Read tsonga Deteronoma 14 Bible Online

Deteronoma 14 - tsonga bible

Deteronoma 14

¹“Mi vana va Yehovha, Xikwembu xa n'wina: Mi nga tshuki mi titlhavela tinhlanga emirini, kambe mi nga tshuki mi byewula misisi emahlweni hikwalaho ka mufi.

²Hikuva u tiko leri hlawuleriweke Yehovha, Xikwembu xa wena, kambe Yehovha u ku hlawurile leswaku u va tiko ra yena ra xiviri, exikarhi ka matiko hinkwawo lama nga ehenhla ka misava.

³“U nga tshuki u dya xilo ni xin'we lexi yilaka.

⁴Leswi hanyaka leswi mi nga ta swi dya, hi leswi:

⁵homu ni nyimpfu ni mbuti, ni nhlangu, ni mhunti, ni mhitlwa, ni mhalamhala, ni nhongo, ni nyarhi, ni nhutlwa.

⁶Mi ta dya swifuwo hinkwaswo leswa min'wala leyi avanyisiweke ni swa masondzo lama endlaka maharhi leswi nga ni min'wala mimbirhi, ni leswi hlampfunhaka.

⁷Kambe leswi mi nga ta ka mi nga swi dyi exikarhi ka leswi hlampfunhaka, ni le xikarhi ka leswi nga ni min'wala leyi avanyisiweke, ni sondzo leri endlaka maharhi, hi leswi: kamela, ni mpfundla ni mbila, hikuva swa hlampfunha, kambe min'wala ya swona a yi avanyisiwanga, swi ta va leswi nga tengangiki eka n'wina;

⁸ni nguluve, hikuva min'wala ya yona yi avanyisiwile kambe a yi hlampfunhi; yi ta va leyi nga tengangiki eka n'wina. Mi nga tshuki mi dya nyama ya swona, ni ku khumba mitsumbu ya swona.

⁹“Leswi mi nga ta swi dya eka hinkwaswo leswi nga ematini hi leswi: Mi ta dya hinkwaswo leswi nga ni swicapila ni tihakatimba;

¹⁰kambe hinkwaswo leswi pfumalaka swicapila ni tihakatimba, mi nga swi dyi, a swi tenganga eka n'wina.

¹¹“Mi ta dya tinyanyana hinkwato leto tenga. Kambe leti mi nga ta ka mi nga ti dyi, hi leti:

¹²gama ni hwati, ni koti, ni rhandzala, ni tinxaka hinkwato ta swimhungu;

¹³tinxaka hinkwato ta mawukuwuku;

¹⁴yimbhu, ni nkhuhunu, ni nÃ¡nÃ¡na, ni tinxaka hinkwato ta tinkamane,

¹⁵xikotlwane, ni n'wapekupeku, ni munyanyane,

¹⁶ni muswe, ni gumba, ni mavalange;

¹⁷ni ntsavila, ni tinxaka hinkwato ta nyakukolwe,

¹⁸gondzo ni mangadyana.

¹⁹Hinkwaswo leswitsongo leswi hanyaka leswi nga ni timpapa swi ta yila eka n'wina, mi nga xi dyi.

²⁰Mi ta dya tinyanyana hinkwato leti tengeke.

²¹“Mi nga dyi ntsumbu ni wun'we. U ta swi nyika muluveri la akeke emitini ya wena, a swi dya; kumbe u ta swi xavisa eka wamatiko; hikuva u tiko leri hlawuleriweke Yehovha, Xikwembu xa wena. “U nga tshuki u sweka ximbutana entswambeni wa mana wa xona.

²²“U ta pambula swa vukhume eka hinkwaswo leswi nga ta huma etimbewini ta wena, leswi nga ta mila ensin'wini ya wena hi lembe rin'wana ni rin'wana.

²³Kutani u ta dya emahlweni ka Yehovha Xikwembu xa wena exivandleni lexi a nga ta xi hlawula ku akisa vito ra yena kona, swa vukhume bya koro ya wena, ni bya vhinya ya wena, ni bya mafurha ya wena, ni mativula ya swifuwo swa wena leswikulu ni leswitsongo, u ta dyondza hakona ku chava Yehovha, Xikwembu xa wena, hi masiku hinkwawo.

²⁴Kutakuloko ndlela yi va yi lehile eka wena, kutani u tsandzeka ku rhwala swa vukhume bya wena, hikuva xivandla xi ve kule na wena, lexi Yehovha, Xikwembu xa wena, a xi hlawuleke ku akisa vito ra yena kona;

²⁵kuteloko Yehovha, Xikwembu xa wena, a ku katekisile, u ta xava mali hi xona xa vukhume kutani u ta suka u tamele mali leyi evokweni ra wena, u ya exivandleni lexi Yehovha, Xikwembu xa wena, a xi hlawuleke;

²⁶kutani u ta xava kona hinkwaswo leswi mbilu ya wena yi swi rhandzaka, hambi swi ri swifuwo leswikulu ni leswitsongo, hambi yi ri vhinyo ni byalwa ni hinkwaswo leswi mbilu ya wena yi nga ta swi rhandza; u ta dya kona emahlweni ka Yehovha, Xikwembu xa wena, u titsakela wena ni yindlu ya wena.

²⁷Kambe u nga rivali Mulevhi la nga emitini ya wena hikuva a nga na ku averiwa ndzhaka kun'we na wena.

²⁸“Kutakuloko ku hundzile malembe manharhu, u ta humesa swa vukhume hinkwaswo swa leswi u swi tshoveleke hi lembe leri, u ta swi veka emindyangwini ya wena.

²⁹Kutani Mulevhi u ta ta (hikuva a nga na ku averiwa ni ndzhaka na wena), ni muluveri, ni xisiwana ni wansati wa noni, lava nga emitini ya wena, va ta dya va xurha; hi kona Yehovha, Xikwembu xa wena a nga ta ku katekisa emitirhweni hinkwayo leyi u nga ta yi tirha hi mavoko ya wena.