Read tsonga Yohane 20 Bible Online

Yohane 20 - tsonga bible

Yohane 20

¹Hi siku ro sungula ra vhiki, Mariya wa Magadala a vindzuka a ya esirheni, bya ha ri vusiku, kutani a vona leswaku ribye a ri susiwile esirheni.

²Kavaloko a tsutsuma, a ta eka Simoni Petro, ni ka mudyondzisiwa la nga rhandziwa hi Yesu, a ku eka vona: “Va susile Hosi esirheni, kambe a hi tivi laha va n'wi vekeke kona.”

³Kutani Petro a suka ni mudyondzisiwa lowun'wana, va ya esirheni.

⁴Va tsutsuma swin'we havambirhi; kambe mudyondzisiwa lowun'wana a siya Petro, a rhanga a ya fika esirheni.

⁵Kuteloko a korhamile ku hlometela, a vona mikumba yi vekiwile ehansi; kambe a nga nghenanga.

⁶Kutani Simoni Petro la nga n'wi landza, a fika, a nghena esirheni, kutani a vona mikumba vi vekiwile ehansi;

⁷kambe nguvu leyi tsondzeleke nhloko ya yena a yi nga vekiwanga ni tin'wana, kambe a yi petsiwile, yi vekiwile hitlhelo yi ri yoxe.

⁸Mudyondzisiwa lowun'wana, la nga rhanga a fika esirheni, na yena a nghena a swi vona, a va a pfumela.

⁹Hikuva a va nga si twisisa Tsalwa leri vulaka leswaku Kriste u fanele ku pfuka eku feni.

¹⁰Kavaloko vadyondzisiwa va tlhelela ekaya.

¹¹Loko a ri Mariya, a a yimile ehandle, ekusuhi ni sirha, a ri karhi a rila. A ku a ha rila, a korhama ehansi ku hlometela esirheni;

¹²a vona tintsumi timbirhi leti ambaleke swo basa, ti tshamile, yin'wana yi ri enhlokweni, yin'wana yi ri emilengeni, laha ntsumbu wa Yesu ingi wu latiwile kona.

¹³Ti ku eka yena: “Wansati, u rilela yini?” Yena a ku eka tona: “Hikuva va susile Hosi yanga, kambe a ndzi tivi laha va n'wi vekeke kona.”

¹⁴Kuteloko a vurile sweswo, a hundzuluka, a vona Yesu a yimile; kambe a nga n'wi tivanga leswaku i Yesu.

¹⁵Yesu a ku eka yena: “Wansati, u rilela yini? U lava mani xana?” Yena, hi ku ehleketa leswaku i murimi wa ntanga, a ku eka yena: “Hosi, loko u n'wi susile, ndzi byele laha u n'wi vekeke kona, ndzi ta ya ndzi ya n'wi teka.”

¹⁶Yesu a ku eka yena: “Mariya!” Yena a rhendzeleka, a ku eka yena: “Rabuni!” hileswaku “Mufundhisi,” hi Xiheveru.

¹⁷Yesu a ku eka yena: “U nga ndzi khumbi, hikuva a ndzi si tlhandlukela eka Tatana; kambe yana eka vamakwerhu u ya va byela u ku, ndzi tlhandlukela eka Tatana a nga Tata wa n'wina, ni ka Xikwembu xa mina xi nga Xikwembu xa n'wina”.

¹⁸Mariya wa Magadala a ya byela vadyondzisiwa leswaku u vone Hosi, ni leswaku u n'wi byerile timhaka teto.

¹⁹Nimadyambu ya siku rero leri sungulaka vhiki, tinyangwa ti pfariwile laha vadyondzisiwa va hlengeletaneke kona hikwalaho ka ku chava Vayuda, Yesu a ta, a yima exikarhi ka vona, a ku eka vona: “Ku rhula a ku ve na n'wina!”

²⁰Kuteloko a vulavurile sweswo, a va komba swandla ni tsheve ra yena. Kutani vadyondzisiwa va tsaka ngopfu loko va vona Hosi.

²¹Yesu a engeta a ku eka vona: “Ku rhula a ku ve na n'wina! Kukotisa leswi Tatana a ndzi rhumeke, na mina ndzi mi rhumisa sweswo.”

²²Kuteloko a vurise sweswo, a huhutela eka vona, a ku: “Amukelani Moya lowo Kwetsima.

²³Lava mi nga ta va khomela swidyoho, va ta khomeriwa swona; lava mi nga ta va hlayela swona, va ta hlayeriwa swona.”

²⁴Kambe Tomasi, loyi va nge i Didima, un'wana wa lava khume na vambirhi, a a nga ri na vona loko Yesu a ta.

²⁵Kutani vadyondzisiwa van'wana va ku eka yena: “Hi vonile Hosi.” Kambe a ku eka vona: “Kungakuloko ndzi nga voni timbanga ta timhingu emavokweni ya yena, ni loko ndzi nga nghenisi ritiho ranga etimbangeni ta timhingu, ndzi nghenisa ni voko etsheveni ra yena, ndzi nga ka ndzi nga pfumeri.”

²⁶Kuteloko ku hundzile masiku ya ntlhanu na manharhu, vadyondzisiwa a va ri kona endlwini, na yena Tomasi a a ri na vona. Yesu a ta, tinyangwa ti pfariwile, a yima exikarhi ka vona a ku: “Ku rhula a ku ve na n'wina!”

²⁷Kutani a ku eka Tomasi: “Tisa ritiho ra wena la, languta ni swandla swa mina; tshambuluta ni voko ra wena u ri nghenisa etsheveni ra mina, kutani u nga kanakani, kambe u pfumela.”

²⁸Tomasi a hlamula, a ku eka yena: “Hosi yanga ni Xikwembu xanga!”

²⁹Yesu a ku eka yena: “Leswi u ndzi voneke, Tomasi, u pfumerile; va katekile lava pfumelaka, hambi va nga vonanga.”

³⁰Mahlori man'wana layo tala ma kona lama endliweke hi Yesu emahlweni ka vadyondzisiwa va yena, lama nga tsariwangiki ebukwini leyi.

³¹Kambe timhaka leti, ti tsariwile leswaku mi pfumela leswaku Yesu i Kriste, N'wana wa Xikwembu, ni leswaku, hi ku pfumela, mi va ni vutomi evitweni ra yena.