Read tsonga Luka 7 Bible Online

Luka 7 - tsonga bible

Luka 7

¹Kuteloko Yesu a hetile ku vulavula timhaka ta yena hinkwato emahlweni ka ntshungu, a nghena eKapernawume.

²Ndhuna ya nyimpi ya dzana a yi ri ni nandza loyi yi n'wi rhandzaka ngopfu, a vabya, a ri ekusuhi ni ku fa.

³Kakuloko yi twa timhaka ta Yesu, yi rhuma Vayuda van'wana lavakulu eka yena, va n'wi khongotela, leswaku a ta horisa nandza wa yona.

⁴Loko va fika eka Yesu, va n'wi khongela ngopfu, va ku: “U fanele ku endleriwa sweswo,

⁵hikuva u rhandza tiko ra hina, nakambe u hi akele sinagoga.”

⁶Kutani Yesu a famba na vona. Kuteloko a ri ekusuhi ni yindlu, ndhuna yi rhuma maxaka eka yena ku n'wi byela, va ku: “Hosi, u nga tikarhati, hikuva a ndzi faneri leswaku u nghena endlwini ya mina.

⁷Hikuva ndzi tiringanisile la nga faneriki ku ya eka wena, kambe vula rito, nandza wa mina u ta hanya.

⁸Hikuva mina ndzi munhu la fumiwaka hi van'wana na swona ndzi fuma vanhu; ndzi ri eka un'wana ‘Famba,’ kutani a famba; eka un'wana: ‘Tana,’ kutani a ta; eka nandza wa mina: ‘Endla leswo karhi,’ kutani a swi endla.”

⁹Loko Yesu a yingisa timhaka teto, a hlamala, kutani a hundzulukela eka ntshungu lowu n'wi landzaka, a ku: “Ndza mi byela leswaku a ndzi si vona ku pfumela lokunghasi, ni le Israeleni.”

¹⁰Sweswi lava rhumiweke, loko va tlhelela ekaya, va kuma nandza la vabyaka a hanyile.

¹¹Hi siku leri tlhandlamaka, Yesu a endzela emutini lowu va nge i Nayini. Vadyondzisiwa va yena lavo talanyana ni ntshungu lowukulu va famba na yena.

¹²Kakuloko a tshinela ekusuhi ni nyangwa ya muti, maswivo, ku rhwariwa mufi, n'wana a ri swakwe eka mana wa yena la nga noni; vanhu lavo tala va muti a va n'wi landza.

¹³Kuteloko Hosi yi n'wi vona, yi n'wi twela vusiwana, yi ku eka yena: “U nga rili.”

¹⁴Kavaloko a tshinela, a khumba vuhlaka; kutani lava n'wi rhwaleke va yima. Kutani a ku: “Jaha, ndza ku byela, ndzi ri: Pfuka.”

¹⁵Kutani mufi a yima, a sungula ku vulavula, Yesu a n'wi nyika mana wa yena.

¹⁶Kutani va khomiwa hinkwavo hi ku chava, va dzunisa Xikwembu, va ku: “Muprofeta lonkulu u humelele exikarhi ka hina, Xikwembu xi endzele tiko ra xona.”

¹⁷Kutani mhaka leyi, yi twakala hinkwako eYudiya, ni le tikweni hinkwaro ra matlhelo.

¹⁸Timhaka ta Yesu hinkwato ti byeriwa Yohane hi vadyondzisiwa va yena.

¹⁹Kutani Yohane a vita vadyondzisiwa va yena vambirhi, a va rhuma eka Yesu, a ku: “Xana hi wena la fanekeleke ku ta, kumbe ha ha langutela un'wana?”

²⁰Vanhu lava kuteloko va fikile eka yena, va ku: “Yohane Mukhuvuri u hi rhumile eka wena, a ku: ‘Xana hi wena la fanekeleke ku ta, kumbe ha ha langutela un'wana?’ ”

²¹Enkarhini wolowo, Yesu a hanyisa lavo tala emavabyini ya vona, ni le mimoyeni ya vona, ni lavo tala lava feke mahlo, a va nyika ku vona.

²²Kutani Yesu a va hlamula, a ku eka vona: “Fambani mi ya tivisa Yohane leswi mi swi voneke ni leswi mi swi tweke; hikuva vo fa mahlo va vona, swigono swi famba, va nhlokonho va basisiwa, lavo fa tindleve va twa, vafi va pfuka, Evhangeli yi byeriwa swisiwana.

²³Kambe ku katekile la nga tiki khunguvanyeka hikwalaho ka mina.”

²⁴Lava rhumiweke hi Yohane, kuteloko va sukile, Yesu a sungula ku vulavula ta Yohane eka vanhu, a ku: “A mi ya vona yini emananga? Xana a ri ri rihlanga leri tsekatsekisiwaka hi mheho xana?

²⁵Kambe a mi ya vona yini? Xana a a ri munhu la ambaleke tinguvu leto saseka? Vonani, lava ambalaka tinguvu ta vubombi ni lava dyaka leswo nandziha va le tindlwini ta tihosi.

²⁶Kambe a mi ya vona yini? Xana a a ri muprofeta xana? Ina, ndzi vurisa sweswo eka n'wina, ni la tlulaka muprofeta.

²⁷Hi yena loyi ku nga tsariwa timhaka ta yena loko va te: ‘Vona, ndzi rhuma ntsumi ya mina emahlweni ka mombo wa wena; yi ta ku lunghisela tindlela.’

²⁸Hikuva ndzi ri eka n'wina: Exikarhi ka lava tswariweke hi vavasati, a ku na muprofeta la tlulaka Yohane; kambe lontsongo eku fumeni ka Xikwembu, u n'wi tlula hi vukulu.”

²⁹Hinkwavo lava nga n'wi yingisa, ni valuvisi lava nga khuvuriwa hi ku khuvula ka Yohane va dzunisile ku lulama ka Xikwembu;

³⁰kambe Vafarisi ni vadyondzisi va nawu va tionhele makungu ya Xikwembu, hikuva a va khuvuriwanga hi yena.

³¹Hosi yi engeta, yi ku: “Vanhu va rixaka leri, ndzi ta va fanisa na yini? Va fana na yini-ke?

³²Va fana ni swihlangi leswi tshamaka entsendzeleni, swi huwelelana, swi ku: ‘Hi mi yimbele nanga, kambe a mi cinanga; hi mi yimbele mahlomulo, kambe a mi rilanga.’

³³Hikuva Yohane Mukhuvuri u tile, a nga dyi vuswa, a nga nwi vhinyo, kambe mi ku: ‘U ni rihuhu.’

³⁴N'wana wa Munhu, yena u tile, a dya, a nwa, kutani mi ku: ‘Vonani mudyi ni munwi, nakulobye wa valuvisi ni wa vadyohi.’

³⁵Kambe vutlhari byi khanisiwile hi vana va byona hinkwavo.”

³⁶Mufarisi un'wana a n'wi kombela ku ta ta dya na yena. Kutani Yesu a nghena endlwini ya mufarisi, a tshama eswakudyeni.

³⁷Kutani wansati wa muti, wa xidyohi, kakuloko a twa leswaku u tshame eswakudyeni endlwini ya Mufarisi, a tisa ximbitana xa alabastera lexi teleke mafurha layo nun'hwela.

³⁸Kutani a khinsama endzhaku ka yena, emilengeni ya yena, a ri karhi a rila, a sungula ku n'wi tsakamisa milenge hi mihloti ya yena, a tlhela a hlangula hi misisi ya nhloko ya yena, a n'wi ntswontswa milenge, a yi tota hi mafurha.

³⁹Mufarisi la nga n'wi vita, kakuloko a vona sweswo, a ehleketa embilwini ya yena, a ku: “Munhu loyi, loko ngi a ri muprofeta, ingi a tivile nsati loyi a n'wi khumbaka, leswaku i mani, ni leswaku i munhu wihi, hikuva i xidyohi.”

⁴⁰Yesu a n'wi hlamula, a ku eka yena: “Simoni, ndzi ni lexi ndzi nga ta ku byela xona,” yena a ku: “Vulavula, mufundhisi.”

⁴¹“A ku ri ni mufuwi loyi vanhu vambirhi ingi va ri ni nandzu eka yena. Un'wana a a ri ni nandzu wa macheleni ya ntlhanu wa madzana, un'wana wa ntlhanu wa makume.

⁴²Kakuloko va pfumala lexi va nga ta riha ha xona, a va tshikela havambirhi. Wa nga ndzi byela, xana hi wihi exikarhi ka vona la nga ta n'wi rhandza ngopfu-ke?”

⁴³Simoni a hlamula, a ku: “Hi la nga tshikeriwa leswo tala.” Yesu a ku eka yena: “U vula swona.”

⁴⁴Kutani a rhendzelekela ka wansati, a ku eka Simoni: “Nsati loyi, wa n'wi vona-ke? Ndzi nghene endlwini ya wena, a ku ndzi hanga mati ndzi hlamba milenge; yena u tsakamisile milenge yanga hi minyembeti, a hlangula hi misisi ya nhloko yakwe.

⁴⁵A ku ndzi ntswontswanga; loyi, ka ha ri mpfhuka ndzi nghena, a nga tshikanga ku ndzi ntswontswa milenge.

⁴⁶A ku ndzi totanga nhloko hi mafurha; loyi u totile milenge ya mina hi mafurha.

⁴⁷Hikwalaho ndzi ri eka wena; swidyoho swa yena leswo tala swi rivaleriwile, hikuva u rhandzile ngopfu; kambe la nga tshikeriwa lexitsongo u rhandza kutsongo.”

⁴⁸Kutani a ku eka wansati: “U rivaleriwile swidyoho swa wena.”

⁴⁹Lava tshameke eswakudyeni na yena, va sungula ku vilela etimbilwini ta vona, va ku: “Loyi i mani la rivalelaka vanhu swidyoho?”

⁵⁰Kambe Yesu a ku eka wansati: “Ku pfumela ka wena ku ku hanyisile, famba hi ku rhula.”