Read tsonga Luka 16 Bible Online

Luka 16 - tsonga bible

Luka 16

¹Yesu a engeta a ku eka vadyondzisiwa wa yena: “Mufuwi a a ri kona loyi ngi a ri ni mulanguteri. Yoloyi a hleviwa emahlweni ka yena, va ku: U hangalasile xuma xa yena.

²Kutani a n'wi vita, a ku eka yena: ‘Timhaka ta wena leti ndzi ti twaka hi tihi? Humesa swa vulanguteri bya wena, hikuva u nga ka u nga ha vi mulanguteri wa swilo swa mina.’

³Mulanguteri yeloyi a anakanya embilwini ya yena, a ku: ‘Ndzi ta endla yini, leswi n'wini wa mina a ndzi tekelaka vulanguteri bya mina? Ndza tsandzeka ku rima, ndzi nga khomiwa hi tingana ku ya kombela!

⁴Ndza swi tiva leswi ndzi nga ta swi endla, leswaku loko ndzi tekeriwile vulanguteri bya mina, vanhu va ndzi amukela etindlwini ta vona.’

⁵Kutani a vitana ha un'we lava ngi va ri ni milandzu eka hosi ya yena, a ku eka lowo rhanga: ‘Nandzu wa wena eka hosi yanga hi wihi?’

⁶Yeloyi a hlamula, a ku: ‘I wa mipimo ya dzana ya mafurha.’ Mulanguteri a ku eka yena: ‘Teka papila ra wena ra nandzu, u tshamisa u hatlisa u tsala rin'wana ra ntlhanu wa makume.’

⁷A ku eka un'wana: ‘Wena-ke, u ni nandzu wungani?’ Yena a ku: ‘Wa mipimo ya dzana ya mavele.’ Kutani a ku eka yena: ‘Teka papila ra wena, u tsala rin'wana ra ntlhanu wa makume, ni makume manharhu.’

⁸Kutani n'wini wa yena a dzunisa mulanguteri lowo biha, hikuva a a endlile hi vutlhari. Hikuva vana va misava leyi, va tlurisa vana va ku vonakala hi vutlhari erixakeni ra vona.

⁹“Na mina ndzi ri eka n'wina: Tiendlelani maxaka hi xuma lexi nga lulamangiki, leswaku loko mi pfumala, va mi amukela emitsongeni leyi nga heriki.

¹⁰La dzunekaka eka leswitsongo, ni ka leswikulu u ta dzuneka; la nga dzunekiki eka leswitsongo, ni ka leswikulu a nga ka a nga dzuneki.

¹¹Sweswi, leswi mi nga dzunekangiki exumeni lexi nga lulamangiki, i mani la nga ta mi tshembela xuma lexinene?

¹²Kutani leswi mi nga dzunekangiki eswilweni swa un'wana, i mani la nga ta mi nyika swa n'wina?

¹³“A ku na nandza la nga swi kotaka ku tirhela vini vambirhi, hikuva kumbe u ta venga un'wana, a rhandza un'wana; kumbe u ta namarhela un'wana, a sandza un'wana; Mi nga hluleka ku tirhela Xikwembu na Mamona.”

¹⁴Vafarisi lava nga ni makwanga, a va yingisa timhaka teto hinkwato, kutani va n'wi tsan'wa.

¹⁵Yena a ku eka vona: “Loko mi ri n'wina, mi tiendla lava lulameke emahlweni ka vanhu; kambe Xikwembu xi tiva timbilu ta n'wina; hikuva leswi tlakukeke emahlweni ka vanhu, i manyala emahlweni ka Xikwembu.

¹⁶“Ku yime nawu ni vaprofeta ku ko ku fika Yohane Mukhuvuri; ka hari mpfhuka wolowo, ku fuma ka Xikwembu ku vuriwa, kutani un'wana ni un'wana a nghena kona hi matimba.

¹⁷“Swi nga olova loko tilo ni misava swi hundza, ku tlurisa loko rito ra nawu, hambi ri ri rin'we, ri nga wela ehansi.

¹⁸“Un'wana ni un'wana la tshikaka nsati wa yena, a teka un'wana, wa oswa; kutani la tekaka la tshikiweke hi nuna wa yena, wa oswa.

¹⁹“Mufuwi a a ri kona la ambaleke nguvu ya xivunguvungu ni ya ntsembyana lowo saseka, la tshameke eku tsakeni hi masiku hinkwawo.

²⁰Xisiwana, na xona, a xi ri kona, vito ra xona a a ri Lazaro, a a tshama enyangweni ya mufuwi, a tele swilondza.

²¹A a navela ku xurha hi mahlanhla lama waka etafuleni ra mufuwi; kambe na tona timbyana ti ri karhi ti ta, ti n'wi nantswa swilondza.

²²Kambe xisiwana xi fa, kutani tintsumi ti n'wi tekela exifuveni xa Abrahama. Mufuwi, na yena, a fa, a lahliwa esirheni.

²³Kakuloko a ri exivandleni xa vafi, a tshama eku vavisekeni, a tlakusa mahlo a ri ekule, a vona Abrahama; Lazaro yena a ri exifuveni xa yena.

²⁴Kutani a huwelela, a ku: ‘Tatana Abrahama, ndzi twele vusiwana, u rhuma Lazaro leswaku a peta xintihwana xa yena ematini, a ndzi tsakamisa ririmi, hikuva malangavi lawa ma ndzi vavisa ku tlurisa.’

²⁵Kambe Abrahama a ku: ‘N'wananga, tsundzuka leswaku u kumile rifuwo evutomini bya wena; kasi Lazaro a a ri eku vavisekeni, kutani sweswi, wa chaveleriwa halenu, kasi wena u twisiwa ku vaviseka.

²⁶Ku hundzisa leswi hinkwaswo, riwa lerikulu ri kona exikarhi ka n'wina na hina, leswaku lava nga halenu, lava rhandzaka ku pelela eka n'wina, va tsandzeka, hambi va ri lava nga eka n'wina, loko va rhandza ku ta eka hina, va tsandzeka na vona.’

²⁷Kutani a ku: ‘Tatana, ndza ku khongela leswaku u rhuma Lazaro endlwini ya tatana,

²⁸hikuva ndzi ni vamakwerhu va ntlhanu; u ta va khongotela leswaku va nga tshuki va ta na vona exivandleni lexi xa ku xaniseka.’

²⁹Abrahama a ku eka yena: ‘Va ni Muxe ni vaprofeta; va nga va yingisa.’

³⁰Mufuwi a ku: ‘E-e, tatana Abrahama, kambe kungakuloko un'wana wa lava feke a ya eka vona, va ta hundzuka.’

³¹Abrahama a engeta a ku eka yena: ‘Loko va nga yingisi Muxe ni vaprofeta, va nga ka va nga pfumeri, hambi un'wana wa vafi a pfuka.’ ”