Read tsonga Marka 8 Bible Online

Marka 8 - tsonga bible

Marka 8

¹Emasikwini lawa, vunyingi lebyikulu a byi ri kona, kambe a va pfumala swakudya; kutani Yesu a vitana vadyondzisiwa va yena, a ku eka vona:

²“Ndzi twela vunyingi lebyi, vusiwana; hikuva hi masiku manharhu va tshamile eka mina va nga ri na swakudya.

³Kungakuloko ndzi va tlherisela ekaya ka vona va ri ni ndlala, va nga hela matimba endleleni, hikuva van'wana va vona va tile hi le kule.”

⁴Vadyondzisiwa va yena va n'wi hlamula, va ku: “Va nga laveriwa kwihi swinkwa leswi va nga xurhaka ha swona kwala emananga xana?”

⁵A va vutisa, a ku: “Mi ni swinkwa swingani?” Va ku: “Ntlhanu na swimbirhi.”

⁶Kavaloko a lerisa vunyingi leswaku va tshama ehansi, kutani a teka swinkwa swa ntlhanu na swimbirhi; kuteloko a khensile, a phema, a nyiketa vadyondzisiwa va yena leswaku va phamela vanhu; vona va avela vunyingi.

⁷Kambe a va ri ni tinhlampfinyana ti nga ri tingani; kuteloko a khensile, a lerisa leswaku na tona ti averiwa vanhu.

⁸Kutani va dya, va xurha, va ko va rhola ntlhanu wa swirhundzu na swirhundzu swimbirhi swa mahlanhla lama seleke.

⁹Kasi lava nga dya a va lava ku endla mune wa makume ya madzana, (4 000). Kutani a va tlherisa.

¹⁰Kutani a hatlisa ku nghena ebyatsweni ni vadyondzisiwa va yena, a ya etikweni ra Dalmanuta.

¹¹Kavaloko Vafarisi va huma, va sungula ku kanetana na yena, va kombela masingita lama humaka etilweni, ku n'wi ringa.

¹²Kutani a hefemuteka emoyeni wa yena, a ku: “Rixaka leri, ri kombelela yini masingita? Kunene ndza mi byela, ndzi ri: Rixaka leri ri nga ka ri nga nyikiwi masingita!”

¹³Kutani a va tshika a tlhela a nghena ebyatsweni, a tlhandlukela entsungeni.

¹⁴Kambe vadyondzisiwa a va rivele ku teka swinkwa, a va ri ni xinkwa xin'we ntsena ebyatsweni.

¹⁵Kutani a va laya, a ku: “Tivoneleni, mi chava comela xa Vafarisi, ni comela xa Heroda!”

¹⁶Kutani va tsundzuxana, va ku: “Kumbe hi leswi hi nga riki na swinkwa.”

¹⁷Kuteloko Yesu a swi twa, a ku eka vona: “Xana mi anakanya leswaku ndzi vula sweswo hi leswi mi nga tekangiki swinkwa xana? Timbilu ta n'wina ta ha nonon'hwa ni sweswi xana?

¹⁸Leswi mi nga ni mahlo, a mi voni ha yini-ke? Ni leswi mi nga ni tindleve, a mi twi ha yini-ke, a mi tsundzuki ha yini-ke?

¹⁹Xana siku ndzi phameleke lava ntlhanu wa makume ya madzana swinkwa swa ntlhanu, a mi tekile swirhundzu swingani leswi teleke mahlanhla-ke?” Va ku eka yena: “Khume na swimbirhi.”

²⁰“Ni siku ndzi phameleke lava mune wa makume ya madzana swinkwa swa ntlhanu na swimbirhi, a mi tekile swirhundzu swingani leswi teleke mahlanhla xana?” Va ku: “Ntlhanu na swimbirhi.”

²¹Kutani a ku eka vona: “A mi twisisi ha yini-ke?”

²²Kutani va fika eBetsayida. Va n'wi tisela lowo fa mahlo, va n'wi khongela leswaku a n'wi khumba.

²³Kutani a khoma lowo fa mahlo hi voko, a n'wi yisa ehandle ka muti, a n'wi tota mahlo hi marhi, a n'wi tlhandleka mavoko henhla, a n'wi vutisa, a ku: “Xana u vona yini?”

²⁴Kuteloko a langutile, a ku: “Ndzi vona vanhu, ndzi va vona loko va famba va fana ni mirhi.”

²⁵Kutani a tlhela a n'wi veka mavoko emahlweni a n'wi langutisa kutani a hanyisiwa, a vona swinene swilo hinkwaswo.

²⁶Kutani a n'wi tlherisela ekaya ka yena, a ku: “U nga tshuki u nghena emutini.”

²⁷Kutani Yesu a suka ni vadyondzisiwa va yena ku ya emitini ya Khezariya wa Filipi. Kakuloko va ha ri endleleni, a vutisa vadyondzisiwa va yena, a ku: “Vanhu va ri ndzi mani xana?”

²⁸Va hlamula, va ku: “Van'wana va ri u Yohane Mukhuvuri, van'wana va ri u Eliya, van'wana va ri u un'wana wa vaprofeta.”

²⁹Kutani a ku eka vona: “Xana n'wina mi ri ndzi mani-ke?” Petro a hlamula a ku eka yena: “U Kriste.”

³⁰Kutani a va laya ngopfu leswaku va nga tshuki va n'wi vula eka munhu, hambi a ri un'we.

³¹Kutani a sungula ku va dyondzisa leswaku a swi fanela N'wana wa Munhu leswaku a twisiwa ku vaviseka lokukulu, a tshikiwa hi vakulukumba ni vaprista ni vatsari, kutani a dlawa, a ta tlhela a pfuka hi siku ra vunharhu.

³²A a va byela mhaka yeleyi erivaleni; kambe Petro a n'wi tekela etlhelweni, a sungula ku n'wi tshinya.

³³Kambe yena a rhendzeleka, a languta vadyondzisiwa va yena, a tshinya Petro, a ku: “Suka eka mina Satana, hikuva a ku twi swa Xikwembu, u twa swa vanhu ntsena.”

³⁴Kuteloko a vitanile vunyingi ni vadyondzisiwa va yena, a ku eka vona: “Munhu, hambi a ri mani na mani loyi a rhandzaka ku ndzi landza, a a titshike, a tirhwexe xihambano xa yena, kutani a ndzi landza.

³⁵Hikuva la rhandzaka ku hlayisa vutomi bya yena, u ta lahlekeriwa ha byona; kambe la lahlekeriwaka hi vutomi bya yena hikwalaho ka mina ni Evhangeli, u ta byi hlayisa.

³⁶Hikuva munhu, hambi a nga fuwa misava hinkwayo, kambe a lahlekeriwa hi moya wa yena, swi ta n'wi pfuna yini-ke?

³⁷Kumbe munhu a nga xava moya wa yena ha yini-ke?

³⁸Hikuva loyi a nga ni tingana hikwalaho ka mina ni marito ya mina, emahlweni ka rixaka leri ra vaoswi ni ra vadyohi, na yena N'wana wa Munhu u ta khomiwa hi tingana hikwalaho ka yena, siku a taka vuya hi ku kwetsima ka Tata wa yena swin'we ni tintsumi leto kwetsima.”