Read tsonga Luka 12 Bible Online

Luka 12 - tsonga bible

Luka 12

¹Kaharhi sweswo, vanhu a va hlengeletene ka yena hi makume ya madzana, va ko va kandziyelana; kutani Yesu a sungula ku byela vadyondzisiwa va yena, a ku: “Ngopfu, chavani comela xa Vafarisi, ma nga manyunyu;

²hikuva a ku na xilo lexi funengetiweke, lexi nga taka xi nga fununguriwi, ni loko xi ri xilo xa xihundla lexi nga taka xi nga tiviwi.

³Hikwalaho, hinkwaswo leswi mi nga swi vula emunyameni, swi ta twakala eku vonakaleni; ni leswi mi nga swi vula etindleveni, etindlwini, swi ta vuriwa eswihlungwini swa tindlu.

⁴Kambe ndzi ri eka n'wina, mi nga vanakulorhi: Mi nga tshuki mi chava lava dlayaka miri, kutani ndzhaku, a va na swin'wana leswi va nga ta swi endla.

⁵Kambe ndzi ta mi kombisa loyi mi faneleke ku n'wi chava: Chavani loyi, kutakuloko a dlele miri, a nga ni matimba ya ku susumetela munhu etiheleni. Ina, ndzi ri eka n'wina, yeloyi, n'wi chaveni.

⁶“Swinyanyana swa ntlhanu a swi xaviwi hi tipeni timbirhi xana? Kasi, a ku na xin'we xa swona lexi nga rivariwa emahlweni ka Xikwembu.

⁷Swi tsandza ni misisi ya tinhloko ta n'wina, yi hlayiwile hinkwayo. Mi nga chavi nchumu, mi tlula swinyanyana leswo tala.

⁸“Un'wana ni un'wana la nga ta ndzi vula emahlweni ka vanhu, N'wana wa Munhu, na yena, u ta n'wi vula emahlweni ka tintsumi ta Xikwembu.

⁹Kambe la ndzi landzulaka emahlweni ka vanhu, u ta landzuriwa emahlweni ka tintsumi ta Xikwembu.

¹⁰“Un'wana ni un'wana la dyohelaka N'wana wa Munhu, u ta rivaleriwa, kambe la sandzeke Moya lowo Kwetsima, a nga ka a nga rivaleriwi.

¹¹“Kutakuloko va mi yisa emasinagogeni, ni ka lavakulu, ni ka tihosi, mi nga tshuki mi vilela hi mukhuva lowu mi nga ta tihlamulela ha wona, hambi swi ri leswi mi nga ta swi vula;

¹²hikuva Moya lowo Kwetsima wu ta mi dyondzisa enkarhini wolowo, leswi mi fanelaka ku swi vula.”

¹³Kutani un'wana exikarhi ka ntshungu a ku eka yena: “Mufundhisi, byela makwerhu leswaku a ndzi hungulela ndzhaka ya hina.”

¹⁴Kambe a ku eka yena: “Munhu ndzi wena! Xana i mani la nga ndzi veka muavanyisi, kumbe muhunguleri wa n'wina?”

¹⁵Kutani a ku eka vona: “Tivoneleni, mi chava timbilu ta makwanga, hikuva vutomi bya munhu byi nga ka byi nga humi eswilweni leswi a swi fuweke, hambi swi n'wi andzele ngopfu.”

¹⁶Kutani a va byela xifaniso, a ku: “Masimu ya munhu la fuweke a ma velekile ngopfu; kutani a anakanya embilwini ya yena, a ku:

¹⁷‘Ndzi ta endla yini, kasi a ndzi na laha ndzi nga hlengeletaka swakudya swa mina kona?’

¹⁸Kutani a ku: ‘Ndzi ta endlisa sweswo: ndzi ta hlanhla switlati swa mina, ndzi aka leswikulu, kutani ndzi ta hlengeleta kona swakudya swa mina hinkwaswo, ni rifuwo ra mina hinkwaro.

¹⁹Kutani ndzi ta ku eka moya wa mina: Moya wanga, u ni swilo leswo tala leswi hlengeleteriweke malembe layo tala; wisa, u dya, u nwa, u tsaka.’

²⁰Kambe Xikwembu xi ku eka yena: ‘Wee xihunguki! Hi vusiku byebyi, moya wa wena wu ta tekiwa ka wena; kutani swilo leswo u swi lunghiseke, swi ta va swa mani xana?’

²¹Swi tano ni ka yena loyi a tihlengeletelaka xuma, kambe a nga fuweri Xikwembu.”

²²Kutani a ku eka vadyondzisiwa va yena: “Hikwalaho ndzi ri eka n'wina; mi nga tshuki mi vilela hi swa ku hanya ka n'wina, leswi mi nga ta swi dya, hambi swi ri swa miri, leswi mi nga ta funengela.

²³Vutomi byi tlula swakudya, ni miri wu tlula nguvu.

²⁴Anakanyani mawukuwuku, hikuva a ma byari, a ma tshoveri, a ma na ngula ni nkundla; kambe Xikwembu xa ma phamela. Kasi a mi tluri tinyanyana swinene ngopfu xana?

²⁵Xana i mani eka n'wina la nga engetelaka xisungunhu xin'we exiyin'weni xa yena hi ku vilela ka yena xana?

²⁶Kutani sweswi, loko mi hluriwa hi swilo leswitsongo, mi tivilerisa ha yini eka swin'wana?

²⁷Langutani makhon'wa hilaha ma milaka hakona: a ma tirhi, a ma luki, hambiswiritano, Solomoni, na yena, evukosini bya yena hinkwabyo, a nga funengelanga tanihi rin'wana ra wona.

²⁸Kutani leswi Xikwembu xi funengetisaka sweswo byanyi lebyi nga kona enhoveni namuntlha, kasi mundzuku byi ta cukumetiwa endzilweni, xana ngopfungopfu xi nga ka xi nga mi funengeti xana, n'wina va ku pfumela lokutsongo?

²⁹Kambe n'wina mi nga tshuki mi tivilerisa hi leswi mi nga swi dya, ni leswi mi nga ta swi nwa, kambe mi nga kanakani,

³⁰hikuva swilo leswi hinkwaswo swi laviwa hi vamatiko, kambe Tata wa n'wina wa swi tiva leswaku ma swi pfumala.

³¹Ngopfungopfu, lavani ku fuma ka Xikwembu, kutani swilo leswi hinkwaswo mi ta engeteleriwa swona.

³²“U nga chavi, wee ntlhambinyana, hikuva swi tsakisile Tata wa n'wina ku mi nyika vuhosi.

³³Xavisani leswi mi nga na swona, mi nyika swisiwana; mi tilavela mikwama leyi nga hlakariki, ni xuma ematilweni lexi nga heriki, lexi khamba ri nga xi yiviki, ni laha tinsumba ti nga onhiki;

³⁴hikuva laha xuma xa n'wina xi nga kona, timbilu ta n'wina, na tona, ti ta va kona.

³⁵“A ku tsimbiwe swisuti swa n'wina, mavoningo ya n'wina a ma lumekiwe.

³⁶Kotisani vanhu lava langutelaka hosi ya vona loko yi ta vuya enkhubyeni leswaku, kutakuloko a gongondza, va hatlisa va n'wi pfulela.

³⁷Ku katekile malandza walawo, hosi ya wona, kutakuloko yi fika, yi ma kuma ma yi langutele! Kunene, ndzi ri eka n'wina: Yi ta tiboha xisuti, yi ma tshamisisa eswakudyeni, yi ma tirhela.

³⁸Ni loko yi ta eku languteleni ka vumbirhi, kumbe ku languteleni ka vunharhu, kutani yi ma kuma ma ha ri tano, ku katekile malandza walawo.

³⁹Kambe tivani leswaku, loko ngi n'wini wa yindlu a tiva nkarhi lowu khamba ri nga ta ta ha wona, u ta hiteka, a nga ka a nga tshiki yindlu ya yena yi boxiwa.

⁴⁰Kutani, na n'wina, tilunghiseni, hikuva N'wana wa Munhu u ta ta hi nkarhi lowu mi nga wu ehleketiki.”

⁴¹Kwalaho Petro a ku eka yena: “Hosi, xifaniso lexi, u xi byela hina ntsena, kumbe u xi byela hinkwavo xana?”

⁴²Hosi yi ku: “Mulanguteri hi wihi lowo tshembeka lo wa vutlhari, yeloyi n'wini wa yena a n'wi vekeke mulanguteri wa malandza ya yena, ku va nyika swakudya hi nkarhi wa swona?

⁴³U katekile nandza loyi, kutakuloko hosi ya yena yi ta, yi n'wi kuma a ri karhi a endlisa sweswo.

⁴⁴Kunene ndzi ri eka n'wina, yi ta n'wi veka mulanguteri wa mitirho ya yena hinkwayo.

⁴⁵Kambe, kungakuloko nandza yeloyi a vulavula embilwini ya yena, a ku: ‘Hosi ya mina yi hlwela ku ta,’ kutani a sungula ku ba malandza ya vavanuna ni ya vavasati a dya, a nwa, a pyopyiwa;

⁴⁶hosi ya nandza loyi yi ta ta hi siku leri a nga yi langutelangiki, ni nkarhi lowu a nga wu tiviki; kutani yi ta n'wi pulukanya, yi n'wi nyika ku averiwa ka yena ni lava nga pfumelangiki.

⁴⁷“Nandza la tivaka ku rhandza ka hosi ya yena, kutani a nga lunghisanga nchumu, a nga endlanga ku rhandza ka hosi ya yena, u ta biwa ngopfu;

⁴⁸kambe la nga ku tivangiki, kutani a endlile timhaka leti faneriwaka hi ku biwa, u ta biwa switsongo. Un'wana ni un'wana la nyikiweke ngopfu, ku ta laviwa ngopfu eka yena; kutani la nga tshembiwa ngopfu, ku ta vitaniwa ngopfu eka yena.

⁴⁹“Ndzi tile ku ta hoxa ndzilo la emisaveni, kutani ndza ha lava yini leswi wu pfurhaka ni sweswi.

⁵⁰Ndzi ta fanela ku khuvuriwa hi ku khuvula kun'wana, kutani ndzi navela swonghasi leswaku ku hetiseka.

⁵¹Xana mi ringanisa leswaku ndzi tile ku neha ku tsaka emisaveni xana? E-e, ndza mi byela, kambe i ku avana.

⁵²Hikuva sweswi vanhu va ntlhanu va yindlu yin'we va ta avana, lavanharhu va ta lwa ni lavambirhi, lavambirhi va ta lwa ni lavanharhu.

⁵³Tata wa munhu u ta avana ni n'wana wa yena, ni n'wana u ta avana na tata wa yena; mana wa munhu u ta avana ni n'wana wa yena, ni n'wana u ta avana na mana wa yena. N'wingi wa munhu u ta avana ni n'wingi wa yena kutani yena n'wingi a avana ni n'wingi wa yena.”

⁵⁴Kutani a ku eka vunyingi: “Siku mi vonaka papa ri huma evupeladyambu, mi hatlisa mi ku: ‘Mpfula yi ta na,’ kutani swi va tano.

⁵⁵Kakuloko ku hunga mheho tlhelo ra dzonga, mi ku: ‘Ku ta kufumela,’ kutani swi va tano.

⁵⁶N'wina vamanyunyu! Mi tiva ku xiya nghohe ya tilo ni ya misava, kasi a mi tivi ha yini ku pimanisa nkarhi lowu;

⁵⁷a mi tianakanyeri ha yini leswi lulameke?

⁵⁸“Loko u ya ehosini na loyi u tengisanaka na yena, ringeta ku tsema mhaka wa ha ri endleleni na yena, swi nga ri leswaku a ku kokela eka muavanyisi, muavanyisi, yena, a ku nyiketa nandza wa huvo, kutani nandza a ku susumetela ekhotsweni.

⁵⁹Ndzi ri eka wena: U nga ka u nga humi kona, u nga si riha ni malinyana leyi hetiselaka.”