Read tsonga Marka 2 Bible Online

Marka 2 - tsonga bible

Marka 2

¹Kuteloko ku hundzile masiku man'wana, Yesu a vuya a nghena eKapernawume, kutani ku twakala leswaku u kona endlwini.

²Vanhu lavo tala va hatlisa va hlengeletana kona; ku pfumaleka ni vutshamo emahlweni ka nyangwa, kambe Yesu a a va dyondzisa rito.

³Kutani ku fika ka yena lava tisaka munhu loyi a khwanyaleke swirho, a rhwariwa hi mune wa vavanuna.

⁴Vona va tsandzeka ku n'wi tshinelela hi ku tala ka vanhu; kutani va hahlula lwangu ra yindlu leyi a nga ka yona; kuteloko va boxile va nembeleta masangu lawa loyi a khwanyaleke swirho a etleleke ka wona.

⁵Yesu, kakuloko a vona ku pfumela ka vona, a ku eka muvabyi: “N'wananga, u rivaleriwile swidyoho swa wena.”

⁶Kasi vatsari lava tshameke kwalaho, va sandza etimbilwini ta vona, va ku:

⁷“Loyi u vulela yini sweswo? Wa sandza! I mani la nga rivalelaka milandzu loko xi nga ri Xikwembu ntsena?”

⁸Yesu a hatla a swi tiva emoyeni wa yena leswaku va anakanye sweswo etimbilwini ta vona, kutani a ku eka vona: “Mi anakanyisela yini sweswo etimbilwini ta n'wina xana?

⁹Ku olova yini xana? Loko ndzi ku eka la khwanyaleke swirho: ‘U rivaleriwe swidyoho swa wena,’ kumbe loko ndzi ku eka yena: ‘Pfuka, u teka masangu ya wena, u famba’?

¹⁰Kambe ku va mi ta tiva leswaku N'wana wa munhu u ni matimba la emisaveni ku rivalela vanhu swidyoho” (a ku eka la khwanyaleke swirho):

¹¹“Pfuka, u teka masangu ya wena, u tifambela ekaya ka wena.”

¹²Kutani a hatlisa a pfuka, a teka masangu ya yena, a famba emahlweni ka vanhu hinkwavo; hinkwavo va hlamula, va dzunisa Xikwembu, va ku: “A hi si vona leswonghasi.”

¹³Yesu a engeta a suka a ya tlhelo ra lwandle, vunyingi hinkwabyo byi ya ka yena, kutani a va dyondzisa.

¹⁴Kakuloko a hundza a vona Levhi, n'wana Alfiya, a tshamile endlwini ya ku luva; a ku eka yena: “Ndzi landze.” Kutani Levhi a suka a n'wi landza.

¹⁵Kuteloko Yesu a tshamile eswakudyeni endlwini ya Levhi, valuvisi lavo tala ni vadyohi va tshama na Yesu ni vadyondzisiwa va yena, hikuva vanhu lavo tala a va n'wi landza.

¹⁶Kambe loko vatsari ni Vafarisi va n'wi vona a dya ni valuvisi ni vadyohi va ku eka vadyondzisiwa va yena: “U dyela yini ni valuvisi ni vadyohi, u nwela yini na vona?”

¹⁷Yesu, kakuloko a twa sweswo, a ku eka vona: “Lava hanyaka a va lavi n'anga, kambe yi laviwa hi lava vabyaka. A ndzi tanga ku ta vitana lava lulameke, kambe vona vadyohi.”

¹⁸Vadyondzisiwa va Yohane ni Vafarisi a va tshama va titsona swakudya. Kutani va ta eka Yesu, va ku eka yena: “Vadyondzisiwa va Yohane ni Vafarisi va titsonela yini swakudya xana? Kasi vadyondzisiwa va wena a va titsoni?”

¹⁹Yesu a ku eka vona: “Xana vanakulobye va muteki va nga titsona swakudya loko muteki a ha ri na vona xana? Hi nkarhi hinkwawo lowu muteki a nga kona na vona, va nga ka va nga titsoni swakudya.

²⁰Kambe masiku ma ta lawa muteki a nga ta susiwa ka vona; hi kona va nga ta titsona swakudya.

²¹A ku na munhu loyi a rhungelaka xitiva lexintshwa engubyeni ya khale; xitiva lexintshwa xi nga handzula nguvu ya khale, kutani ku handzuka ku ta engeteleka.

²²Kambe a ku na munhu loyi a nga chelaka vhinyo leyintshwa eminkwameni ya khale, hikuva vhinyo leyintshwa yi nga handzula mikwama kutani vhinyo yi halaka, na yona mikwama ya fa; kambe vhinyo leyintshwa yi fanele ku cheriwa eminkwameni leyintshwa.”

²³Kute hi siku ra Savata, kakuloko a hundza exikarhi ka masimu, vadyondzisiwa va yena va sungula ku tshova min'oko, va ri karhi va famba.

²⁴Vafarisi va ku eka yena: “Vona, va endlela yini leswi nga pfumeleriwiki hi Savata?”

²⁵Yesu a va byela, a ku: “Xana a mi si hlaya leswi endliweke hi Davhida, siku a pfumaleke swakudya, a ri ni ndlala yena ni lava ngi va ri na yena;

²⁶hilaha a ngheneke endlwini va Xikwembu enkarhini wa Abiyatara, muprista lonkulu, a dya swinkwa swa mhamba leswi nga fanelangiki ku dyiwa hi vanhu, loko va nga ri vaprista ntsena, a va a nyika ni lava ngi va ri na yena?”

²⁷Kutani a ku eka vona: “Savata yi endleriwe munhu, kasi munhu a nga endleriwanga Savata.

²⁸Hikwalaho-ke, N'wana wa Munhu i hosi ni ya yona Savata.”