Read tsonga Luka 21 Bible Online

Luka 21 - tsonga bible

Luka 21

¹Kakuloko Yesu a tlakusa mahlo, a vona vafuwi lava chelaka mihlengo ya vona enkaxeni wa xuma.

²A vona ni wansati wa xisiwana wa noni, a chela swimalana leswi ringanaka fadeni.

³Kutani a ku: “Kunene, ndzi ri eka n'wina, nsati lowa xin'wana, wa noni, u cherile ku tlula hinkwavo;

⁴hikuva hinkwavo lava humeseke nhlengo wa Xikwembu, va tekile eku taleriweni ka vona, kambe loyi, lexi a xi cheleke, u xi tekile evusiwaneni bya yena, swi ri hinkwaswo leswi a hanyaka ha swona.”

⁵Kakuloko van'wana va vula leswaku tempele yi sasekisiwile hi maribye layo saseka, ni mihlengo, a ku:

⁶“Loko xi ri lexi mi xi langutaka, ku ta ta masiku lawa ku nga ta ka ku nga tshikiwi ribye ni rin'we, ehenhla ka ribye rin'wana leri nga mbundzuxiwangiki.”

⁷Kutani va n'wi vutisa, va ku: “Mufundhisi, timhaka leti, ti ta tumbuluka rini? Ni xikombiso xi ta va xihi, leswaku timhaka leti hinkwato ti lava ku humelela?”

⁸Kutani a ku: “Tivoneni leswaku mi nga tshuki mi xisiwa, hikuva lavo tala va ta ta hi vito ra mina, un'wana ni un'wana a ku: ‘Hi mina Kriste; nkarhi wu kusuhi,’ kambe mi nga va landzi.

⁹Siku mi twaka tinyimpi ni madzolonga, mi nga tshuki mi chava, hikuva swilo leswo swi fanele ku humelela eku sunguleni, kambe makumu ma nga ka ma nga hatli ku fika.”

¹⁰A engeta, a ku eka vona: “Tiko rin'wana ri ta pfukela tiko rin'wana matimba, ku fuma kun'wana ku ta lwa ni ku fuma kun'wana.

¹¹Kutani ku tsekatseka lokukulu ka misava ku ta va kona hi matlhelo man'wana; ku ta wa tindlala ni ntungu; swilo leswi chavisaka ngopfu, ni masingita lamakulu swi ta humelela etilweni.

¹²“Kambe eku sunguleni ka leswo hinkwaswo, va ta mi khoma, va mi xanisa, va mi yisa emasinagogeni ni le khotsweni, va mi yisa emahlweni ka tihosi ni vafumi hikwalaho ka vito ra mina;

¹³kambe xi ta va xikombiso xa n'wina.

¹⁴Hikwalaho, nghenisani etimbilwini ta n'wina mhaka leyi, leswaku mi nga tshuki mi vilela hi leswi mi nga ta va hlamula ha swona;

¹⁵hikuva mina ndzi ta mi nyika nomu ni vutlhari lebyi, lava tivekaka valala va n'wina, va nga ta tsandzeka ku byi hlamula ni ku byi kaneta.

¹⁶Mi ta nyiketiwa hi vatswari va n'wina, ni vamakwenu, ni vanakuloni, ni varikwenu; kambe va ta dlaya van'wana va n'wina.

¹⁷Mi ta vengiwa hi vanhu hinkwavo hikwalaho ka vito ra mina.

¹⁸Kambe nsisi ni wun'we wa tinhloko ta n'wina, wu nga ka wu nga lovi.

¹⁹Hlayisani mimoya ya n'wina hi ku tiyisela ka n'wina.

²⁰“Kambe, kutakuloko mi vona Yerusalema a rhendzeriwe hi mavandla, mi ta tiva leswaku ku onhaka ka wona ku kusuhi.

²¹Hi siku lero, lava nga eYudiya, a va chavele etintshaveni; lava nga eYerusalema, a va hume kona; kutani lava nga emasin'wini, va nga tshuki va nghena emutini.

²²Hikuva masiku walawo, i masiku ya ku rihisa, leswaku hinkwaswo leswi tsariweke swi hetiseka.

²³Va ta va ni khombo lava nga ta va ni nyimba, ni lava an'wisaka emikarhini yoleyo, hikuva khombo ri ta va lerikulu emisaveni, ni ku kariha ku ta wela tiko leri.

²⁴Va ta wa hi ku kariha ka fumu, va ta yisiwa va ri makhumbi ematikweni hinkwawo; kutani Yerusalema, u ta kandziyeriwa hi vamatiko ku ko ku hela nkarhi wa vamatiko.

²⁵“Masingita ma ta va kona edyambyini, ni le n'wetini, ni le tinyeletini, ni la emisaveni, vamatiko va ta xaniseka, va kanakana hikwalaho ka ku pfuma ka lwandle ni magandlati.

²⁶Vanhu va ta hela matimba hi ku chava, ni ku langutela leswi nga ta tala emisaveni, hikuva matimba ya matilo ma ta tsekatseka.

²⁷Hilaha va nga ta vona N'wana wa Munhu a ta epapeni hi matimba lamakulu, ni ku vonakala lokukulu.

²⁸Kutakuloko swilo leswo swi sungula ku humelela, ololokani mi yimisa tinhloko, hikuva ku kutsuriwa ka n'wina ku ta va kusuhi.”

²⁹Kutani a va byela xifaniso, a ku: “Vonani nkuwa ni mirhi hinkwayo;

³⁰loko yi sungule ku hluka, ma tiva, na n'wina, leswaku ximumu xi tshinele.

³¹Na swona, loko mi vona swilo leswi swi humelela, mi ta tiva leswaku ku fuma ka Xikwembu ku kusuhi.

³²Kunene, ndzi ri eka n'wina: Rixaka leri, ri nga ka ri nga hundzi leswo hinkwaswo swi nga si humelela.

³³Tilo ni misava swi ta hundza, kambe marito ya mina ma nga ka ma nga hundzi.

³⁴“Kambe tivoneni leswaku timbilu ta n'wina ti nga tshuki ti tikeriwa hi madyo, ni ku pyopya, ni ku vilela hi swa vutomi lebyi, kutani siku lero ri mi khoma hi xipuku;

³⁵hikuva ri ta wela hinkwavo lava akeke emisaveni kukota xirimbana.

³⁶Hitekani-ke, mi khongela hi mikarhi hinkwayo, leswaku mi ta tiva ku pona eka swilo hinkwaswo leswi nga ta humelela ni ku yima emahlweni ka N'wana wa Munhu.”

³⁷Ninhlekanhi a a tshama a dyondzisa etempeleni, kambe nimadyambu, a huma, a ya tshamisa nivusiku entshaveni leyi vuriwaka ya Mitlhwari.

³⁸Kutani ka ha ri mixo, vanhu hinkwavo a va ta eka yena etempeleni ku n'wi yingisa.