Read tsonga Deteronoma 21 Bible Online

Deteronoma 21 - tsonga bible

Deteronoma 21

¹“Kungakuloko va kuma emisaveni leyi Yehovha, Xikwembu xa wena, a ku nyikaka yona ku yi fuma, munhu la dlayiweke; u wile emasin'wini, ku nga tiviwi mudlayi wa yena;

²vakulukumba va wena, ni vaavanyisi va wena va ta huma, va ya pima vukule hi ku suka ka la dlayiweke ku ya fika emitini leyi n'wi rhendzeleke.

³“Kutani vakulukumba va muti lowu nga ekusuhi ni la dlayiweke, va ta teka thokazi leri nga siki tirhisiwaka, leri nga siki rhwalaka joko.

⁴Vakulukumba va muti lowu va ta yisa thokazi enambyeni lowu khulukaka hi masiku, laha ku nga rimiwiki, ni laha ku nga byariwiki kona, hi kona va nga ta ri tshova nhamu enambyeni.

⁵Vaprista, vana va Levhi, va ta tshinela, hikuva hi vona lava Yehovha, Xikwembu xa wena, a va hlawuleke ku tirha ntirho wa yena, ni ku katekisa hi vito ra Yehovha, kutani milomu ya vona yi ta avanyisa ku tengisana hinkwako, ni timhaka hinkwato ta timbanga.

⁶Vakulukumba hinkwavo va muti lowu, va ri lava nga ekusuhi ni ntsumbu, va ta hlamba mavoko ehenhla ka thokazi leri va ri tshoveke nhamu enambyeni.

⁷Kavaloko va ta vulavula, va ku: ‘Mavoko ya hina a ma halatanga ngati leyi, kambe mahlo ya hina a ma vonangi nchumu.

⁸Oho Yehovha! Wa nga rivalela tiko ra wena ra Israele, leri u ri kutsuleke, kambe u nga vekeli ngati leyi pfumaleke nandzu exikarhi ka tiko ra wena ra Israele! Hi kona ku nga ta phahleriwa vona mhamba hikwalaho ka ngati.’

⁹Kutani wena u ta susa ngati leyi pfumaleke nandzu exikarhi ka wena, hikuva u ta endla leswi lulameke emahlweni ka Yehovha.

¹⁰“Kutakuloko u huma nyimpi ku ya hlasela valala va wena, loko Yehovha, Xikwembu xa wena, a va neha emavokweni ya wena u va u teka vakhomiwa,

¹¹kungakuloko u vona exikarhi ka vakhomiwa wansati la sasekeke, ni loko u n'wi rhandza u ehleketa ku n'wi endla nsati wa wena,

¹²u ta n'wi nghenisa endlwini ya wena, a byewula misisi enhlokweni, a titsemela min'wala;

¹³kutani u ta hluvula tinguvu leti a ti ambaleke evukhumbini bya yena, a tshama endlwini ya wena, a ri karhi a rilela tata wa yena ni mana wa yena n'hweti yin'we; kavaloko u ta nghena eka yena, u va nuna wa yena, na yena a va nsati wa wena.

¹⁴Kungakuloko u nga ha n'wi rhandzi, u ta n'wi tshika a tifambela, kambe u nga n'wi xavisi hi mali, u nga n'wi endli khumbi, hikuva u n'wi endle nsati wa wena.

¹⁵“Kutakuloko wanuna a tekile vasati vambirhi, un'wana loko a rhandziwa, kambe un'wana a vengiwa; loko va n'wi velekele vana va vavanuna havambirhi, hambi a ri la rhandziwaka, hambi la vengiwaka, loko mativula a ri n'wana wa loyi a vengiwaka,

¹⁶siku a nga ta nyika vana va yena rifuwo ra yena leswaku yi va ndzhaka ya vona, a nga ka a nga veki hosi n'wana wa loyi a rhandziwaka emahlweni ka n'wana wa loyi a vengiwaka, a nga mativula.

¹⁷Kambe u ta veka hosi n'wana wa la vengiwaka ku n'wi nyika ku averiwa kambirhi ka hinkwaswo leswi a nga na swona; hikuva hi xona xirhangana xa matimba ya yena; hi yena hosi.

¹⁸“Kungakuloko munhu a ri ni n'wana la nga yingisiki, la tiarisaka, la nga yingisiki rito ra tata wa yena ni rito ra mana wa yena; ni loko ingi va n'wi layile, kambe a nga va yingisanga;

¹⁹tata wa yena ni mana wa yena va ta n'wi khoma, va n'wi yisa emahlweni ka vakulukumba va muti wa yena, enyangweni ya vuako bya yena;

²⁰kutani va ta ku eka vakulukumba va muti: ‘N'wana wa hina loyi a tiarisaka, a nga yingisi rito ra hina, i muoswi ni munwi.’

²¹Vavanuna hinkwavo va muti wa yena va ta n'wi khandla hi maribye leswaku a fa, hi mukhuva wolowo u ta susa lowo biha exikarhi ka wena kutani Vaisraele hinkwavo va ta swi yingisa, va ta chava.

²²“Kungakuloko munhu a endlile leswo biha leswi fanelaka hi rifu kutani u n'wi dlayile hi ku n'wi hayeka emurhini,

²³ntsumbu wa yena wu nga tshuki wu hundza vusiku wu ri emutini; u ta n'wi lahla hi siku rolero, hikuva la hayekiweke, wa yila eka Xikwembu, kambe u nga tshuki u nyamisa tiko ra wena leri Yehovha, Xikwembu xa wena, a ku nyikaka rona leswaku yi va ndzhaka ya wena.