Read tsonga Deteronoma 17 Bible Online

Deteronoma 17 - tsonga bible

Deteronoma 17

¹“U nga tshuki u tlhavela Yehovha, Xikwembu xa wena, xifuwo lexikulu hambi lexitsongo lexi nga ni xivati, hambi byi ri vulema, hikuva swi yila ngopfu emahlweni ka Yehovha, Xikwembu xa wena.

²“Kungakuloko emutini wun'wanyana wa miti leyi Yehovha, Xikwembu xa wena, a ku nyikaka yona, wanuna hambi wansati a ri kona exikarhi ka n'wina, la endlaka leswo biha emahlweni ka Yehovha, Xikwembu xa wena, hi ku tlula ntwanano wa yena,

³loko a gandzela swikwembu swin'wana, a va a khinsama emahlweni ka swona, emahlweni ka dyambu ni n'weti, hambi ku ri emahlweni ka vandla hinkwaro ra matilo, yi ri mhaka leyi ndzi nga yi lerisangiki,

⁴kuteloko mhaka leyi yi tisiwile eka wena, ni loko u yi twile, u ta yi vutisisa swinene; kutani kutakuloko mhaka yi ri yona, yi tiyisiwile, xidyoho lexi xi endliwile eIsraeleni,

⁵u ta humesa enyangweni ya muti wanuna loyi, hambi wansati loyi a endleke swo biha leswi, kutani u ta va khandla hi maribye, hambi a ri wanuna, hambi a ri wansati, va ta fa.

⁶Hi milomu ya timbhoni timbirhi hambi tinharhu, va ta dlaya la faneleke hi rifu; a nga ka a nga dlawi hi nomu wa mbhoni yin'we.

⁷Mavoko ya timbhoni ma ta rhanga ku va ehenhla ka yena ku n'wi dlaya, kutani ma ta landziwa hi mavoko ya tiko hinkwaro. Hi mukhuva wolowo, u ta susa lowo biha exikarhi ka n'wina.

⁸“Kutakuloko ku tisiwa eka wena mhaka leyi ku tsandzaka, yi ri mhaka ya ku dlaya, kumbe ya ku lwa, kumbe ya timbanga, ti ri timhaka leti pfuxaka madzolonga emindyangwini ya n'wina, u ta pfuka, u ya exivandleni lexi Yehovha, Xikwembu xa wena, a nga ta xi hlawula;

⁹u ta ya eka vaprista ni le ka Valevhi, ni le ka muavanyisi la nga ta va kona emasikwini lawa; u va vutisisa, kutani va ta ku tivisa rito ra leswo lulama;

¹⁰u ta endla hilaha va nga ta ku byela hakona exivandleni lexi Yehovha a nga ta xi hlawula, kutani u ta endla hinkwaswo hilaha va ku byeleke hakona swinene.

¹¹U ta endla hilaha va ku leriseke hakona, ni laha va lunghiseke mhaka hakona; u nga tshuki u hambukela exineneni, hambi eximatsini eka rito leri va ku byeleke rona.

¹²Kambe munhu la nga ta tikurisa, a nga yingisi muprista la yimaka ku tirhela Yehovha Xikwembu xa wena, kumbe muavanyisi, munhu loyi u ta fa. U ta susa lowo biha eIsraeleni.

¹³Tiko hinkwaro ri ta swi yingisa, kutani va ta chava, va nga ha tikurisi.

¹⁴“Kutakuloko u nghenile etikweni leri Yehovha, Xikwembu xa wena, a ku nyikaka rona, loko u ri fumile ni loko u akile eka rona, loko u ku: ‘Ndzi rhandza ku tivekela hosi kukotisa matiko hinkwawo lama ndzi rhendzeleke’;

¹⁵u ta tivekela hosi leyi! Yehovha, Xikwembu xa wena, a nga ta yi hlawula; u ta teka un'wana wa varikwenu ku n'wi veka hosi ehenhla ka wena; u nga ka u nga veki muluveri, ni munhu la nga riki makwenu.

¹⁶Ntsena a nga tshuki a va ni tihanci leto tala, kambe a nga tshuki a tlherisela tiko eEgipta leswaku a ta kuma tihanci leto tala; hikuva Yehovha u te eka n'wina: Mi nga ka mi nga ha tlheli hi ndlela leyi!

¹⁷A nga tshuki, na swona, a va ni vasati lavo tala, mbilu ya yena yi nga ti tshuka yi hambuka; a nga tshuki kambe a va ni nsuku ni silivhere leyo tala.

¹⁸Kutakuloko a tshamisile exiluvelweni xa vuhosi bya yena, u ta titsalela ebukwini nawu lowo, hilaha ingi wu tsariwile ebukwini leyi tshamaka ni vaprista ni Valevhi.

¹⁹Yi ta tshama ekusuhi na yena, u ta hlaya kona masiku hinkwawo ya ku hanya ka yena, leswaku a dyondza ku chava Yehovha, Xikwembu xa yena, ni ku hlayisa marito hinkwawo ya nawu lowo, ni ya ku lerisa loku, a va a swi endla;

²⁰swi va leswaku mbilu ya yena yi nga tshuki yi tikurisa ehenhla ka vamakwavo, ni leswaku yi nga hambuki enawini, hambi exineneni, hambi eximatsini, a ta lehisa masiku ya yena evuhosini bya yena, a ri yena ni vana va yena exikarhi ka Israele.