Read tsonga Matewu 7 Bible Online

Matewu 7 - tsonga bible

Matewu 7

¹“Mi nga tshuki mi avanyisa, mi nga ti avanyisiwa na n'wina;

²hikuva mi ta avanyisiwa hi ku avanyisa loku mi avanyisaka van'wana hakona; kutani mpimo lowu mi pimaka van'wana ha wona, mi ta pimiwa ha wona, na n'wina.

³“Kutani u langutela yini xilavi lexi nga le tihlweni ra makwenu, kasi a ku tsundzuki ntsandze lowu nga le tihlweni ra wena?

⁴Kumbe u vulavurisa ku yini eka makwenu, u ku: ‘Tshika, ndzi pfuta xilavi etihlweni ra wena,’ kasi ntsandze wu kona etihlweni ra wena!

⁵Mukanganyisi, rhanga u pfuta ntsandze lowu nga le tihlweni ra wena, kutani hilaha u nga ta vonisisa swinene ku pfuta xilavi etihlweni ra makwenu.

⁶“Mi nga tshuki mi hoxela timbyana swilo leswi hlawuriweke, na kona mi nga tshuki mi cukumeta tidayimani ta n'wina emahlweni ka tinguluve, swi nga ri leswaku ti nga ti kandziyela hi milenge, ti hundzukela eka n'wina, ti mi kawutlula hi meno.

⁷“Kombelani, mi ta nyikiwa; lavani mi ta swi kuma, gongondzani, mi ta pfuleriwa.

⁸Hikuva un'wana ni un'wana la kombelaka, wa nyikiwa; la lavaka, wa swi kuma; ku ta pfuleriwa la gongondzaka.

⁹Xana munhu hi wihi exikarhi ka n'wina la nga haka n'wana ribye, loko a kombele vuswa?

¹⁰Kumbe loko a kombele nhlampfi xana a nga n'wi nyika nyoka xana?

¹¹Kasi n'wina va tihanyi, loko mi tiva ku nyika vana va n'wina swilo leswinene, ngopfungopfu Tata wa n'wina wa le matilweni, a ta nyika leswinene eka lava kombelaka eka yena.

¹²Kutani swilo hinkwaswo leswi mi rhandzaka leswaku vanhu va mi endlela swona, na n'wina swi endleni eka vona, hikuva hi wona nawu ni vaprofeta.

¹³“Nghenani hi nyangwa le yo khuma, hikuva nyangwa ya ku lova yi ahlamile, ni ndlela leyi yaka kona yi anamile, kutani lava nghenaka kona va tele.

¹⁴Kambe nyangwa ya vutomi yi khumile, ni ndlela leyi yaka kona yi larile, kutani lava yi kumaka, a hi vanyingi.

¹⁵“Hambanani ni vangoma va mavunwa lava taka eka n'wina va funengele nguvu ya nyimpfu kasi exikarhi ka timbilu ta vona, i timhisi leti bvanyengetaka.

¹⁶“Mi ta va tiva hi mihandzu ya vona. Xana mavhinya ma nga khiwa emitweni, kumbe makuwa ma nga khiwa ekhaweni xana?

¹⁷Hakunene murhi wo nandziha wu tswala mihandzu yo nandziha, kambe murhi wo biha wu tswala mihandzu yo biha.

¹⁸Murhi wo nandziha wu nga tsandzeka ku tswala mihandzu yo biha, ni murhi wo biha wu nga tsandzeka ku tswala mihandzu yo nandziha.

¹⁹Murhi wun'wana ni wun'wana lowu nga tswariki vana vo nandziha, wu tsemiwa, wu cukumetiwa endzilweni.

²⁰Hikwalaho ndzi nge: Mi ta va tiva hi mihandzu ya vona.

²¹“A hi hinkwavo lava nge eka mina: Hosi, hosi, lava nga ta nghena eku fumeni ka matilo, kambe ku ta nghena la endlaka ku rhandza ka Tata wa mina la nga ematilweni.

²²“Enkarhini wolowo van'wanyana va ta ku eka mina: Hosi, hosi, xana a hi dyondzisanga hi vito ra wena-ke? Xana a hi hlongolanga mademona hi vito ra wena-ke? Xana a hi endlanga masingita layo tala hi vito ra wena-ke?

²³Enkarhini wolowo ndzi ta va byela erivaleni, ndzi ku: ‘A ndzi mi tivanga, ni siku ni rin'we; sukani eka mina, n'wina vadyohi.’

²⁴“Hikwalaho-ke un'wana ni un'wana la yingiselaka marito lawa ndzi ma vulaka, a endla ha wona, ndzi ta n'wi ringanisa ni wanuna lowo tlhariha, la akeke yindlu ya yena eribyeni.

²⁵Kutani mpfula yi na, maboboma ma ta, ni mimoya yi hunga, yi ba yindlu yoleyo; kambe a yi wanga hikuva masungulo ya yona a ma le ribyeni.

²⁶“Kambe un'wana ni un'wana la yingisaka marito lawa ndzi ma vulaka, kutani a nga endli ha wona u ta fanisiwa ni wanuna wo rivala, la akeke yindlu ya yena esaveni.

²⁷Kutani mpfula yi na, maboboma ma ta, ni mheho yi hunga, yi ba yindlu yoleyo, kutani yi wa; ku wa ka yona ku va lokukulu.”

²⁸Kuteloko Yesu a hetile ku vulavula loku, mitshungu yi hlamala ku dyondzisa ka yena;

²⁹hikuva a a va dyondzisa kukotisa munhu la nga hosi, a nga koti vatsari.