Read tsonga Deteronoma 9 Bible Online

Deteronoma 9 - tsonga bible

Deteronoma 9

¹“Yingisa Israele! Namuntlha u ya pela Yordani, u ta nghena ku ya hlula matiko lama ku tlulaka hi vukulu, ni matimba, ni miti leyikulu leyi biyiweke ku fika etilweni,

²ni vanhu lavo tala, lavo leha, vana va Anaka, lava u va tivaka, lava u tweke timhaka ta vona, va ku: ‘I mani la nga ta tiya emahlweni ka vana va Anaka?’

³Tiva namuntlha leswaku Yehovha, Xikwembu xa wena, u ta hundza a ri yena emahlweni ka wena, a kotisa ndzilo lowu pfurhaka, hi yena la nga ta va heta; a va tsongahata emahlweni ka wena; kutani u ta teka swa vona, u va heta kan'we hilaha Yehovha a ku byeleke hakona.

⁴“Kutakuloko Yehovha, Xikwembu xa wena, xi va hlongorile emahlweni ka wena, u nga tshuki u vula embilwini ya wena u ku: ‘Yehovha u ndzi fumisile tiko leri, hikwalaho ka ku lulama ka mina’; hikuva Yehovha u ta hlongola matiko lawa emahlweni ka wena hikwalaho ka ku biha ka vona.

⁵A hi ku lulama ka wena, ni vunene bya mbilu ya wena lebyi ku ngheniseke etikweni ra vona, kambe Yehovha u ta teka tiko ra vona emahlweni ka wena hikwalaho ka ku biha ka matiko lawa, ni ku tiyisa rito leri Yehovha a ri hlambanyeleke vatata wa wena, Abrahama, na Isaka, na Yakobo.

⁶Tiva leswaku a hi hikwalaho ka ku lulama ka wena Yehovha a ku nyikaka tiko lerinene ku ri fuma, hikuva u tiko leri nga ni mikolo yo nonon'hwa.

⁷“Tsundzuka, u nga rivali hilaha u nga karihisa Yehovha swonghasi emananga, ku sungula siku u humeke etikweni ra Egipta, ku yisa eku fikeni ka n'wina kwalaho, mi pfukile Yehovha.

⁸Hambi ku ri eHorebe, mi karihisile Yehovha, kutani Yehovha a mi karihela, a lava ku mi heta.

⁹Kuteloko ndzi khandziyile entshaveni, ku ya teka maribye, ma nga maribye ya ntwanano lowu Yehovha a nga wu endla na n'wina, ndzi tshamile entshaveni masiku ya 40, ni vusiku bya 40, ndzi nga dyi vuswa, ndzi nga nwi mati;

¹⁰kutani Yehovha u ndzi nyikile maribye lamambirhi lama tsariweke hi ritiho ra Xikwembu, ehenhla ka wona ku tsariwile marito hinkwawo lawa Xikwembu xi ni byeleke entshaveni, xi ri endzilweni, siku ra nhlengeletano.

¹¹Kuteloko masiku ya 40 ni vusiku bya 40 swi hundzile, Yehovha u ndzi nyikile maribye lamambirhi ya ntwanano.

¹²Kavaloko Yehovha a ku eka mina: ‘Pfuka, u hatlisa u rhelela, hikuva tiko ra wena leri u ri humeseke eEgipta ri tionhile; va hatlisile ku tshika ndlela leyi ndzi va leriseke yona, va tiendla xifaniso lexi chuluriweke.’

¹³“Kutani Yehovha a ndzi byela, a ku: ‘Ndzi vonile leswaku tiko leri, i tiko leri nga ni mikolo leyo nonon'hwa.

¹⁴Ndzi tshike, ndzi va heta, ndzi ta hlangula vito ra vona ehansi ka tilo, kambe ndzi ta endla ha wena tiko leri nga ni matimba ni vanhu ku tlurisa leri.’

¹⁵Kavaloko ndzi tlhela, ndzi rhelela entshaveni; yona ntshava hinkwayo yi pfurha hi ndzilo; kambe a ndzi tamele emavokweni ya mina, maribye lamambirhi ya ntwanano.

¹⁶Ndzi languta, kutani maswivo! A mi dyoherile Yehovha, Xikwembu xa n'wina; mi tichululele rhole, a mi hambukile hi ku hatlisa endleleni leyi Yehovha a mi leriseke yona.

¹⁷Kutani ndzi teka maribye lamambirhi, ndzi ma cukumeta hi mavoko ya mina, ndzi ma faya emahlweni ka n'wina.

¹⁸Kutani ndzi tiwisa ehansi emahlweni ka Yehovha, kukotisa leswo sungula, hi masiku ya 40, ni vusiku bya 40; ndzi nga dyi vuswa, ndzi nga nwi mati, hikwalaho ka xidyoho lexikulu lexi mi dyoheke ha xona loko mi endla leswo biha emahlweni ka Yehovha, ku n'wi karihisa.

¹⁹Hikuva a ndzi chavisiwa ngopfu hi vukari lebyi chavisaka bya Yehovha, lebyi a mi kariheleke ha byona ku mi heta. Kambe Yehovha u ndzi yingisile kambe enkarhini wolowo.

²⁰Na yena Aroni, Yehovha u n'wi kariherile a lava ku n'wi dlaya, kutani enkarhini wolowo, na yena Aroni ndzi n'wi khongelerile.

²¹Xidyoho xa n'wina, ri nga rhole leri mi ri endleke, ndzi ri tekile, ndzi hisa, kambe ndzi ri faya, ndzi kandza swinene, ndzi endla ntshuri ha rona, kutani ndzi cukumeta ntshuri lowo exinambyaneni lexi rhelelaka hi le ntshaveni.

²²Kambe mi karihisile Yehovha eTabera, na Masa, na Kibroti-Hatavha.

²³Ni loko Yehovha a mi rhumile, mi ri eKadexe-Bariniya, a ku: ‘Tlhandlukani, mi ya teka tiko leri ndzi mi nyikeke rona,’ mi landzurile ku lerisa ka Yehovha, Xikwembu xa n'wina; a mi pfumelangi eka yena, a mi yingisanga rito ra yena.

²⁴Mi tshama mi pfuka Yehovha ku suka siku leri ndzi sunguleke ku mi tiva.

²⁵Kutani ndzi khinsamile emahlweni ka Yehovha hi masiku ya 40, ni vusiku bya 40, ndzi tshama ehansi, hikuva Yehovha a a vurile leswaku a ta mi heta.

²⁶Ndzi khongele Yehovha, ndzi ku: ‘Hosi Yehovha, u nga heti tiko ra wena ni ndzhaka ya wena leyi u nga yi kutsula hi vukulu bya wena, leyi u nga yi humesa eEgipta hi voko ra matimba.

²⁷Tsundzuka malandza ya wena Abrahama, na Isaka, na Yakobo u nga languti ku nonon'hwa ka tiko leri, ni ku biha ka rona, ni xidyoho xa rona,

²⁸leswaku ku nga tshuki ku vuriwa etikweni leri u hi humeseke eka rona, va ku: “Hi leswi Yehovha a tsandzekeke ku va nghenisa etikweni leri a nga va hlayela rona kambe hi leswi a nga va venga, kutani u va humesile ku va dlaya emananga.”

²⁹Hambiswiritano, i tiko ra wena, ni ndzhaka ya wena, leyi u yi humeseke eEgipta, hi matimba lamakulu ya wena, ni voko ra wena leri tlakukeke.’