Read tsonga Deteronoma 8 Bible Online

Deteronoma 8 - tsonga bible

Deteronoma 8

¹“Mi ta chivirika ku hlayisa milawu hinkwayo leyi ndzi mi lerisaka namuntlha, leswaku mi hanya ni ku andza; kutani mi ta nghena etikweni leri Yehovha a ri hlambanyeleke vatata wa n'wina, mi va mi ri fuma.

²“Tsundzuka ndlela hinkwayo leyi Yehovha, Xikwembu xa wena, a ku fambiseke ha yona emananga, hi malembe ya 40 ku ku tsongahata ni ku ku ringa, u ta tiva leswi nga embilwini ya wena: leswaku kumbe xana u ta hlayisa milawu ya yena, kumbe u nga yi hlayisi.

³U ku tsongahatile, u ku tshikile u ri ni ndlala, u ku dyisile manna, leyi u nga yi tivangiki, leyi vatata wa wena, na vona, va nga yi tivangiki, a va a ku dyondzisa leswaku munhu a nga ka a nga hanyi hi vuswa ntsena, kambe munhu a hanya hi hinkwaswo leswi humaka enon'wini wa Xikwembu.

⁴Nguvu ya wena a yi hlakalangi henhla ka wena, na yona milenge ya wena a yi pfimbanga hi malembe ya 40 lawa.

⁵Pfumela embilwini ya wena leswaku Yehovha, Xikwembu xa wena, a ku laya kukotisa munhu loko a laya n'wana wa yena.

⁶“U ta hlayisa milawu ya Yehovha Xikwembu xa wena, hi ku famba etindleleni ta yena, ni ku n'wi chava.

⁷Hikuva Yehovha, Xikwembu xa wena, a ta ku nghenisa etikweni lerinene, etikweni ra milambu, ni ra swihlovo, ni ra mativa, laha mati ma humaka emikoveni ni le tintshaveni;

⁸etikweni ra koro, ni ra barley, ni ra vhinya, ni ra makuwa, ni ra magirenada; etikweni ra mitlhwari ni ra mafurha ni vulombe;

⁹etikweni leri, u nga ka u nga dyi vuswa bya wena evusiwaneni, laha u nga ka u nga pfumali nchumu, etikweni leri maribye ti nga tinsimbhi, ni leri u nga ta cela nsuku etintshaveni ta rona.

¹⁰U ta dya u ko u xurha, kambe u ta khensa Yehovha, Xikwembu xa wena, hikwalaho ka tiko lerinene leri a ku nyikeke rona.

¹¹“Chava ku rivala Yehovha, Xikwembu xa wena, u nga ti loloha ku hlayisa milawu ya yena, ni timhaka ta yena, ni ku lerisa ka yena loku ndzi ku lerisaka namuntlha.

¹²Kutakuloko u dya u xurha, ni loko u akile tindlu leto saseka u va u tshama eka tona,

¹³ni loko tihomu ta wena ni timbuti ta wena swi andzile, ni loko mali ya wena ni nsuku wa wena swi tarile, ni loko rifuwo hinkwaro ra wena ri andzile,

¹⁴mbilu ya wena yi nga tshuki yi tikurisa, u va u rivala Yehovha, Xikwembu xa wena, lexi ku humeseke etikweni ra Egipta, endlwini ya vukhumbi,

¹⁵lexi ku fambiseke hi mananga lamakulu, lama chavisaka, exikarhi ka tinyoka leto hisa, ni swipame, ni le swivandleni leswi omeke, laha ku nga riki na mati; hi xona lexi ku humeseleke mati eribyeni,

¹⁶lexi ku dyiseke emananga, manna leyi nga tiviwiki hi vatata wa wena, ku ku tsongahata, ni ku ku ringa, kambe xi ta ku katekisa kandzhaku.

¹⁷Chava ku vula embilwini ya wena, u ku: ‘Matimba ya mina, ni voko ra mina ra matimba swi ndzi fuwisile sweswo.’

¹⁸Anakanya Yehovha, Xikwembu xa wena, hikuva hi yena la ku nyikaka matimba ku tilavela rifuwo, a ta tiyisa ntwanano lowu a wu hlambanyeleke vatata wa wena, hilaha a swi endlaka namuntlha.

¹⁹“Kungakuloko u rivala Yehovha, Xikwembu xa wena, kutani u landza swikwembu swin'wana ku swi gandzela, ni ku khinsama emahlweni ka swona, ndza tiyisa mhaka namuntlha emahlweni ka n'wina leswaku mi ta lova kunene.

²⁰Mi ta lova kukotisa matiko lawa Yehovha a ma loviseke emahlweni ka n'wina, hikuva a mi yingisanga rito ra Yehovha, Xikwembu xa n'wina.