Read tsonga Deteronoma 33 Bible Online

Deteronoma 33 - tsonga bible

Deteronoma 33

¹Hi kona ku katekisa ka Muxe wanuna wa Xikwembu, loko a katekisa vana va Israele, a nga si fa, a ku:

²“Yehovha u hume Sinayi, U va tsuvukele a ri Seyira; U vonakile a ri entshaveni ya Parani, U suke exikarhi ka mavandla layo kwetsima. Evokweni ra xinene ra yena, ndzilo wa nawu wu va humelele.

³Kunene, wa rhandza matiko; Vahlawuriwa va yena hinkwavo va le vokweni ra yena; Vona va tshama emilengeni ya wena, Va amukela marito ya wena.

⁴Muxe u hi lerisile nawu, Yi nga ndzhaka ya nhlengeletano ya Yakobo.

⁵A a ri hosi ya Yexuruni (Israele). Siku tihosi ta tiko ti hlengeletene Ni tinyimba ta Israele.

⁶“A ku hanye Rhuveni; a nga tshuki a fa, Ni vanhu va yena va ve lavo tala!”

⁷Ku katekisa Yuda, a ku: “Oho Yehovha, yingisa rito ra Yuda, U n'wi vuyisa etikweni ra yena. Mavoko ya yena a ma ve ni matimba, U ve mupfuni wa yena ku n'wi kutsula eka valala va yena!”

⁸Eka Levhi, a ku: “Mathumimi ni Maurimi ya wena a ma vekiwe ka muhlawuriwa wa wena, Loyi u n'wi ringeke Masa, Loyi u n'wi tengiseke ematini ya Meriba,

⁹La nga te henhla ka tata wa yena ni mana wa yena: A ndzi va vonanga! La nga tivangiki vamakwavo, La nga tiviki vana va yena, Hikuva va hlayisa rito ra wena, Va chivirikela ntwanano wa wena,

¹⁰Va dyondzisa ku lerisa ka wena eka Yakobo, Ni nawu wa wena eka Israele. Va vekela mirhi ya risuna etinhompfini ta wena, Ni holokosta ealitarini ya wena.

¹¹Oho! Yehovha, katekisa matimba ya yena, U amukela ntirho wa mavoko ya yena. Tshova nhlana wa valala va yena, ni wa lava n'wi vengaka Leswaku va nga ha pfuki.”

¹²Eka Benjamini, a ku: “I murhandziwa wa Yehovha, U ta aka hi ku tshemba kusuhi na yena; Yehovha u ta n'wi funengeta hi masiku, U ta tshama emakatleni ya yena.”

¹³Eka Yosefa, a ku: “Tiko ra yena ri ta katekisiwa i Yehovha Hi leswo saseka swa le tilweni, yi ri mberha, Ni swa le xidziveni lexi nga ehansi,

¹⁴Ni mihandzu yo nandziha ya dyambu, Ni mihandzu yo nandziha ya tin'hweti,

¹⁵Ni mihandzu yo nandziha ya tintshava ta khale, Ni mihandzu yo nandziha ya mitsunga leyi nga heriki,

¹⁶Ni mihandzu yo nandziha ya misava, ni ya ndzalo ya yona. Tintswalo ta Loyi a humeleleke exihlahleni A ti tshame enhlokweni ya Yosefa, Emombyeni wa hosi ya vamakwavo!

¹⁷Nkunzi ya yena ya mativula i ku kwetsima ka yena, Timhondzo ta yona i timhondzo ta nyarhi; U ta tlhava ha tona matiko hinkwawo swin'we, Ku ya fika emakun'wini ya misava. Hi byona vunyingi bya Efrayimi, Hi wona madzanadzana ya Manase.”

¹⁸Eka Zebuloni, a ku: “Titsakele, Zebuloni, eku humeni ka wena, Na wena Isakara, emitsongeni ya wena!

¹⁹Va ta vita matiko entshaveni; Va humesa kona magandzelo ya ku lulama, Hikuva va ta an'wa endzalweni ya malwandle, Ni le rifuweni leri fihliweke esaveni.”

²⁰Eka Gadi, a ku: “Ku katekile loyi a tshunxaka Gadi! U etlele kukotisa ntswele ya nghala, Wa handzula voko ni nhloko.

²¹U hlawurile swirhangana swa tiko, Hikuva ku averiwa ka hosi ku vekeriwe yena kona, A famba ni tihosi ta tiko, A endla leswo lulama emahlweni ka Yehovha, Ni ku lerisa ka yena eka Israele.”

²²Eka Dani, a ku: “Dani i mbhuri ya nghala Leyi humaka eBaxani.”

²³Eka Neftali, a ku: “Oho Neftali! U xurhe tintswalo, U tarile hi ku kateka ka Yehovha! Yana u fuma tlhelo ra vupeladyambu ni le dzongeni!”

²⁴Eka Asere, a ku: “Asere u ta katekisiwa hi vana va vavanuna va yena, U ta rhandziwa hi vamakwavo! U ta peta nenge wa yena emafurheni.

²⁵Swilotlelo swa wena i swa tinsimbhi ni swa koporo, Matimba ya wena ma ta fana ni masiku ya wena.

²⁶“Oho Yexuruni! A nga kona la fanaka ni Xikwembu. Lexi ku tiyisaka xi ri etilweni: Evukulwini bya xona, xi tlakusiwe emapapeni.

²⁷Xikwembu xa khale i vuchavelo! Mavoko lama nga heriki ma ku tlakusile. Xi hlongorile nala emahlweni ka wena, Kutani xi ku: ‘Herisa!’

²⁸Israele u akile hi ku rhula, Xihlovo xa Yakobo xi pfelela Etikweni ra koro ni ra vhinyo; Kunene tilo ra yena ri tshona mberha.

²⁹U katekile, Israele! I mani la fanaka na wena, U nga tiko leri ponisiweke i Yehovha! Xi nga xitlhangu xa ku pfuna ka wena, Ni tlhari ra vukulu bya wena! Valala va wena va ta tsongahatiwa emahlweni ka wena, Kambe wena u ta kandziyela swivandla leswi tlakukeke swa vona!”