Read tsonga Deteronoma 29 Bible Online

Deteronoma 29 - tsonga bible

Deteronoma 29

¹Hi wona marito ya ntwanano lowu Yehovha a leriseke Muxe ku wu endla ni vana va Israele etikweni ra u Mowabu, wu ri handle ka ntwanano lowu a nga wu endla na vona eHorebe.

²Muxe a hlengeleta Vaisraele hinkwavo, a ku eka vona: “Mi vonile hinkwaswo leswi Yehovha a swi endleke emahlweni ka n'wina, etikweni ra Egipta eka Faro, ni ka malandza ya yena hinkwawo, ni ka tiko ra yena hinkwaro,

³miringo leyikulu leyi mahlo ya wena ma yi voneke, ni swikombiso, ni mahlori lamakulu.

⁴Kambe ku fika siku ra namuntlha Yehovha a nga mi nyikangi mbilu ya ku twisisa, ni mahlo ya ku vona, ni tindleve ta ku yingisa.

⁵Ndzi mi fambisile mananga hi malembe ya 40: tinguvu ta n'wina a ti hlakalanga henhla ka n'wina, ni tintanghu ta wena a ti hlakalangi emikondzweni ya wena;

⁶a mi dyanga vuswa, a mi nwanga vhinyo ni byalwa, ingi mi ta tiva leswaku mina Yehovha ndzi Xikwembu xa n'wina.

⁷Kuteloko mi fikile endhawini yoleyo, Sihoni, hosi ya Hexiboni, na Ogo hosi ya Baxani, va humile ku hlangana ni ku lwa na hina; kambe hi va hlurile.

⁸Hi tekile tiko ra vona, hi ri nyikile va Rhuveni, ni va Gadi, ni va hafu ya nyimba ya Manase.

⁹Hlayisani-ke marito ya ntwanano lowu, mi endla ha wona leswaku mi kateka eku endleni hinkwako ka n'wina.

¹⁰“Mi yimile namuntlha emahlweni ka Yehovha, Xikwembu xa n'wina mi ri n'wina hinkwenu, ni tihosi ta tinyimba ta n'wina, ni vakulukumba va n'wina, ni tindhuna ta n'wina, ni vavanuna hinkwavo va Israele,

¹¹ni vana va n'wina, ni vasati va n'wina ni muluveri la nga emisaveni ya n'wina, ku sungula hi mupandzi wa tihunyi, ku yisa ka muki wa mati;

¹²mi yima leswaku mi nghena entwananweni wa Yehovha, Xikwembu xa wena, lowu tiyisiweke hi ku hlambanya, lowu Yehovha, Xikwembu xa wena, xi wu endlaka na wena namuntlha,

¹³u ta ku endla namuntlha tiko ra yena, na yena a va Xikwembu xa wena hilaha a ku byeleke hakona, ni laha a hlambanyeke hakona eka vatata wa wena Abrahama, na Isaka, na Yakobo.

¹⁴“A ndzi endli ntwanano lowu na n'wina ntsena, ni ku hlambanya loku;

¹⁵kambe ndzi wu endla ni un'wana ni un'wana la yimaka kwala na hina namuntlha, emahlweni ka Yehovha, Xikwembu xa hina, ni lava nga riki kona na hina namuntlha.

¹⁶“Ma tiva hilaha hi hanyeke ha kona etikweni ra Egipta, ni laha hi hundzeke hakona ematikweni lawa mi hundzeke xikarhi ka wona,

¹⁷mi vonile swivi swa vona, ni swifaniso swa vona swa thyaka, wu ri ntsandze, ni ribye, ni silivhere, ni nsuku, leswi nga ka vona.

¹⁸“Ku nga tshuki ku va xikarhi ka n'wina wanuna, hambi wansati hambi yindlu, ni loko ri ri rixaka leri mbilu ya rona yi hambukaka namuntlha eka Yehovha, Xikwembu xa hina, ku ya tirhela swikwembu swa matiko lawa; ku nga tshuki ku va xikarhi ka n'wina, ni rimitsu leri humesaka tsefu, ni ku pyopya;

¹⁹kambe ku nga tshuki ku va ri munhu, kutakuloko a yingisile marito ya ndzhukano, a miyeta mbilu ya yena, a ku: ‘Ndzi ta va ni ku rhula, hambi ndzi nga famba eku tirhandzeleni ka mbilu yanga,’ leswaku la xurheke a kokela la nga ni torha.

²⁰Yehovha a nga ka a nga pfumeli ku n'wi rivalela, hikuva vukari bya Yehovha, ni rilondzo ra yena swi ta pfurhela munhu loyi; kutani makhombo hinkwawo lama tsariweke ebukwini leyi ma ta tshama ehenhla ka yena, kutani Yehovha u ta hlangula vito ra yena ehansi ka matilo.

²¹Yehovha u ta n'wi hlawula etinyimbeni hinkwato ta Israele, u ta humeleriwa hi makhombo, hilaha ku rhukaniwa hinkwako ku tsariweke hakona ebukwini ya nawu.

²²“Kutani vana va n'wina lava nga ta ta ndzhaku ka n'wina, ni muluveri la nga ta fika, a suke etikweni leri nga ekule, loko va vona xirha ni makhombo, leswi Yehovha a beke tiko leri ha swona,

²³va ta ku: ‘I tiko ra xivavula ni munyu, leri tshweke hinkwaro, ri nga riki na mbewu ni swakudya, ni loko byi ri byanyi, a byi mili kona; swi kotisa ku pfilunganya ka Sodoma na Gomora, ni ka Adama na Seboyimi, miti leyi Yehovha a yi pfilunganyeke ku holoveni ka yena, ni le vukarini bya yena!’

²⁴Matiko hinkwawo ma ta ku: ‘Yehovha u endlele yini sweswo eka tiko leri xana? Ku pfurha ka vukari lebyikulu lebyi, ku lo yini xana?’

²⁵Va ta humula, va ku: ‘Hi leswi va tshikeke ntwanano wa Yehovha, Xikwembu xa vatata wa vona, lowu a wu tiyiseke na vona loko a va humesa etikweni ra Egipta;

²⁶kutani va tifambela, va ya tirhela swikwembu swin'wana va khinsama emahlweni ka swona, swi ri swikwembu leswi va nga swi tivangiki, ni leswi va nga swi averiwangiki.

²⁷Vukari bya Yehovha byi pfurhele tiko leri ku fikisa ehenhla ka rona mirhukano hinkwayo leyi tsariweke ebukwini leyi.

²⁸Kambe Yehovha u va tsuvurile emisaveni ya vona hi vukari, ni ku holova, ni ku hiseka lokukulu, kutani u va cukumetile emisaveni yin'wana, hilaha swi vonekaka hakona namuntlha.’

²⁹“Timhaka leti fihliweke i ta Yehovha, Xikwembu xa hina, kambe timhaka leti hlavuteriweke i ta hina ni vana va hina, hilaha ku nga heriki, leswaku hi ta endla hi marito hinkwawo ya nawu lowu.