Read tsonga Marka 16 Bible Online

Marka 16 - tsonga bible

Marka 16

¹Kuteloko Savata ri hundzile Mariya wa Magadala, na Mariya mana wa Yakobo, na Salome va xava mirhi leyi nun'hwelaka ku ya n'wi tota.

²Nimpundzu hi siku ro sungula ra vhiki, va ya esirheni, loko dyambu ri huma.

³A va ri karhi va vutisana, va ku: “I mani la nga ta hi vumbuluxela ribye, a ri susa enyangweni ya sirha?”

⁴Kambe loko va languta, va vona leswaku ribye ri vumbuluxiwile; kasi a ri ri lerikulu ngopfu.

⁵Loko va nghenile esirheni, va vona jaha leri tshameke etlhelweni ra xinene, leri ambaleke nguvu leyo leha, leyo basa; kutani va tshuka.

⁶Kambe ri ku eka vona: “Mi nga chaveni, mi lava Yesu wa Nazareta la vambiweke; u pfukile, a nga kona la; vonani laha ingi a vekiwile kona.

⁷Fambani, mi ya byela vadyondzisiwa va yena, na Petro, leswaku u ta mi rhangela emahlweni ku ya eGaleliya; mi ta n'wi vona kona hilaha a mi byeleke hakona.”

⁸Vona va hatlisa va huma esirheni, va tsutsuma va khomiwa hi ku rhurhumela ni ku hloleriwa; kambe a va byelanga munhu nchumu, hikuva a va tshukile.

⁹Kambe Yesu, kuteloko a pfukile empundzwini wa siku lero sungula ra vhiki a tikombisa eku sunguleni eka Mariya wa Magadala, loyi a hlongoleke mademona ya ntlhanu na mambirhi eka yena.

¹⁰Kutani yena a ya byela lava ingi va ri na Yesu, va le nkosini, va rila;

¹¹volavo, loko va yingisa leswaku wa hanya, ni leswaku u voniwile hi yena, a va pfumelanga.

¹²Endzhaku ka swona, a tikombisa hi xivumbeko xin'wana eka vambirhi va vona loko va ri karhi va famba erivaleni.

¹³Vona va tlhela, va ya byela van'wana, kambe na vona, a va va pfumelanga.

¹⁴Eku heteleleni, a tikombisa eka lava khume na un'we loko va tshamile eswakudyeni, kutani a sola ku kaneta ka vona, ni ku nonon'hwa ka timbilu ta vona, hikuva a va nga pfumelanga lava n'wi voneke loko a pfukile.

¹⁵Kutani a ku eka vona: “Yanani emisaveni hinkwayo, mi ya byela swivumbiwa hinkwaswo Evhangeli.

¹⁶La nga ta pfumela, kutani a khuvuriwa u ta hlayiseka; kambe la nga pfumeriki, u ta avanyisiwa.

¹⁷Hi wona masingita lama nga ta endliwa hi lava pfumeleke: Va ta hlongola mademona hi vito ra mina, va ta vulavula tindzimi letintshwa;

¹⁸va ta khoma tinyoka; kutani, hambi va nga nwa nchumu lowu dlayaka, wu nga ka wu nga va endli nchumu; va ta veka mavoko ehenhla ka lava vabyaka, kutani va ta hanya.”

¹⁹Hosi, kuteloko yi vulavurile na vona, yi tekeriwa etilweni, kutani yi ya tshamisa evokweni ra xinene ra Xikwembu.

²⁰Loko va ri vona, va suka, va ya dyondzisa hinkwako, Hosi yi ri karhi yi tirha na vona, yi tiyisa rito hi masingita lawa ingi ma heleketa rona.