Read tsonga Luka 4 Bible Online

Luka 4 - tsonga bible

Luka 4

¹Kambe Yesu, loko a tele hi Moya lowo Kwetsima, a suka eYordani, a yisiwa hi Moya emananga.

²Kutani a ringiwa kona hi Diyavulosi hi masiku ya mune wa makume, a nga dyi nchumu hi masiku walawo; kambe, eku heleni ka wona, a twa ndlala.

³Kwalaho Diyavulosi a ku eka yena: “Loko u ri N'wana wa Xikwembu, u nge ribye leri ri hundzuka vuswa.”

⁴Yesu a n'wi hlamula, a ku: “Ku tsariwile leswaku munhu a nga ka a nga hanyi hi vuswa ntsena, kambe u ta hanya hi marito hinkwawo ya Xikwembu.”

⁵Kutani Diyavulosi a n'wi yisa entshaveni leyo leha, a n'wi kombisa kan'we ku fuma hinkwako ka misava, kutani a ku eka yena:

⁶“Ndzi ta ku nyika vuhosi hinkwabyo, ni ku kwetsima ka ku fuma loku, hikuva ndzi swi nyikiwile, kambe ndzi swi nyika loyi ndzi n'wi rhandzaka.

⁷Kutani sweswi, loko u ndzi khinsamela, hinkwaswo leswo swi ta va swa wena.”

⁸Yesu a n'wi hlamula, a ku: “Suka eka mina Satana, hikuva ku tsariwile leswaku: ‘U ta khinsamela Hosi, Xikwembu xa wena, u tirhela xona ntsena.’ ”

⁹Kutani Diyavulosi a n'wi yisa eYerusalema, a n'wi veka exihlungweni xa tempele, kutani a ku eka yena: “Loko u ri N'wana wa Xikwembu, jitama ehansi;

¹⁰hikuva ku tsariwile leswaku: ‘Xikwembu xi ta ku lerisela tintsumi ta xona, ti ku hlayisa, ti ku khavutela emavokweni ya tona,

¹¹leswaku nenge wa wena wu nga tshuki wu khunguvanyeka hi ribye.’ ”

¹²Yesu a n'wi hlamula, a ku: “Ku tsariwile leswaku: ‘U nga tshuki u ringa Hosi, Xikwembu xa wena.’ ”

¹³Diyavulosi, kuteloko a hetile ndzingo hinkwawo, a n'wi tshika, nkarhi wun'wana wu kondza wu fika.

¹⁴Yesu a tlhelela eGaleliya hi matimba ya Moya; kutani ku twakala ka yena ku tiviwa ematlhelo hinkwawo ya tiko lero.

¹⁵Kutani a dyondzisa emasinagogeni ya vona, a ri karhi a dzunisiwa hi vanhu hinkwavo.

¹⁶A ya ni le Nazareta, laha a nga kulela kona; kutani hi siku ra Savata, a nghena esinagogeni hi mukhuva wa yena, kutani a yimela ku hlaya.

¹⁷A nyikiwa buku ya muprofeta Esaya; kuteloko a phurumule buku, a kuma mhaka leyi tsariweke, leyi nge:

¹⁸“Moya wa Xikwembu wu le ka mina, hikuva xi ndzi totile, xi va xi ndzi rhuma ku byela swisiwana Evhangeli, ku horisa va timbilu leti vavisekaka;

¹⁹ku byela lava bohiweke leswaku va ta tshunxiwa ni lavo fa mahlo leswaku va ta tlhela va vona, ku nyika lava xanisiwaka nkarhi wa ku tifambela, ni ku vula lembe lerinene ra Hosi.”

²⁰Kuteloko a phutsile buku, a yi nyika nandza a tshamisa; kutani hinkwavo lava nga esinagogeni va n'wi langutisisa.

²¹Kavaloko a sungula ku va byela, a ku: “Namuntlha, rito leri ri hetisekile etindleveni ta n'wina.”

²²Kutani hinkwavo va n'wi yimela, va ri karhi va hlamala hi marito lamanene lama humaka enon'wini wa yena, va ku: “Xana loyi a hi n'wana Yosefa xana?”

²³A ku eka vona: “Kunene mi nga ndzi byela xivuriso lexi nge: ‘N'anga, tihanyise u ri wena; leswi hi swi tweke swi endliwe hi wena eKapernawume, u swi endla ni kwala, etikweni ra wena.’ ”

²⁴Kambe a ku: “Kunene, ndzi ri eka n'wina: A ku na muprofeta la amukeriwaka etikweni ra rikwavo.

²⁵Kunenenene ndzi ri eka n'wina: Vavasati va tinoni lavo tala a va ri kona etikweni ra Israele, emikarhini ya Eliya, loko tilo ri pfariwa hi malembe manharhu na ntlhanu wa tin'hweti ni n'hweti yin'we, kutani ndlala leyikulu yi va kona emisaveni hinkwayo;

²⁶kambe Eliya a nga rhumiwanga eka un'wana loko ku nga ri eka wansati wa noni wa Sarepta, etikweni ra Sidoni.

²⁷Ni va nhlokonho lavo tala a va ri kona etikweni ra Israele, emikarhini ya muprofeta Elixa, kambe a ku vanga na la basisiweke loko a nga ri Naamani wa Siriya.”

²⁸Kutani lava nga esinagogeni va tala vukari hinkwavo, loko va twa timhaka teto.

²⁹Va yima, va n'wi hlongolela ehandle ka muti, va n'wi yisa eriweni ra ntshava leyi muti wa vona ingi wu akiwe henhla ka yona, ku n'wi susumetela kona.

³⁰Kambe yena a hundza exikarhi ka vona, a tifambela.

³¹Kutani a ngirimela eKapernawume muti wa Galeliya; kavaloko a dyondzisa vanhu hi masiku ya Savata.

³²Kutani va hlamala hi ku dyondzisa ka yena, hikuva rito ra yena a ri ri ni matimba.

³³Munhu a a ri kona esinagogeni loyi ngi a ri ni moya wa thyaka, wa demona, a huwelela hi rito lerikulu,

³⁴a ku: “Mhaka ya hina na wena hi yihi, Yesu wa Nazareta? Xana u tele ku hi lovisa?

³⁵Ndza ku tiva, u Muhlawuriwa wa Xikwembu.” Kutani Yesu a n'wi tshinya, a ku: “Miyela, u suka eka yena.” Kuteloko demona ri n'wi wisile exikarhi ka hinkwavo, ri huma eka yena, ri nga n'wi endlanga nchumu.

³⁶Kutani va hlamala hinkwavo, va vutisana, va ku: “Rito leri, hi lero yini, loko a tshinya mimoya leyo biha hi vuhosi ni matimba, kutani yi huma?”

³⁷Kwalaho xidzumo xa yena xi twakala hi matlhelo hinkwawo ya tiko lero.

³⁸Kutani a huma esinagogeni, a nghena endlwini ya Simoni; kambe mukon'wana wa Simoni a a khomiwe hi vuvabyi lebyikulu hi ku hisa ka miri, kutani va n'wi khongelela eka yena.

³⁹Kavaloko Yesu a korhama ehenhla ka yena, a tshinya vuvabyi, kutani byi n'wi tshika, a hatlisa a pfuka a va tirhela.

⁴⁰Loko dyambu ri perile, hinkwavo lava vabyaka hi vuvabyi byihi ni byihi, a va tisiwa eka yena, kutani a tlhandleka mavoko ya yena ehenhla ka un'wana ni un'wana, a va horisa.

⁴¹Mademona ma huma eka lavo tala, ma huwelela, ma ku: “Hi wena Kriste, N'wana Xikwembu.” Kambe Yesu a ma tshinya, a nga ma pfumeleri ku vula leswaku ma n'wi tiva, leswaku hi yena Kriste.

⁴²Kuteloko ri xile, a huma, a ya emananga, kutani vunyingi byi n'wi lava; loko va n'wi kumile va n'wi sivela leswaku a nga suki eka vona.

⁴³Kambe a ku eka vona: “Ndzi fanele ku ya vula emitini yin'wana e Evhangeli ya ku fuma ka Xikwembu, hikuva ndzi rhumeriwe swona.”

⁴⁴Kutani a dyondzisa emasinagogeni ya Galeliya.