Read tsonga Luka 14 Bible Online

Luka 14 - tsonga bible

Luka 14

¹Kuteloko a nghenile hi siku ra Savata endlwini ya nkulukumba un'wana wa Vafarisi, ku ya dya swakudya kona, vona a va n'wi xiya.

²Kambe munhu la nga vabya hi xirhumberhumbe a a ri emahlweni ka yena.

³Kavaloko Yesu a vulavula na vona, a ku eka vafundhisi va nawu ni ka Vafarisi: “Xana swa pfumeleriwa ku hanyisa munhu hi Savata xana?”

⁴Kambe va miyela. Kwalaho a n'wi teka, a n'wi hanyisa, a va a n'wi tlherisa.

⁵Kutani a vulavula na vona, a ku: “I mani eka n'wina, kungakuloko mbhongolo ya yena, kumbe homu ya yena, yi wele ekheleni, a nga ka a nga hatlisi a yi humesa, hi siku ra Savata xana?”

⁶Kutani va tsandzeka ku n'wi hlamula marito lawa.

⁷A engeta a byela lava vitaniweke eswakudyeni, loko a vona hilaha va tihlawulelaka switshamo swo rhanga hakona, a ku eka vona:

⁸“Kungakuloko munhu a ku vitile enkhubyeni, u nga tshuki u ya tshamisa exitshan'weni lexo rhanga; swingari leswaku kumbe a nga va kona la ku tlulaka hi ku chaviwa, la vitaniweke na yena, hi n'wini wa nkhuvo;

⁹kutani la nga n'wi vita na wena, a nga ta ku byela, a ku: ‘Sukela loyi, exitshamo lexi,’ kutani u ya tshama u ri ni tingana exitshan'weni lexi nga endzhaku.

¹⁰Kambe kungakuloko u vitaniwile, u ya tshamisa exitshan'weni lexi nga endzhaku, leswaku la ku viteke, loko a ta a ku byela a ku: ‘Nakulorhi, tlhandlukela ehenhla.’ Kutani kwalaho u ta dzunisiwa emahlweni ka lava tshameke eswakudyeni na wena.

¹¹Hikuva un'wana ni un'wana la titlakusaka, u ta tsongahatiwa; kambe un'wana ni un'wana la titsongahataka, u ta kurisiwa.”

¹²Kambe a ku eka loyi a n'wi vitaneke: “Loko u endla nkhuvo wa xifihlulo, kumbe wa xisalelo, u nga tshuki u vitana vanakuloni, kumbe vamakwenu, kumbe maxaka ya wena, kumbe lava fuweke lava u akeke na vona; swi nga ri leswaku kumbe na vona va ku vitana, va etisa swa wena.

¹³Kambe loko u endla nkhuvo, vitana vapfumari, ni swilema, ni lava khwitaka, ni lavo fa mahlo;

¹⁴kutani u ta kateka, hikuva va pfumala swa ku ku etisela swona, hikuva u ta etiseriwa hi siku ra ku pfuka ka lava lulameke.”

¹⁵Un'wana wa lava tshameke eswakudyeni, loko a twa timhaka teto, a ku eka yena: “Ku katekile la nga ta dya swakudya eku fumeni ka Xikwembu!”

¹⁶Kambe Yesu a ku eka yena: “Munhu un'wana a endla xilalelo lexikulu, a rhamba vanhu lavo tala eka xona.

¹⁷Kutani a rhuma nandza wa yena hi nkarhi wa ku lalela ku byela lava rhambiweke leswaku: ‘Tanani, swilo hinkwaswo swi lunghisiwile.’

¹⁸Kambe hinkwavo va va nomu wun'we ku tilandzula. Lowo sungula a ku eka yena: ‘Ndzi xavile nsimu, kutani ndzi fanele ku ya yi vona; ndza ku khongela leswaku u ndzi landzulela.’

¹⁹Un'wana a ku: ‘Ndzi xavile khume ra tihavi, kutani ndzi ya eku tiringeteni; ndza ku khongela leswaku u ndzi landzulela.’

²⁰Un'wana a ku: ‘Ndzi hlomisile nsati; hikwalaho ndzi nga ka ndzi nga yi.’

²¹Nandza yeloyi a tlhela, a ya tivisa n'wini wa yena timhaka teto, Kavaloko n'wini wa yindlu a kariha, a ku eka nandza wa yena: ‘Hatlisa u ya etihubyeni, ni le mitsendzeleni ya muti, u tisa halenu vapfumari, ni swilema, ni lavo fa mahlo, ni lava khwitaka.’

²²Kutani nandza a ku: ‘Hosi, ku endliwile hilaha u leriseke hakona, kambe vutshamo bya ha ri kona.’

²³Kutani n'wini a ku eka nandza: ‘Famba etindleleni, ni le swihlahleni, u hluhlurheta vanhu ku nghena, yindlu ya mina yi tala.

²⁴Hikuva ndzi ri eka n'wina: A ku na munhu ni un'we wa lava vitaniweke, la nga ta nantswa xisalelo xa mina.’ ”

²⁵Mitshungu leyikulu a yi famba na yena, kutani a va hundzulukela, a ku:

²⁶“Kungakuloko un'wana a ta eka mina, a nga vengi tata wa yena, ni mana wa yena, ni nsati wa yena, ni vana, ni vamakwavo, na byona vutomi bya yena, a nga ka a nga vi mudyondzisiwa wa mina.

²⁷Kutani la nga rhwariki xihambano xa yena, a ndzi landza, a nga ka a nga vi mudyondzisiwa wa mina.

²⁸Hikuva i mani exikarhi ka n'wina, loko a rhandza ku aka xihondzo, a nga ka a nga rhangi a tshamisa a hlaya leswi nga ta humeseriwa xona xi ko xi hela.

²⁹Swingaku loko a akile masungulo, a tsandzeka ku heta, kutani hinkwavo lava nga ta swi vona, va sungula ku n'wi tsan'wa, va ku:

³⁰‘Munhu loyi, u sungurile ku aka, kambe u tsandzekile ku heta.’

³¹Kumbe hosi hi yihi, leyi fambaka ku ya lwa ni yin'wana hosi, xana yi nga ka yi nga rhangi hi ku tshamisa yi endla makungu, yi ta tiva leswaku xana vanhu va yena va dzana ra madzana, va nga ya hlangana ni la taka eka yena ni va madzana mambirhi ya madzana xana?

³²Loko swi nga ri tano, a nga rhuma tintsumi ku ya kombela ku etlela ka tiko, a ha ri kule.

³³Kutani-ke, un'wana ni un'wana exikarhi ka n'wina la nga tshikiki leswi a nga na swona, a nga ka a nga vi mudyondzisiwa wa mina.

³⁴“Munyu i xilo lexi nandzihaka; kambe loko munyu wu phyama, wu nga lungiwa ha yini-ke?

³⁵A wa ha pfuni nchumu, hambi ku ri ku hundzuka misava, hambi ku ri ku endla vulongo; kambe wu cukumetiwa ehandle. La nga ni tindleve ku yingisa, a a yingise.”