile swakudya. Kunene ndza mi byela leswaku va kumile hakelo ya vona.

¹⁷“Wena loko u titsona swakudya, u titota nhloko, u hlamba emahlweni,

¹⁸u nga ti vonaka eka vanhu leswaku u titsona swakudya, kambe a swi tiviwe hi tata wa wena la nga exihundleni, kutani tata wa wena la vonaka exihundleni, u ta ku tlherisela emahlweni ka vanhu.

¹⁹“Mi nga tshuki mi tihlengeletela xuma emisaveni, laha tinsumba ni ku kurha swi dyaka kona, ni laha makhamba ma boxaka kona ma yiva.

²⁰Kambe tihlengeleteleni xuma etilweni, laha tinsumba ni ku kurha swi nga dyiki kona, ni laha makhamba ma nga boxiki kona, ma nga yivi;

²¹hikuva laha xuma xa n'wina xi nga kona, hilaha timbilu ta n'wina na tona ti nga ta va kona.

²²“Rivoningo ra miri i tihlo, hikwalaho, loko tihlo ra wena ri ri rinene, miri hinkwawo wa wena wu ta voningiwa.

²³Kambe loko tihlo ra wena ri bihile, miri hinkwawo wa wena wu ta va emunyameni. Kutani-ke, loko ku vonakala loku nga eka wena wu ri munyama, munyama wona wu ta va lowo yini!

²⁴“A ku na munhu la nga swi kotaka ku tirhela tihosi timbirhi; hikuva u ta venga yin'wana, a rhandza yin'wanyana, kumbe u ta namarhela yin'wana, a sandza yin'wanyana. Mi nge swi koti ku tirhela Xikwembu na Mamona.

²⁵“Hilaha ndzi nge eka n'wina: Mi nga tshuki mi kanakana hi swa vutomi bya n'wina, leswi mi nga ta dya, ni ku nwa, hambi swi ri swa miri wa n'wina, leswi mi nga ta swi funengela. Xana vutomi a byi tluri swakudya-ke? Ni miri, a wu tluri swa ku funengela-ke?

²⁶“Langutani tinyanyana ta le tilweni: A ti byari, a ti tshoveri, a ti hlengeleti nchumu eswitlatini; kasi tata wa n'wina la nga ematilweni wa ti fihluta; a ndzi ku, n'wina a mi ti tluri ngopfu xana?

²⁷I mani eka n'wina la nga tiengetelaka xiyimo xa yena hi xisungunhu xi ri xin'we hi mivilelo ya mbilu ya yena-ke?

²⁸“Ni loko ti ri tinguvu, mi vilela ha yini-ke? Tsundzukani mukhuva lowu makhon'wa ya nhova ma milaka ha wona; a ma tirhi, a ma luki;

²⁹kasi ndza mi byela leswaku Solomoni, na yena, eku dzunisekeni ka yena hinkwako, a nga funengelanga kukotisa rin'we ra wona.

³⁰Loko Xikwembu xi funengeta sweswo byanyi bya nhova lebyi nga kona sweswi, kasi nimixo byi ta cukumetiwa exitikweni, xana xi nga ka xi nga mi funengeti ngopfu n'wina vanhu va ku pfumela lokutsongo?

³¹Hikwalaho-ke mi nga vileri hileswaku: ‘Hi ta dya yini, kumbe hi ta nwa yini, kumbe hi ta ambala yini?’

³²Hikuva swilo leswo hinkwaswo hi leswi laviwaka hi vamatiko; kambe Tata wa n'wina wa le tilweni u tiva leswaku mi pfumala leswo hinkwaswo.

³³Kambe rhangani mi tilavela ku fuma ka Xikwembu ni ku lulama ka xona kutani leswo hinkwaswo mi ta engeteleriwa swona.

³⁴“Hikwalaho-ke, mi nga tshuki mi kanakana hi swa mundzuku, hikuva mundzuku wu ta tikarhatela swa wona. Ku karhateka ka siku rin'wana ni rin'wana ku ringene rona.