Read tsonga Luka 15 Bible Online

Luka 15 - tsonga bible

Luka 15

¹Kutani valuvisi ni vadyohi va tshinelela eka yena ku n'wi yingisa.

²Kambe Vafarisi ni vatsari va hleva ha swona, va ku: “Loyi, u amukela vadyohi, u dya na vona.”

³Kutani a va byela xifaniso lexi, a ku:

⁴“Hi wihi munhu exikarhi ka n'wina, loko a ri ni tinyimpfu ta dzana, loko ku lahleka yin'we ntsena, a nga ka a nga siyi leta ntlhanu wa makume, na mune wa makume, na ntlhanu na mune emananga, a ya lava leyi lahlekeke, u ko a yi kuma?

⁵Kuteloko a yi kumile, a yi teka, a yi rhwala emakatleni, a tsakile.

⁶Kuteloko a fika ekaya, a vita varikwavo, ni lava akeke na yena, a ku eka vona: ‘A hi tsakeni swin'we hikuva ndzi kumile nyimpfu ya mina leyi ngi yi lahlekile.’

⁷Ndzi ri eka n'wina: Ku tsaka ku ta va kona ematilweni hikwalaho ka mudyohi a ri un'we la hundzukaka, ku tlurisa ku tsaka loku nga ta va kona, hikwalaho ka lava lulameke va ntlhanu wa makume, na mune wa makume, na ntlhanu na mune, lava nga faneriki hi ku hundzuka.

⁸“Kumbe wansati hi wihi la nga na khume ra macheleni, kungakuloko a lahlekeriwe hi yin'we ntsena, a nga ka a nga lumeki rivoni, a kukula yindlu, a langutisa a ko a yi kuma.

⁹Kuteloko a yi kumile, a vita varikwavo, ni lava akeke na yena, a ku eka vona: ‘A hi tsakeni swin'we, hikuva ndzi kumile cheleni ya mina, yi ngi yi lahlekile.’

¹⁰Ndzi ri eka n'wina: Hi mukhuva wolowo, ku tsaka ku kona emahlweni ka tintsumi ta Xikwembu, hikwalaho ka mudyohi a ri un'we la hundzukaka.”

¹¹A engeta a ku: “Munhu un'wana a a ri ni vana va va vanuna vambirhi; lowa ndzisana a ku eka tata wa yena:

¹²‘Tatana, ndzi avele xuma lexi nga ta va xa mina.’ Kutani tata wa vona a va avanyisela xuma xa yena.

¹³Kuteloko ku hundzile masiku ma nga ri mangani, n'wana wa yena lowa ndzisana loko a hlengeletile hinkwaswo, a rhurhela etikweni leri nga ekule a hangalasa xuma xa yena hi vusopfa.

¹⁴Loko a dyile hinkwaswo, ku wa ndlala leyikulu etikweni rero, kutani a sungula ku pfumala.

¹⁵Kutani a ya a ya namarhela munhu wa tiko rero; yeloyi a n'wi rhuma enhoveni ku risa tinguluve.

¹⁶Kutani a navela ku xurha hi makamba lama dyiwaka hi tinguluve, kambe a ku nga ri na munhu la n'wi nyikaka.

¹⁷Ku va laha a tiehleketaka, a ku: ‘Malandza layo tala swonghasi ma kona eka tatana, ma ni vuswa lebyo tala; kasi mina halenu, ndza fa hi ndlala.

¹⁸Ndzi ta pfuka, ndzi ya eka tatana, ndzi ta ku eka yena: “Tatana, ndzi dyohele tilo na wena,

¹⁹a swi ndzi faneri ku tshama ndzi vuriwa n'wana wa wena; u ndzi endla kukota un'wana wa malandza ya wena.” ’

²⁰Kwalaho a pfuka, a ya eka tata wa yena. Kakuloko a ha ri ekule, tata wa yena a n'wi vona, a n'wi twela vusiwana; kutani a tsutsuma, a wela enhan'wini ya yena, a n'wi ntswontswa.

²¹Kutani n'wana a ku eka yena: ‘Tatana, ndzi dyohele tilo na wena, a ndzi fanelanga ku tshama ndzi vuriwa n'wana wa wena.’

²²Kambe tata wa yena a ku eka malandza ya yena: ‘Tisani nguvu leyo saseka ngopfu, mi n'wi ambexa yona, mi n'wi nghenisa xingwavila eritihweni, ni tintanghu emilengeni.

²³Tisani rhole leri noneke, mi ri tlhava, hi dya, hi tsaka;

²⁴hikuva n'wana loyi wa mina a a file, kutani u hanyile; a a lahlekile kambe u kumiwile.’ Kutani va sungula ku tsaka.

²⁵“Kambe n'wana wa yena lonkulu a a ri emasin'wini; kuteloko a fikile ekusuhi ni yindlu, a twa ku yimbelela ni ku cina.

²⁶A vita un'wana wa malandza, a n'wi vutisa, a ku: ‘Swi lo yini?’

²⁷Yeloyi a ku eka yena: ‘Ndzisana ya wena yi vuyile, kutani tata wa wena u tlhavile rhole leri noneke hikuva u n'wi vonile a ha hanya.’

²⁸Kambe a kariha, a ala ku nghena. Tata wa yena a huma a n'wi khongotela leswaku a nghena.

²⁹Yena a hlamula a ku eka tata wa yena: ‘Vona, ndzi ku tirhele hi malembe layo tala, ndzi nga tluri ku lerisa ka wena, kambe a ku si ndzi nyika ni ximbutana leswaku ndzi tsaka ni vanakulorhi.

³⁰Kambe n'wana wa wena loyi, la dyeke xuma xa wena hinkwaxo a ri ni tinghwavava, kutani loko a vuya, u n'wi tlhavela rhole leri noneke!’

³¹Kambe tata wa yena a ku eka yena: ‘N'wananga, u tshama na mina hi masiku; hinkwaswo leswi nga swa mina, i swa wena;

³²kambe a hi fanele ku tsaka ni ku tlangela, hikuva makwenu loyi a a file, kambe u hanyile; a a lahlekile, kambe u kumiwile.’ ”