Read tsonga Deteronoma 26 Bible Online

Deteronoma 26 - tsonga bible

Deteronoma 26

¹“Kutakuloko u nghenile etikweni leri Yehovha, Xikwembu xa wena, a ku nyikaka leswaku yi va ndzhaka ya wena, ni loko u ri tekile, u va u akile eka rona,

²u ta teka swirhangana swa mihandzu hinkwayo leyi u yi hlengeleteke etikweni leri Yehovha, Xikwembu xa wena, a ku nyikeke rona, u ta yi veka exirhundzwini, kutani u ya exivandleni lexi Yehovha, Xikwembu xa wena, a nga ta hlawula ku akisa vito ra yena kona.

³U ta ya eka muprista la nga ta va kona hi masiku lawa, u ku eka yena: ‘Namuntlha ndzi tivisa Yehovha, Xikwembu xa wena leswaku ndzi nghenile etikweni leri Yehovha a hlambanyeleke vatatana ku hi nyika rona.’

⁴Muprista u ta teka xirhundzu emavokweni ya wena, kutani u ta xi veka emahlweni ka alitari ya Yehovha, Xikwembu xa wena.

⁵Kutani u ta vulavula emahlweni ka Yehovha, Xikwembu xa wena, u ku: ‘Tatana a a ri Muaramu, a lave ku fa, kutani a xikela eEgipta a ri ni vanhu lava nga talangiki, a tshama kona a ri muluveri; kambe a hundzukela kona tiko lerikulu, leri nga ni matimba, ni vanhu lavo tala.

⁶Vaegipta va hi xanisile va hi tsongahatile, ni ku hi tirhisa hi vukhumbi lebyo nonon'hwa.

⁷Kambe hi huwelele eka Yehovha, Xikwembu xa vatata wa hina, kutani Yehovha u yingisile rito ra hina, a vona ku tsongahatiwa ka hina, ni mitirho ya hina, ni ku xaniseka ka hina.

⁸Kutani Yehovha u hi humesile eEgipta hi xandla xa matimba ni voko leri tlakukeke, ni xichavo lexikulu, ni swikombiso ni mahlori.

⁹U hi fikisile exivandleni lexi, kambe u hi nyikile tiko leri, tiko leri khulukaka ntswamba ni vulombe.

¹⁰Oho! Yehovha, waswivo sweswi ndzi tisile swirhangana swa mihandzu ya misava leyi u ndzi nyikeke yona!’ U ta yi veka emahlweni ka Yehovha, Xikwembu xa wena, kutani u ta khinsama emahlweni ka Yehovha, Xikwembu xa wena.

¹¹U ta titsakela u ri ni Mulevhi, ni muluveri la nga ta va exikarhi ka wena, hi rifuwo hinkwaro leri Yehovha, Xikwembu xa wena, a ku nyikeke rona ni yindlu ya wena.

¹²“Kutakuloko u hetile ku pambula swa vukhume hinkwaswo swa ku tshovela ka wena hi lembe ra vunharhu, ri nga lembe ra swa vukhume, u va u swi nyikile Mulevhi, ni muluveri, ni xisiwana, ni noni, vona va ta dya, va xurha emitini ya wena;

¹³hi kona u nga ta vulavula emahlweni ka Yehovha, Xikwembu xa wena, u ku: ‘Ndzi humesile endlwini ya mina swilo leswi hlawuriweke, ndzi swi nyikile Mulevhi, ni muluveri, ni xisiwana, ni noni hilaha u ndzi leriseke hakona; a ndzi tlulanga ni wun'we wa milawu ya wena, na swona a ndzi yi rivalanga.

¹⁴A ndzi dyangi swilo leswi enhlomulweni wa mina, a ndzi swi hungutanga ndzi ri la nga tengangiki, a ndzi nyikanga nchumu wa swona hikwalaho ka mufi; ndzi yingisile rito ra Yehovha, Xikwembu xa mina, kambe ndzi endlile hinkwaswo hilaha u ndzi leriseke hakona.

¹⁵Languta u ri etilweni, endlwini leyo kwetsima ya wena, u katekisa tiko ra wena ra Israele, ni misava leyi u hi nyikeke yona, u yi endla misava leyi khulukaka ntswamba ni vulombe, hilaha u hlambanyeke hakona eka vatata wa hina.’

¹⁶“Namuntlha Yehovha, Xikwembu xa wena, a ku lerisa ku endla hi milawu leyi, ni ku lerisa loku. U ta swi hlayisa, ni ku swi endla hi mbilu hinkwayo ya wena, ni moya hinkwawo wa wena.

¹⁷Namuntlha u endlile leswaku Yehovha a tivula Xikwembu xa wena, kambe wena u tibohile ku famba etindleleni ta yena, ni ku hlayisa ku vula ka yena, ni ku lerisa ka yena, ni milawu ya yena, ni ku yingisa rito ra yena.

¹⁸Yehovha kambe u endlile hilaha u nga tivula hakona namuntlha leswaku u va eka yena tiko ra xiviri, hilaha a ku byeleke hakona u ri karhi u yingisa milawu hinkwayo ya yena;

¹⁹yena kambe u ta ku tlakusa ehenhla ka matiko hinkwawo lawa a ma endleke, a ku nyika ku dzuna, ni ku twala, ni ku kwetsima, u va tiko leri hlawuleriweke Yehovha, Xikwembu xa wena, hilaha a ku byeleke hakona.”