Read tsonga Yohane 13 Bible Online

Yohane 13 - tsonga bible

Yohane 13

¹Nkhuvo wa Paseka loko wu lave ku va kona, Yesu, hi ku tiva leswaku nkarhi wa yena wu fikile wa ku suka emisaveni, ni ku ya eka Tata wa yena, leswi a nga rhandza vanhu va yena va le misaveni, u va rhandze ni ku yisa eku heteleleni.

²Kuteloko ka ha laleriwa, hikuva Diyavulosi a a rhangile a nghenisa embilwini ya Yudasi Iskariyota, n'wana Simoni, ku navela ku n'wi xenga.

³Yesu, hi ku tiva leswaku Tata wa yena u vekile hinkwaswo emavokweni ya yena, ni leswaku u humile eka Xikwembu, kutani u ya eka Xikwembu,

⁴a suka a yima exilalelweni, a tshunxa nguvu ya yena, a teka nceka, a titsimba ha wona.

⁵Kutani a chela mati enkambaneni, a sungula ku hlantswa milenge ya vadyondzisiwa va yena, a sula hi nceka lowu a titsimbeke ha wona.

⁶A ta ni ka Simoni Petro; yeloyi a ku eka yena: “Hosi, xana wena u ta ndzi hlantswa milenge xana?”

⁷Yesu a n'wi hlamula, a ku: “Sweswi, a ku twisisi lexi ndzi xi endlaka, kambe u ta xi twisisa endzhaku.”

⁸Petro a ku eka yena: “U nga ka u nga ndzi hlantswi milenge, ni siku ni rin'we!” Yesu a n'wi hlamula, a ku: “Loko ndzi nga ku hlantswi, a wu na mhaka na mina.”

⁹Simoni Petro a ku eka yena: “Hosi yi nga vi milenge ntsena, kambe na wona mavoko ni nhloko.”

¹⁰Yesu a ku eka yena: “La hlantswiweke a nga na ku hlantswiwa loko yi nga ri milenge ntsena, kutani u ta basa hinkwako; loko mi ri n'wina, mi basile, kambe a hi hinkwenu.”

¹¹Hikuva a a tiva la nga ta n'wi xenga; hikwalaho a nga te: “A mi basanga hinkwenu.”

¹²Kuteloko a hlantswile milenge ya vona, a tekile ni nguvu ya yena, a tlhela a ya tshama etafuleni, a ku eka vona: “Xana ma swi twisisa leswi ndzi mi endleke swona-ke?

¹³Mi ndzi vula Mufundhisi ni Hosi, swona ma vurisa, hikuva ndzi yena.

¹⁴Kutani loko mina ndzi nga Hosi ni Mufundhisi, ndzi mi hlantswile milenge, na n'wina mi fanele ku hlantswana milenge.

¹⁵Hikuva ndzi mi vekele ntila, leswaku mi endla kukotisa leswi ndzi mi endleke swona.

¹⁶“Ndzi vurisile ndzi ri eka n'wina: Nandza a hi nkulu eka hosi ya yena ni murhumiwa a hi nkulu eka la n'wi rhumeke.

¹⁷Loko mi tiva timhaka teto, mi katekile loko mi ti endla.

¹⁸A ndzi vuri n'wina hinkwenu, ndzi tiva lava ndzi va hlawuleke; kambe hileswaku Tsalwa ri ta endleka leri nge: ‘La dyaka vuswa na mina, u ndzi khadlanyile hi xirhendze.’

¹⁹Ndzi mi byela mhaka leyi, kaharhi sweswi, yi nga si humelela, leswaku siku yi humelelaka, mi ta pfumela leswaku hi mina Kriste.

²⁰Ndzi vurisile ndzi ri eka n'wina: La amukelaka loyi ndzi n'wi rhumaka, u mukela mina; la ndzi amukelaka, u amukela la ndzi rhumeke.”

²¹Kuteloko Yesu a vurile timhaka teto, a vaviseka emoyeni, a tiyisa, a ku: “Ndzi vurisile ndzi ri eka n'wina: Un'wana wa n'wina u ta ndzi xenga.”

²²Kwalaho vadyondzisiwa va yena va langutana, va kanakana leswaku u hlambanyisa mani xana.

²³Kambe un'wana wa vadyondzisiwa va yena, loyi Yesu a n'wi rhandzaka, a tiseketele exifuveni xa Yesu.

²⁴Kutani Simoni Petro a n'wi tshunyeta ku vutisa leswaku a vula mani.

²⁵Yeloyi, kuteloko a korhamile exifuveni xa Yesu, a n'wi vutisa, a ku: “Hosi, i mani xana?”

²⁶Yesu a hlamula, a ku: “Hi loyi ndzi nga ta n'wi nyika xiphemu loko ndzi petile.” Kuteloko a petile, a xi nyika Yudasi Iskariyota, n'wana Simoni.

²⁷Kuteloko a tekile xiphemu, Satana a nghena eka yena. Kutani Yesu a ku eka yena: “Leswi u swi endlaka, hatlisa u swi endla.”

²⁸Kambe a ku vanga na un'we wa lava tshameke eswakudyeni, la nga twisisa laha marito lawa ma yisaka kona.

²⁹Hikuva van'wana a va anakanya leswaku leswi Yudasi a nga yena mutameri wa nkwama wa mali, kumbe Yesu a a n'wi byela ku xavela nkhuvo leswi va swi pfumalaka, hambi ku ri ku nyika xisiwana leswo karhi.

³⁰Kuteloko a tekile xiphemu, a hatlisa a huma, byi ri vusiku.

³¹Kuteloko a humile, Yesu a ku: “Sweswi, N'wana wa Munhu u dzunisiwile, kutani Xikwembu xi dzunisiwile ha yena.

³²Loko Xikwembu xi dzunisiwe ha yena, na xona Xikwembu xi ta n'wi dzunisa eka xona, kambe xi ta hatlisa xi n'wi dzunisa.

³³“Vana vanga, ndza ha ri na n'wina ku nga ri kungani, mi ta ndzi lava, kambe hilaha ndzi nga byela Vayuda hakona, ndzi ku: ‘Laha ndzi yaka kona, mi nga ka mi nga ti sweswi, ndzi vurisa sweswo eka n'wina.’

³⁴Ndzi mi vekela nawu lowuntshwa, hileswaku mi rhandzana; kukotisa leswi ndzi mi rhandzeke, rhandzanani, na n'wina.

³⁵Kungakuloko mi rhandzana, hilaha hinkwavo va nga ta tiva leswaku mi vadyondzisiwa va mina.”

³⁶Simoni Petro a ku eka yena: “Hosi, u ya kwihi?” Yesu a n'wi hlamula, a ku: “Laha ndzi yaka kona, u nga ka u nga ndzi landzi sweswi; kambe ndzhaku u ta ndzi landzela kona.”

³⁷Petro a ku eka yena: “Hosi, ndzi nga tsandzeka ha yini ku ku landza sweswi, xana? A ndzi ta tshika vutomi bya mina hikwalaho ka wena.”

³⁸Yesu a n'wi hlamula, a ku: “U ri u nga tshika vutomi bya wena hikwalaho ka mina xana? Ndzi vurisile ndzi ri eka wena: Nkuku loko wu nga si ringa, u ta va u ndzi landzurile kanharhu.