Read tsonga Luka 8 Bible Online

Luka 8 - tsonga bible

Luka 8

¹Endzhaku ka swona, Yesu a famba hi miti ni swimitana a ri karhi a dyondzisa, a vula Evhangeli ya ku fuma ka Xikwembu; na vona lava khume na vambirhi a va ri na yena,

²swin'we ni vavasati van'wana lava horisiweke mimoya leyo biha ni vuvabyi; a a ri Mariya, la vuriwaka wa Magadala, loyi mademona ya ntlhanu na mambirhi ma humeke eka yena,

³na Yohana, nsati wa Khuza, ndhuna ya Heroda, na Suzana, ni van'wana lavo tala lava n'wi tirheleke hi leswi ngi va ri na swona.

⁴Kakuloko vunyingi lebyikulu byi hlengeletanile eka yena, swin'we ni vanhu lava humaka emitini yin'wana ni yin'wana, a vulavula na vona hi xifaniso, a ku:

⁵“Muhaxi u humile ku ya haxa mbewu; kakuloko a haxa, timbewu tin'wana ti wela endleleni, ti kandziyiwa hi vanhu, kutani tinyanyana ta le henhla ti dya hinkwato.

⁶Tin'wana ti wela emaribyeni, kutani loko ti mila, ti vuna, hikuva ti pfumale ndzhongo.

⁷Tin'wana ti wela emitweni, kutani mitwa yi mila swin'we na tona, yi ti hungela, ti fa.

⁸Kambe tin'wana ti wela emisaveni leyinene; kuteloko ti mirile ti veka ka dzana.” Kakuloko a vurile sweswo a huwelela, a ku: “La nga ni tindleve ku yingisa, a a yingise.”

⁹Kutani vadyondzisiwa va yena va n'wi vutisa xifaniso lexi, leswaku xi ri yini.

¹⁰Yena a ku: “N'wina mi nyikiwile ku tiva swihundla swa ku fuma ka Xikwembu, kambe van'wana va swi twa hi swifaniso, leswaku hambi va vona, va nga vonisisi, hambi va twa, va nga twisisi.

¹¹Kambe xifaniso lexi hileswaku: Timbewu, i rito ra Xikwembu.

¹²Lava nga endleleni, hi lava yingisaka; endzhaku, Diyavulosi a ta, a teka rito etimbilwini ta vona leswaku va nga tshuki va pfumela, va hlayiseka.

¹³Lava nga haxiwa emaribyeni, hi lava ingi loko va yingisile va amukela rito hi ku tsaka, kambe va pfumala timitsu, va pfumela hi nkarhi wun'wana ntsena; siku ra ndzingo, loko ri fika va tshika.

¹⁴Leswi weleke emitweni, hi lava yingiseke rito, kambe va famba, va ri tshika ri funengetiwa hi ku vilela, ni ku rhandza ku fuwa, ni ku titsakela ka vutomi lebyi, kutani va nga ha veki mihandzu leyi vupfaka.

¹⁵Leswi nga wela emisaveni leyinene, hi lava yingisaka rito, va ri hlayisa etimbilwini leto lulama, letinene, kutani va veka mihandzu hi ku tiyisela.

¹⁶“A ku na munhu loyi, kungate loko a lumekile rivoni, a ri funengeta hi mbita, kumbe a ri veka ehansi ka mubedo; kambe a ri tlhoma ekandelarini, leswaku lava nghenaka, va vona ku vonakala.

¹⁷Hikuva a ku na xilo lexi nga exihundleni, lexi nga tiki tiviwa ni ku humelela erivaleni.

¹⁸Hikwalaho, tivoneni hilaha mi yingisaka hakona; hikuva ku ta nyikiwa la nga ni xilo; kambe la pfumalaka, u ta tekeriwa na xona lexi a xi tshembaka leswaku u na xona.”

¹⁹Mana wa Yesu ni vamakwavo va ta eka yena, kambe va hluleka ku n'wi tshinelela hikwalaho ka vunyingi.

²⁰Kutani van'wana va n'wi tivisa, va ku: “Mana wa wena ni vamakwenu va yime ehandle, va rhandza ku ku vona.”

²¹Kambe a hlamula, a ku eka vona: “Manana, ni vamakwerhu hi lava yingisaka rito ra Xikwembu, va va va endla hakona.”

²²Hi siku rin'wana, a nghena ebyatsweni ni vadyondzisiwa va yena, kutani a ku eka vona: “A hi peleleni hase, entsungeni.” Kutani va suka.

²³Va ko va ha famba, a tietlelela; kutani xihuhuri xi va pfukela etiveni byatso byi ko byi tala hi mati, kutani a va ri ekhombyeni.

²⁴Kutani va tshinelela, va n'wi pfuxa evurhongweni, va ku: “N'wini, n'wini, ha lova!” Kutani a pfuka, a yima, a tshinya moya ni magandlati, kutani swi miyela, ku rhula ku va kona.

²⁵Kutani a ku eka vona: “Ku pfumela ka n'wina ku kwihi?” Vona va chava, va hlamala, va byelana, va ku: “Loyi i mani la tshinyaka moya ni lwandle, swi va swi n'wi yingisa?”

²⁶Kutani va fika etikweni ra Vagadara leri langutaneke na Galeliya.

²⁷Kakuloko Yesu a xikela eribuwini, a hlangana ni wanuna un'wana wa muti, la ngheniweke khale hi mademona, a nga funengelanga nguvu, a nga tshami endlwini, kambe a tshama emasirheni.

²⁸Kuteloko a vonile Yesu, a huwelela, a tiwisela emahlweni ka yena, a huwelela hi rito lerikulu, a ku: “U ni mhaka yihi na mina, Yesu, N'wana wa Xikwembu lexi nge henhlahenhla? Ndza ku khongela, u nga ndzi xanisi.”

²⁹Hikuva Yesu a a lerise moya lowo biha ku huma emunhwini loyi; hikuva a ku ri khale wu n'wi xanisa; a tshama a bohiwa hi timpecana ni khotso, kambe yena a tshova swona, a susumeteriwa emananga hi rihuhu.

³⁰Yesu a n'wi vutisa, a ku: “Vito ra wena u mani?” A ku: “Ndzi Vandla.” Hikuva mademona layo tala a ma nghenile eka yena.

³¹Kutani ma n'wi khongela leswaku a nga tshuki a ma lerisa ku ya ekheleni.

³²Ntlhambi lowukulu wa tinguluve a wu ri kona entshaveni, wu dya. Kutani mademona ma n'wi khongela leswaku a ma pfumelela ku nghena eka wona, kutani a ma pfumelela.

³³Kavaloko mademona ma huma emunhwini yeloyi, ma nghena etingulubyeni kutani ntlhambi wu tsutsuma wu ya tihoxa exidziveni xa lwandle, wu nwela kona.

³⁴Varisi va wona, kuteloko va vona leswi humeleleke, va tsutsuma, va ya amba mhaka leyi emutini ni le tikweni.

³⁵Kutani vanhu va huma, va ya vona leswi humeleleke. Kuteloko va fika eka Yesu, va kuma munhu loyi mademona ma nga huma eka yena, a tshamisile emilengeni ya Yesu, a ambele, a ri munhu; kutani va chava ngopfu.

³⁶Lava voneke timhaka leti, va va byela hilaha munhu loyi wa rihuhu a hanyisiweke hakona.

³⁷Kutani vanhu hinkwavo va matlhelo ya tiko ra Vagadara, va khongela Yesu leswaku a suka eka vona, hikuva a va khomiwile hi ku chava lokukulu. Kutani Yesu a nghena ebarikeni, a tlhela.

³⁸Kutani munhu loyi, mademona ma humeke eka yena, a n'wi khongela leswaku a n'wi pfumelela ku famba na yena, kambe Yesu a n'wi tlherisa, a ku:

³⁹“Tlhelela eka rikwenu, u ya vula leswikulu leswi Xikwembu xi ku endleleke swona.” Kutani a ya byela va muti hinkwavo leswi a swi endleriweke hi Yesu.

⁴⁰Kuteloko Yesu a tlherile, a amukeriwa hi vunyingi, hikuva a va n'wi langutela hinkwavo.

⁴¹Kutani ku ta wanuna la vuriwaka Yayiro, la nga hosi ya sinagoga; a wa emilengeni ya Yesu, a n'wi khongela leswaku a nghena endlwini ya yena;

⁴²hikuva a a ri ni wanhwanyana a ri un'we, loyi malembe ya yena ma lavaka ku endla khume na mambirhi, a lava ku fa.

⁴³Kakuloko Yesu a ya kona, a kamanyetiwa hi ntshungu. Kutani wansati loyi ingi a ri ni vuvabyi bya switlhandla, a vabyile malembe ya khume na mambirhi, a hetile mali ya yena hinkwayo hi tin'anga, kambe a ku vanga na yin'we leyi nga n'wi hanyisa,

⁴⁴a tshinelela Yesu hi le ndzhaku, a khumba makumu ya nguvu ya yena, kutani vuvabyi bya yena byi siveka kan'we.

⁴⁵Yesu a ku: “Ndzi khumbiwile hi mani?” Kakuloko va kaneta hinkwavo, Petro ni lava ngi a ri na vona, va ku: “N'wini, vunyingi bya ku kamanyeta, byi ku rhendzele.”

⁴⁶Kambe Yesu a ku: “Munhu u ndzi khumbile hikuva ndzi twile leswaku matimba ma hume eka mina.”

⁴⁷Kuteloko wansati loyi a vona leswaku u tiviwile, a ta hi ku rhurhumela, a khinsama emilengeni ya yena a tivula emahlweni ka vanhu leswi a n'wi khumbeleke swona, ni laha a horisiweke kan'we.

⁴⁸Kutani Yesu a ku eka yena: “N'wananga, ku pfumela ka wena ku ku hanyisile, famba hi ku rhula.”

⁴⁹Kakuloko a ha vulavula, ku fika un'wana la humeke eka n'wini wa sinagoga, a ku eka yena: “N'wana wa wena u file, u nga ha karhati mufundhisi.”

⁵⁰Kambe Yesu loko a swi twa, a ku eka yena: “U nga chavi, pfumela ntsena, u ta hanya.”

⁵¹Kuteloko a fikile endlwini, a nga pfumelelanga ni un'we ku nghena, loko a nga ri Petro, na Yohane, na Yakobo, ni tata wa wanhwanyana ni mana wa yena.

⁵²Kambe a va rila hinkwavo, va n'wi rilela; kutani Yesu a ku: “Mi nga rili a nga fangi, u etlele.”

⁵³Kutani va n'wi hleka hikuva a va tiva leswaku u file.

⁵⁴Kambe yena a va humesela ehandle hinkwavo, kutani a n'wi khoma hi voko, a tlakusa rito, a ku: “Nhwanyana, pfuka.”

⁵⁵Xikan'wekan'we moya wa yena wu tlhelela eka yena, a hatlisa ku pfuka; kutani a va byela leswaku va n'wi nyika swakudya.

⁵⁶Kutani vaveleki va yena va hlamala ngopfu; kambe a va lerisa leswaku va nga byeli munhu leswi humeleleke.