Read tsonga Luka 1 Bible Online

Luka 1 - tsonga bible

Luka 1

¹Leswi van'wana va ringeteke ku rungula hi ku ti longoloxa timhaka leti humeleleke exikarhi ka hina,

²hilaha hi ti nyikiweke hi lava ingi ti ri timbhoni ta tona ni malandza ya rito, ka ha ri eku sunguleni ka tona;

³na mina, kuteloko ndzi vutisisile timhaka hinkwato eku humeleleni ka tona, ndzi ku: Swa ndzi fanela na mina, la landzeke swinene timhaka leti hinkwato, loko ndzi ku tsalela tona, wena Teyofilo, hosi ya nga leyinene,

⁴u ta tiva ku tiya ka timhaka leti u dyondzisiweke tona.

⁵Enkarhini wa Heroda, hosi ya Yudiya, a ku ri ni muprista loyi vito ra yena ingi a ri Zakariya, wa ntlawa, wa Abiya, nsati wa yena a a ri wa vana va Aroni; vito ra yena a a ri Elizabeta.

⁶Ha vambirhi a va lulamile emahlweni ka Xikwembu, a va famba emilawini hinkwayo, ni le ku leriseni hinkwako ka Hosi, va nga soriwi ha nchumu.

⁷Ntsena a va nga ri na n'wana, hikuva Elizabeta a a ri mhika; kutani a va dyuharile havambirhi.

⁸Kakuloko Zakariya a tirha ntirho wa yena wa vuprista emahlweni ka Xikwembu, hi siku ra ntlawa wa yena,

⁹hi nawu wa vuprista, u hlawuriwile hi vuhlolotwana ku nghena etempeleni ya Hosi, ku hisa magandzelo ya risuna.

¹⁰Ntshungu hinkwawo wa tiko a wu ri ehandle, wu khongela enkarhini wolowo wa magandzelo ya risuna.

¹¹Kutani ntsumi ya Hosi yi tikombisa eka Zakariya, yi yimile etlhelweni ra xinene ra alitari ya magandzelo.

¹²Kutani Zakariya, loko a yi vona, a tshuka a chava.

¹³Kambe ntsumi yi ku eka yena: “Zakariya, u nga chavi, hikuva ku khongela ka wena ku yingisiwile; Elizabeta, nsati wa wena, u ta ku velekela n'wana, kutani u ta n'wi thya vito ra Yohane.

¹⁴U ta ku tsakisa ngopfu, naswona lavo tala va ta tsakela ku tumbuluka ka yena;

¹⁵hikuva u ta va nkulukumba emahlweni ka Hosi, a nga ka a nga nwi vhinyo ni byalwa, kambe u ta tala moya lowo kwetsima a ha ri ekhwirini ra mana wa yena.

¹⁶U ta hundzukisela vana va Israele lavo tala eka Hosi, Xikwembu xa vona;

¹⁷kutani u ta n'wi rhangela emahlweni hi moya ni matimba ya Eliya, u ta vuyisela timbilu ta vatatana eka vana va vona, ni vakaneti evutlharini bya lavo lulama, ku lunghisela Hosi tiko leri nga ni mafundza.”

¹⁸Kutani Zakariya a ku eka ntsumi: “Ndzi ta swi tiva ha yini? Kasi ndzi dyuharile, nsati wa mina, na yena, i xikoxa.”

¹⁹Ntsumi yi n'wi hlamula, yi ku: “Hi mina Gabriele la yimaka emahlweni ka Xikwembu; ndzi rhumiwile ku ta vulavula na wena ni ku ku byela timhaka toleto letinene.

²⁰Kutani vona, u ta va mbheveve, u hluleka ku vulavula ku ko ku fika siku leri swi nga ta humelela, hikuva a ku pfumelanga marito ya mina lama nga ta endleka enkarhini wa wona.”

²¹Kambe tiko a ri langutela Zakariya, a va hlamala hi ku hlwela ka yena etempeleni.

²²Kavaloko a huma, a hluleka ku vulavula na vona, kutani va tiva leswaku u vonile masingita etempeleni; na yena a va encenyetela swona, kutani a tshama a ri mbheveve.

²³Kuteloko masiku ya ku tirha ka yena ma herile, a tlhelela endlwini ya yena.

²⁴Endzhaku ka masiku lawa, Elizabeta, nsati wa yena a tika nyimba kutani a tifihla hi tin'hweti ta ntlhanu a ku:

²⁵“Hi swona leswi Hosi yi ndzi endleke swona, enkarhini lowu yi nga ndzi languta ku susa tingana ta mina exikarhi ka vanhu.”

²⁶Hi n'hweti ya ntlhanu na yin'we ntsumi Gabriele yi rhumiwa hi Xikwembu emutini wa Galeliya lowu va nge i Nazareta,

²⁷eka wanhwanyana loyi ngi a vutiwile hi wanuna loyi va nge i Yosefa, wa rixaka ra Davhida, vito ra wanhwanyana loyi a a ri Mariya.

²⁸Ntsumi, kuteloko yi fike eka yena, yi ku: “Avuxeni, mutsetseleriwa, Hosi yi na wena; u katekile exikarhi ka vavasati.”

²⁹Kakuloko Mariya a yi vona, a tshuka hi marito ya yona, a ehleketa leswaku xana ku xeweta ka yona hi loku yini?

³⁰Kutani ntsumi yi ku eka yena: “Mariya, u nga chavi; hikuva u kumile tintswalo eka Xikwembu.

³¹U ta tika, kutani u ta veleka n'wana wa wanuna, u ta n'wi thya vito ra Yesu (Muponisi).

³²U ta va nkulukumba, u ta vuriwa N'wana wa La nge henhlahenhla; Hosi Xikwembu xi ta n'wi nyika xiluvelo xa Davhida, tata wa yena.

³³Kutani u ta fuma yindlu ya Yakobo hilaha ku nga heriki, vukosi bya yena byi nga ka byi nga vi na makumu.”

³⁴Kambe Mariya a ku eka ntsumi: “Swi nga endlekisa ku yini, kasi a ndzi tivi wanuna?” Ntsumi yi n'wi hlamula, yi ku eka yena:

³⁵“Moya lowo Kwetsima wu ta xikela eka wena, ni matimba ya La nge henhlahenhla ma ta ku funengeta; hikwalaho, n'wana lowo kwetsima la nga ta velekiwa hi wena, u ta vuriwa N'wana wa Xikwembu.

³⁶Kutani vona, Elizabeta makwenu, na yena u tikile eku dyuhaleni ka yena, kutani n'hweti leyi, i ya ntlhanu na yin'we eka loyi a nga vuriwa mhika,

³⁷hikuva a ku na xilo lexi hlulaka Xikwembu.”

³⁸Kutani Mariya a ku: “Vona, ndzi nandza wa Hosi, a ku endliwe eka mina hi ku vula ka wena.” Kutani ntsumi yi suka eka yena.

³⁹Emikarhini yoleyo, Mariya a suka, a ya hi ku hatlisa etikweni ra tintshava, emutini wun'wana wa Yuda,

⁴⁰a nghena endlwini ya Zakariya, a xeweta Elizabeta.

⁴¹Kuteloko Elizabeta a twa ku xeweta ka Mariya, n'wana a tshukatshuka ekhwirini ra yena, kutani Elizabeta a tala Moya lowo Kwetsima, a tlakusa rito, a ku:

⁴²“U katekile xikarhi ka vavasati, ku katekile ni n'wana la nga ekhwirini ra wena.

⁴³Swi endlise ku yini leswaku mana wa Hosi yanga a ta eka mina xana?

⁴⁴Hikuva kakuloko rito ra ku xeweta ka wena ri fika etindleveni ta mina, n'wana a tshukatshuka hi ku tsaka ekhwirini ra mina.

⁴⁵Ku katekile la pfumeleke, hikuva timhaka leti a nga byeriwa hi Hosi, ti ta tumbuluka.”

⁴⁶Kutani Mariya a ku: “Mbilu yanga yi dzunisa Hosi,

⁴⁷ni moya wa mina wu titsakela eka Xikwembu Mulondzovoti wa mina,

⁴⁸hikuva u langutile vusiwana bya nandza wa yena; kutani tinxaka hinkwato ti ta ku ndzi katekile,

⁴⁹hikuva Lowa matimba u ndzi endlerile leswikulu.

⁵⁰Vito ra yena ra kwetsima, ni tintswalo ta yena ti le tinxakeni ta tinxaka eka lava n'wi chavaka.

⁵¹U tirhile hi matimba hi voko ra yena; u hangalasile lava tidzunisaka eku anakanyeni ka timbilu ta vona,

⁵²U wisile tihosi eswitshan'weni swa tona, u tlakusile lavatsongo;

⁵³lava nga ni ndlala, u va xurhisile leswo nandziha; lava fuweke, u va tlherisile va pfumala.

⁵⁴U londzovotile Israele, nandza wa yena, a ta anakanya tintswalo ta yena hilaha a byeleke vatata wa hina,

⁵⁵a ri Abrahama ni rixaka ra yena hi masiku hinkwawo.”

⁵⁶Kutani Mariya a tshama na Elizabeta tin'hweti leti laveke ku endla tinharhu, kutani a tlhelela ekaya.

⁵⁷Kutani Elizabeta a fikeriwa hi nkarhi wa yena wa ku veleka, a veleka n'wana wa wanuna.

⁵⁸Lava akeke na yena, ni maxaka ya yena, kuteloko va twa leswaku Hosi yi twarisile ha yena tintswalo ta yona, va tsaka na yena.

⁵⁹Kutani hi siku ra ntlhanu na manharhu, va ya yimbisa xihlangi, va lava ku n'wi thya vito ra Zakariya, tata wa yena,

⁶⁰kambe mana wa yena a angula, a ku: “E-e, u ta churiwa vito ra Yohane.”

⁶¹Va ku eka yena: “A ku na munhu erixakeni ra wena la thyiweke vito rero.”

⁶²Kutani va encenyetela tata wa yena leswaku a va tivisa vito leri a ri rhandzaka;

⁶³kuteloko Zakariya a kombele ribye, a tsala a ku: “I Yohane vito ra yena,” kutani va hlamala hinkwavo.

⁶⁴Kan'wekan'we nomu wa yena wu pfuleka, ririmi ra yena ri tshunxeka; kutani a vulavula a tlangela Xikwembu.

⁶⁵Lava akeke na yena hinkwavo va khomiwa hi ku chava, kutani timhaka leti ti hangalaka hinkwako etintshaveni ta Yudiya.

⁶⁶Kambe hinkwavo lava ti tweke va ti hlayisa etimbilwini ta vona, va ku: “U ta va yini, n'wana loyi?” Kutani voko ra Hosi ri va eka yena.

⁶⁷Kavaloko Zakariya, tata wa yena, a tala hi Moya lowo Kwetsima, a bvumbha, a ku:

⁶⁸“A ku vongiwe Hosi, Xikwembu xa Israele, hikuva xi endzele tiko ra xona, xi ri kutsurile;

⁶⁹xi hi pfuxele ku ponisa lokukulu endlwini ya Davhida, nandza wa xona,

⁷⁰hilaha a nga vula hakona hi mikarhi hinkwavo hi milomu ya vaprofeta lavo kwetsima va yena, a ku:

⁷¹U ta hi kutsula eka lava nga valala va hina; ni le mavokweni ya hinkwavo lava hi vengaka,

⁷²leswaku a hi tsetselela swin'we ni vatata wa hina, ni ku anakanya ntwanano wa yena lowo kwetsima,

⁷³ku nga ku hlambanya loku a nga hlambanyela Abrahama, tata wa hina,

⁷⁴ku hi nyika leswaku, loko hi ponisiwile emavokweni ya valala va hina, hi ta n'wi tirhela, hi nga chavi nchumu

⁷⁵hi mukhuva lowo saseka, lowu lulameke emahlweni ka yena, hi masiku hinkwawo ya ku hanyaka hina.

⁷⁶Na wena, xihlangi, u ta vuriwa muprofeta wa La nge henhlahenhla; hikuva u ta rhangela Hosi emahlweni, ku lunghisa tindlela ta yena,

⁷⁷ku ta tivisa tiko ra yena ku hlayiseka hi ku rivaleriwa ka swidyoho swa rona,

⁷⁸hikwalaho ka tintswalo letikulu ta Xikwembu hi dyambu ra vuxa,

⁷⁹leri nga huma ehenhla ku voninga lava nga tshama emunyameni ni le ndzhutini wa rifu, ni ku fambisa mikondzo ya hina endleleni ya ku tsaka.”

⁸⁰Kutani n'wana a kula, a tiya matimba emoyeni; kutani a tshama emananga ku ko ku fika siku leri a humeleke ha rona eka Israele.