Read tsonga Luka 3 Bible Online

Luka 3 - tsonga bible

Luka 3

¹Hi lembe ra khume na ntlhanu ra ku fuma ka Tiberiyo Khezari, loko Pontiyo Pilato a fuma Yudiya, Heroda yena a ri hosi ya Galeliya, Filipi makwavo, a ri hosi ya Ituriya ni ya tiko ra Trakonita, Lisaniya a ri hosi ya Abilene,

²loko Anasi a ri muprista lonkulu na Kayafasi, rito ra Xikwembu ri fika eka Yohane, n'wana Zakariya, emananga.

³Kutani a suka a ya etikweni hinkwaro leri nga ematlhelweni ya Yordani, a ri karhi a dyondzisa timhaka ta ku khuvuriwa ka ku hundzuka, leswaku vanhu va rivaleriwa swidyoho swa vona,

⁴hilaha ku nga tsariwa ebukwini ya marito ya muprofeta Esaya, a nga te: “Rito ra la huwelelaka emananga ri ku: Khulelani ndlela ya Hosi, mi lunghisa mitila ya yona.

⁵Mikova yi ta gandleteriwa, ni tintshava hinkwato ni switsunga swi ta hindzimuxiwa; leswi hombolokeke swi ta lulamisiwa ni tindlela ta mikovakova ti ta khuleriwa;

⁶kutani nyama hinkwayo yi ta vona ku hlayiseka ka Xikwembu.”

⁷Kutani a byela mitshungu leyi taka ku khuvuriwa hi yena a ku: “Rixaka ra timhiri, mi tshuketiwe hi mani ku chava vukari lebyi taka?

⁸Loko swi ri tano-ke, vekani mihandzu leyi kombisaka ku tisola ka n'wina; mi nga tshuki mi anakanya, mi ku: ‘Hi na tatana, a nga Abrahama’; hikuva ndzi ri eka n'wina: Xikwembu xi nga pfuxela Abrahama vana hi maribye lawa.

⁹Ni sweswi xihloka xi vekiwile etimitswini ta mirhi; murhi wun'wana ni wun'wana lowu nga vekiki mihandzu leyinene, wu ta tsemiwa wu hoxiwa endzilweni.”

¹⁰Kutani vunyingi byi n'wi vutisa, byi ku: “Loko swi ri tano, hi ta endla yini xana?”

¹¹A hlamula a ku eka vona: “La nga ni tinguvu timbirhi a a avele la pfumalaka; ni la nga ni swakudya a a endlise sweswo na yena.”

¹²Valuvisi na vona, va ta eku khuvuriweni, va ku eka yena: “Mufundhisi, hi ta endla yini xana?”

¹³A ku eka vona: “Mi nga tshuki mi rihisa ku tlurisa leswi mi swi lerisiweke.”

¹⁴Masocha na wona ma n'wi vutisa ma ku: “Na hina, hi ta endla yini?” A ku eka vona: “Mi nga tshuki mi endla vanhu hi matimba, ni loko ku ri ku va xisa, kambe mi khensa hakelo ya n'wina.”

¹⁵Kambe vanhu a va tshama va langutela, kutani hinkwavo va anakanya etimbilwini ta vona leswaku kumbe Yohane hi yena Kriste.

¹⁶Yohane a va hlamula hinkwavo, a ku: “Mina ndzi mi khuvula hi mati ntsena, kambe un'wana wa ta, la ndzi tlulaka hi matimba, loyi ndzi nga lulameriki ku tshunxa tinghole ta tintanghu ta yena; hi yena la nga ta mi khuvula hi moya lowo kwetsima ni ndzilo.

¹⁷Rihlelo ra yena ri le vokweni ra yena, u ta kukula xivuya xa yena hakunene, u ta hlengeleta mavele enguleni ya yena; kambe mungu u ta wu hisa endzilweni lowu nga timekiki.”

¹⁸Kutani a tshama a va khongotela hi timhaka tin'wana leto tala, a ri karhi a byela vanhu ta Evhangeli.

¹⁹Kambe, kuteloko hosi Heroda a tshinyiwe hi Yohane etimhakeni ta Herodiya, nsati wa Filipi makwavo, ni hikwalaho ka hinkwaswo leswo biha leswi a swi endleke,

²⁰a engetela hinkwato leto, hi ku nghenisa Yohane ekhotsweni.

²¹Kakuloko vanhu va khuvuriwa, na yena Yesu, a khuvuriwa; kambe loko a a ri karhi a khongela, matilo ma pfuleka,

²²kutani Moya lowo Kwetsima wu xikela ehenhla ka yena wu fana ni tuva hi xivumbeko lexi vonakalaka: kutani rito ri huma etilweni, ri ku: “U N'wana wa mina la rhandziwaka, loyi ndzi tsakisiwaka ha yena.”

²³Yesu a a lave ku va ni makume manharhu ya malembe loko a sungula ku dyondzisa, kutani hi ku ringanisa ka vanhu, a a ri n'wana wa Yosefa, wa Heli;

²⁴wa Matati, wa Levhi, wa Melki, wa Yanayi, wa Yosefa;

²⁵wa Matatiya, wa Amosi, wa Nahume, wa Esli, wa Nagayi;

²⁶wa Mate, wa Matatiya, wa Semeyini, wa Yosefa, wa Yoda;

²⁷wa Yohana, wa Resa, wa Zerubabele, wa Salatiele, wa Neri;

²⁸wa Melki, wa Adi, wa Kosama, wa Elmadema, wa Ere;

²⁹wa Yoxuwa, wa Eliezere, wa Yorimi, wa Matati, wa Levhi;

³⁰wa Simiyoni, wa Yuda, wa Yosefa, wa Yonama, wa Eliyakimi;

³¹wa Meleya, wa Mena, wa Matata, wa Natani, wa Davhida;

³²wa Yese, wa Obede, wa Bowazi, wa Sala, wa Nasoni;

³³wa Aminadaba, wa Arni, wa Esromo, wa Faresi, wa Yuda,

³⁴wa Yakobo, wa Isaka, wa Abrahama, wa Tera, wa Nahoro;

³⁵wa Serugi, wa Rhewu, wa Pelege, wa Ebere, wa Sala;

³⁶wa Kayinana, wa Arifakisada, wa Seme, wa Nowa, wa Lameke;

³⁷wa Metuxela, wa Enoko, wa Yarede, wa Maleleyeli, wa Kayinana;

³⁸wa Enosi, wa Seta, wa Adamu, wa Xikwembu.