Read tsonga Matewu 9 Bible Online

Matewu 9 - tsonga bible

Matewu 9

¹Kutani Yesu a nghena ebyatsweni, a tlhela a pela lwandle, a ya emutini wa rikwavo.

²Kutani a tiseriwa munhu la omeke swirho, a lo lakahla, emasangwini. Yesu, kuteloko a vonile ku pfumela ka vona, a ku eka munhu la omeke swirho: “Tiyisa mbilu, n'wananga, swidyoho swa wena u rivaleriwile swona.”

³Kutani van'wanyana va vatsari va ku etimbilwini ta vona: “Loyi, wa sandza.”

⁴Kavaloko Yesu a tiva ku anakanya ka vona, a ku: “Mi anakanyela yini swo biha etimbilwini ta n'wina?

⁵Hikuva hi xihi lexi olovaka xana, ku vula leswaku ‘U rivaleriwile swidyoho’, kumbe ku vula leswaku: ‘Yima u tifambela’?

⁶Kutani sweswi, hileswaku mi tiva leswaku N'wana wa Munhu u ni matimba laha emisaveni ya ku rivalela vanhu swidyoho,” a ku eka lowa ku oma swirho: “Pfuka, u teka masangu ya wena, u ya endlwini ya wena.”

⁷Kutani yeloyi a pfuka, a ya endlwini ya yena.

⁸Vunyingi loko byi vona sweswo, va hlamala, va chava, va dzunisa Xikwembu, hikuva xi nyike vanhu matimba layonghasi.

⁹Kuteloko Yesu a suke kwalaho, a vona munhu loyi va nge i Matewu, a tshamisile endlwini ya ndzuvo, a ku eka yena: “Ndzi landze!”

¹⁰Kutani Matewu a suka a n'wi landza. Kuteloko a tshamile eswakudyeni, endlwini ya yena, valuvisi lavo tala ni vadyohi va nghena va tshama eswakudyeni na Yesu ni vadyondzisiwa va yena.

¹¹Kutani Vafarisi loko va swi vona, va byela vadyondzisiwa, va ku: “Mufundhisi wa n'wina u dyela yini ni valuvisi ni vadyohi xana?”

¹²Kuteloko Yesu a swi twa, a ku eka vona: “Lava tsakeke a va pfumari n'anga, kambe yi laviwa hi lava vabyaka.

¹³Kambe yanani mi ya dyondza rito leri nge: ‘Ndzi rhandza tintswalo, ma nga ri magandzelo!’ Hikuva a ndzi telanga ku vitina lava lulameke eku tshikeni, kambe vadyohi.”

¹⁴Enkarhini wolowo vadyondzisiwa va Yohane va ta eka yena, va ku: “Hina ni Vafarisi hi titsonela yini swakudya, kasi vadyondzisiwa va wena a va titsoni swona xana?”

¹⁵Yesu a ku eka vona: “Xana tinxangwana ta muteki ti nga rila, loko muteki a ha ri ka tona xana? Kambe wa ta nkarhi lowu muteki a nga ta susiwa eka vona, hi kona va nga ta titsona swakudya.

¹⁶A ku na munhu la nga babelaka xitiva lexintshwa engubyeni; a khale, hikuva xitiva lexi baberiwaka xi nga handzula nguvu, kutani nguvu yi engetelaka ku handzuka.

¹⁷Kambe vanhu a va cheri vhinyo leyintshwa emikwameni ya khale, hikuva mikwama yi nga handzuka, kutani vhinyo yi halaka, mikwama, yona, yi onhaka; vhinyo leyintshwa yi cheriwa mikwameni leyintshwa, yi hlayisana swin'we na yona.”

¹⁸A ku a ha vulavula timhaka teto hi nomu lowu ku fika hosanyana, yi n'wi khinsamela, yi ku: “N'wana wa mina wa wanhwanyana wa ha ku fa sweswi, kambe a hi fambe swin'we u ya n'wi tlhandleka mavoko henhla, a ta tlhela a hanya.”

¹⁹Kutani Yesu a suka kun'we ni vadyondzisiwa va yena a n'wi landza.

²⁰Kutani maswivo, wansati un'wana loyi a a ri karhi a karhatiwa hi switlhandla hi malembe ya khume na mambirhi, a n'wi tshinelela hi le ndzhaku, a khumba madziva ya nguvu ya yena,

²¹hikuva a ku embilwini ya yena: “Hambi ndzi nga khumba nguvu ya yena ntsena, ndzi ta hanya,”

²²kutani Yesu a rhendzeleka, a n'wi vona, a ku eka yena: “Tiyisa mbilu, n'wananga, ku pfumela ka wena ku ku ponisile.” Kutani hi nkarhi wolowo wansati loyi a hanya.

²³Yesu, kuteloko a fikile endlwini ya hosanyana, a vona lava ririsaka tinanga, ni vanhu lavo tala va endlaka pongo lerikulu,

²⁴a ku eka vona: “Sukani, hikuva wanhwanyana a nga fanga, u lo etlela,” kambe va n'wi hleka.

²⁵Kuteloko va humesile ntshungu ehandle, a nghena, a khoma wanhwanyana hi voko, kutani wanhwanyana a pfuka.

²⁶Mhaka leyi yi tshama yi twakala etikweni lero hinkwaro.

²⁷Kakuloko Yesu a suka kwalaho lavo fa mahlo vambirhi va n'wi landza va huwelela, va ku: “N'wana Davhida, hi twele vusiwana.”

²⁸Kuteloko a nghene endlwini, lavo fa mahlo volavo va ta eka yena, kutani Yesu a ku eka vona: “Xana ma pfumela leswaku ndzi nga swi kota ku tirha ntirho lowo-ke?” Va ku eka yena: “Ina, Hosi!”

²⁹Hilaha a khumbaka mahlo ya vona, a ku: “A ku endliwe ka n'wina hi ku pfumela ka n'wina.”

³⁰Kutani mahlo ya vona ma hanyanya; kutani Yesu a va laya ngopfu, a ku: “Tilanguteleni leswaku mhaka leyi yi nga tiviwi hi munhu!”

³¹Kambe loko va humile va hangalasa ntwalo wa yena etikweni rolero hinkwaro.

³²Va ku va huma, Yesu a tiseriwa munhu wa mbheveve, a katsane ni rihuhu.

³³Kuteloko ku hlongoriwile demona, lowa mbheveve a vulavula. Kutani mitshungu yi hlamala va ku: “Mhaka leyonghasi a yi si vonaka eIsraeleni.”

³⁴Kambe Vafarisi va ku: “U hlongola mademona hi hosi ya mademona.”

³⁵Kutani Yesu a tsendzeleka hi miti hinkwayo ni swimitana, a dyondzisa emasinagogeni ya kona, a vula Evhangeli ya ku fuma, a hanyisa mavabyi ni mikarhalo ya tinxakaxaka.

³⁶Kuteloko a vone mitshungu, a yi twela vusiwana hikuva a va karhele, a va hangalakile va kota tinyimpfu leti nga riki na murisi.

³⁷Hilaha a nge ka vadyondzisiwa va yena: “Ku tshovela kukulu, kambe vatirhi a hi vangani.

³⁸Khongelani hakona hosi ya ku tshovela, leswaku yi rhuma vatirhi eku tshoveleni ka yona.”