Read tsonga Yohane 10 Bible Online

Yohane 10 - tsonga bible

Yohane 10

¹“Ndzi vurisile ndzi ri eka n'wina: La nga ngheniki hi nyangwa etshangeni ra tinyimpfu, kambe a tlulela hi kun'wana, i muyivi ni khamba.

²Kambe la nghenaka hi nyangwa, hi yena murisi wa tinyimpfu.

³Mulanguteri wa nyangwa u n'wi pfulela, kutani tinyimpfu ti yingisa rito ra yena; a vitana tinyimpfu ta yena hi mavito ya tona, a ti byisa ehandle.

⁴Kuteloko a humesile tinyimpfu ta yena, a ti rhangela emahlweni, kutani tinyimpfu ti n'wi landza, hikuva ti tiva rito ra yena.

⁵Ti nga ka ti nga landzi un'wana, ti ta n'wi balekela, hikuva a ti tivi rito ra vambe.”

⁶Yesu a va byela xifaniso lexi, kambe vona a va swi twanga leswi a va byeleke swona.

⁷Yesu a engeta a ku eka vona: “Ndzi vurisile ndzi ri eka n'wina: Hi mina nyangwa ya tinyimpfu.

⁸Hinkwavo lava ndzi rhangeleke, a ma ri makhamba ni vawutli, kambe tinyimpfu a ti va yingisanga.

⁹Hi mina nyangwa. Kungakuloko munhu a nghena ha mina, u ta hlayiseka; u ta nghena a va a huma, a kuma madyelo.

¹⁰Khamba a ri ti ntsena, loko ku nga ri ku yiva, ni ku tlhava, ni ku lovisa, mina ndzi tile leswaku tinyimpfu ti va ni vutomi, ti byi kuma hi ntalo.

¹¹“Hi mina murisi lonene. Murisi lonene u nyiketa tinyimpfu ta yena vutomi bya yena.

¹²Kambe la tirhelaka mali, a nga ri murisi, loyi tinyimpfu ti nga riki ta yena, kuteloko a vona xinkankanka xi ta, a tshika tinyimpfu, a baleka; kutani xinkankanka xi khoma tinyimpfu, xi ti hangalasa.

¹³La tirhelaka mali wa baleka, hikuva i mutirheli wa mali, a nga vuri nchumu hi tinyimpfu.

¹⁴Hi mina Murisi lonene, ndzi tiva tinyimpfu ta mina, kutani ta ndzi tiva na tona.

¹⁵Hi mukhuva lowu Tatana a ndzi tivaka, na mina, ndzi tiva Tatana; kutani ndzi nyiketa tinyimpfu vutomi bya mina.

¹⁶Ndza ha ri ni tinyimpfu tin'wana leti nga riki ta tshanga leri; na tona ndzi fanele ku ti tisa, ti ta yingisa rito ra mina; kutani ntlhambi wu ta va wun'we, ni murisi a va un'we.

¹⁷Hilaha Tatana a ndzi rhandzaka, hikuva ndzi nyiketa vutomi bya mina, ndzi ta tlhela ndzi byi teka.

¹⁸A ku na munhu la ndzi tekelaka byona, hi mina ndzi byi nyikaka hi ku rhandza ka mina; ndzi ni matimba ya ku byi nyika ni matimba ya ku tlhela ndzi byi teka; ndzi lerisiwile sweswo hi Tatana.”

¹⁹Kutani ku hambana ku tlhela ku va kona exikarhi ka Vayuda hikwalaho ka marito walawo.

²⁰Kutani lavo tala eka vona a va ku: “U ni demona, u hungukile, mi n'wi yingisela yini-ke?”

²¹Van'wana va ku: “Marito lawa, a hi ya munhu la nga ni demona. Xana demona ri nga hanyanyisa munhu lowo fa mahlo xana?”

²²Nkhuvo wa ku khangula tempele a wu ri kona eYerusalema, kambe a byi ri vuxika.

²³Kutani Yesu a a tifambela erikupakupeni ra Solomoni.

²⁴Kavaloko Vayuda va n'wi rhendzela, va ku eka yena: “U ta tshika rini ku hi kanakanisa timbilu xana? Loko u ri Kriste, hi byele erivaleni.”

²⁵Yesu a va hlamula, a ku: “Ndzi mi byerile, kambe a mi pfumelanga; mitirho leyi ndzi yi tirhaka hi vito ra Tatana, hi yona leyi yi ndzi vulaka vumbhoni.

²⁶Kambe n'wina a mi pfumeri, hikuva a mi tinyimpfu ta mina.

²⁷Tinyimpfu ta mina ti yingisa rito ra mina, kutani mina ndza ti tiva, kutani ta ndzi landza,

²⁸mina ndzi ti nyika vutomi lebyi nga heriki; ti nga ka ti nga lovi, ni siku ni rin'we, kambe a ku na munhu la nga ti vutlaka evokweni ra mina.

²⁹Tatana la ndzi nyikeke tona, i nkulu eka hinkwavo; kutani a ku na munhu la nga ti vutlaka evokweni ra Tatana.

³⁰Mina na Tatana hi endla un'we.”

³¹Hikwalaho Vayuda va tlhela va rhola maribye ku n'wi khandla.

³²Yesu a va hlamula a ku: “Ndzi mi kombisile mitirho leyo tala leyo saseka, leyi humaka eka Tatana; ndzi khandleriwa wihi eka yona xana?”

³³Vayuda va n'wi hlamula, va ku: “A ku khandleriwi ntirho lowunene, kambe hikwalaho ka xisandzu, hikuva hambi u ri munhu, u tiendla Xikwembu.”

³⁴Yesu a va hlamula, a ku: “Xana a ku tsariwanga enawini wa n'wina leswaku: ‘Ndzi te: Mi swikwembu’ xana?

³⁵Kungakuloko nawu wu vurile swikwembu lava rito ra Xikwembu ri teleke vona, (kasi Matsalwa ma nga ka ma nga cukumetiwi),

³⁶xana n'wina mi ndzi byela ha yini, mi ku: ‘Wa sandza,’ loko ndzi te: ‘Ndzi N'wana wa Xikwembu’? Kasi hi mina loyi Tatana a nga n'wi hlawula ni ku n'wi rhuma emisaveni.

³⁷Kungakuloko ndzi nga tirhi mitirho ya Tatana, mi nga ndzi pfumeleni.

³⁸Kambe loko ndzi yi tirha, hambi mi nga pfumeri eka mina, pfumelani mitirho leyi, leswaku mi tiva, mi va mi pfumela leswaku Tatana u le ka mina, na mina ndzi le ka yena.”

³⁹Hikwalaho va engeta va lava ku n'wi khoma, kambe a chupuka emavokweni ya vona.

⁴⁰Kutani a tlhela a ya entsungeni wa Yordani, laha Yohane a tshamaka a khuvulela kona eku sunguleni; a xwa kona.

⁴¹Lavo tala va ya eka yena, va ku: “Yohane, yena, a nga endlanga masingita, hambi ri ri rin'we, kambe timhaka hinkwato leti nga vuriwa hi Yohane ehenhla ka loyi, hi tona kunene.”

⁴²Kutani lavo tala va pfumela eka yena kwalaho.