Read tsonga Deteronoma 18 Bible Online

Deteronoma 18 - tsonga bible

Deteronoma 18

¹“Vaprista va Valevhi, ni nyimba hinkwayo ya Valevhi, va nga ka va nga vi na ndzhaka ni vana va Israele, va ta kuma swakudya swa vona emagandzelweni lama hiseriwaka Yehovha ni le ndzhakeni ya yena.

²Va nga ka va nga vi na ndzhaka exikarhi ka vamakwavo; Yehovha i ndzhaka ya vona hi laha a va byeleke hakona.

³Hi swona leswi faneleke vaprista, swi ta huma eka tiko, ku ri ka lava humesaka magandzelo, hambi yi ri homu, hambi xi ri xinyimpfana: va ta nyika voko eka muprista, ni tinhlaya ni xihlakahla.

⁴U ta n'wi nyika swirhangana swa mavele ya wena, ni swa vhinyo ya wena, ni swa mafurha ya wena, ni swirhangana swa voya bya tinyimpfu ta wena;

⁵hikuva Yehovha, Xikwembu xa wena, u n'wi hlawurile exikarhi ka tinyimba hinkwato, ku yima emahlweni ka yena, ni ku tirha ntirho hi vito ra Yehovha, a ri yena ni vana va yena, hilaha ku nga heriki.

⁶“Kutakuloko Mulevhi a suka emutini wun'wana wa wena laha a a tshameke kona eIsraeleni, ku ya hi ku rhandza ka yena exivandleni lexi Yehovha a nga ta xi hlawula,

⁷kakuloko a tirha ntirho hi vito ra Yehovha, Xikwembu xa wena, kukotisa vamakwavo hinkwavo va Valevhi lava yimaka emahlweni ka Yehovha,

⁸u ta dya leswi ringanaka swa vona, ku nga hlayiwi leswi a swi kumeke endzhakeni ya vatata wa yena.

⁹“Kutakuloko u nghenile etikweni leri Yehovha, Xikwembu xa wena, a ku nyikaka rona, u nga tshuki u dyondza ku endla swo biha swa matiko lawa.

¹⁰Ku nga tshuki ku kumiwa munhu ni un'we eka wena la nghenisaka n'wana wa yena wa wandzisanyana, kumbe wa wanhwanyana endzilweni ni la hlahluvaka, ni mungoma, ni mulorhi,

¹¹ni noyi, ni la vutisaka mimoya ni la bvumbhaka, ni la vutisaka vafi.

¹²Hikuva un'wana ni un'wana la endlaka swilo leswi, wa yila eka Yehovha, kambe Yehovha, Xikwembu xa wena, u hlongole matiko lawa emahlweni ka wena hikwalaho ka swidyoho leswi.

¹³U ta va wa Yehovha, Xikwembu xa wena, ntsena;

¹⁴hikuva matiko lawa u nga ta ma hlongola, va yingisa vangoma ni valoyi; kambe wena, Yehovha, Xikwembu xa wena, a nga ku pfumeleli ku endlisa sweswo.

¹⁵“Yehovha, Xikwembu xa wena, u ta ku pfuxela muprofeta kukotisa mina exikarhi ka wena, exikarhi ka vamakwenu; mi ta n'wi yingisa.

¹⁶U ta endla hilaha u kombeleke hakona eka Yehovha, Xikwembu xa wena, eHorebe, hi siku ra nhlengeletano, loko u te: ‘Ndzi nga ka ndzi nga ha yingisi rito ra Yehovha, Xikwembu xa mina; ni ndzilo lowukulu lowu, ndzi nga tshuki ndzi wu vona kambe, leswaku ndzi nga ta fa.’

¹⁷Kutani Yehovha u te eka mina: ‘Va vurile swona.

¹⁸Ndzi ta va pfuxela muprofeta kukotisa wena exikarhi ka vamakwavo, ndzi ta nghenisa marito ya mina enon'wini wa yena, kutani u ta va byela hinkwaswo leswi ndzi nga ta n'wi lerisa swona.

¹⁹Kungakuloko munhu a nga yingisi marito ya mina lawa muprofeta a nga ta ma vula hi vito ra mina, ndzi ta n'wi vutisa emhakeni leyi.

²⁰Kambe muprofeta la nga ta tikurisa hi ku vula hi vito ra mina rito leri ndzi nga n'wi lerisangiki ku ri vula, kumbe loko a vulavula hi mavito ya swikwembu swin'wana, muprofeta loyi u ta fa.’

²¹Kumbe u ta ku embilwini ya wena: ‘Hi ta tivisa ku yini rito leri Yehovha a nga ri vulangiki xana?’

²²Kungakuloko muprofeta a vulavula hi vito ra Yehovha, kutani mhaka leyi, loko yi nga humeleli, hi rona rito leri Yehovha a nga ri vulangiki; muprofeta u ri vurile hi ku tikukumuxa; u nga ka u nga n'wi chavi.