Read tsonga Yohane 6 Bible Online

Yohane 6 - tsonga bible

Yohane 6

¹Endzhaku ka sweswo, Yesu a ya ehase ka lwandle ra Galeliya, ri nga ra Tiberiyo.

²Kutani mitshungu leyikulu yi n'wi landza, hikuva a va vonile mahlori lawa a ma endleke eka lava vabyaka.

³Kutani Yesu a tlhandlukela entshaveni, a ya tshamisa kona ni vadyondzisiwa va yena.

⁴Kambe Paseka ya Vayuda a yi ri ekusuhi.

⁵Yesu, kuteloko a tlakusile mahlo ya yena, a vona ntshungu lowukulu wu ta eka yena, kutani a ku eka Filipi: “Xana hi ta xava kwihi swinkwa leswaku vanhu lava, va dya?”

⁶A vurisa sweswo hi ku n'wi ringa, hikuva a a tiva leswi a nga ta swi endla.

⁷Filipi a n'wi hlamula, a ku: “Swinkwa swa tidenari ta madzana mambirhi, swi nga ka swi nga va ringani, leswaku un'wana ni un'wana a amukela lexitsongo.”

⁸Un'wana wa vadyondzisiwa va yena, Andriya makwa Simoni Petro, a ku eka yena:

⁹“Mufana u kona kwala, la nga ni swinkwa swa ntlhanu swa barley ni tinhlampfi timbirhi, kambe swi nga va yini eka vanhu lavo tala swonghasi xana?”

¹⁰Kambe Yesu a ku: “Tshamisisani vanhu ehansi.” Kambe byanyi a byi tele ngopfu exivandleni xexo. Kutani vavanuna va tshamisa ehansi; loko va hlayiwa a va lava ku va ntlhanu wa makume ya madzana.

¹¹Kutani Yesu a teka swinkwa, kuteloko a khensile, a avela vadyondzisiwa, kutani vona va avela lava tshamiseke; a endlisa sweswo ni tinhlampfi, va ko va xurha.

¹²Kuteloko va xurhile, a ku eka vadyondzisiwa va yena: “Hlengeletani mahlanhla lama seleke, ku nga tshuki ku lova nchumu.”

¹³Va ya hlengeleta va tata swirhundzu swa khume na swimbirhi; hi mahlanhla ya swinkwa swa ntlhanu swa barley, lama siyiweke hi lava nga dya.

¹⁴Vanhu valavo, kuteloko va vonile mahlori lama endliweke hi Yesu, va ku: “Kunene loyi, i muprofeta la faneleke ku ta emisaveni.”

¹⁵Yesu loko a tivile leswaku a va lava ku ta n'wi vutla ku n'wi veka hosi, a tlhelela entshaveni a ri swakwe.

¹⁶Nimadyambu, vadyondzisiwa va yena va ngirimela elwandle,

¹⁷kutani va nghena ebyatsweni, va ku va pela lwandle va ya eKapernawume; kutani mpimavayeni wu va fikela, Yesu a nga si fika eka vona.

¹⁸Kambe lwandle ri pfuxiwa hi mheho leyikulu, leyi hungaka.

¹⁹Kuteloko va tlutile tistadiya ta makume mambirhi na ntlhanu, kumbe makume manharhu, va vona Yesu a famba ehenhla ka mati, a tshinela ekusuhi ni byatso; va chava.

²⁰Kambe a ku eka vona: “Hi mina, mi nga chaveni.”

²¹Kutani a va lava ku n'wi amukela ebyatsweni, kambe hi nomu lowu, byatso byi fika eribuwini laha va kongomeke kona.

²²Loko ri xile, ntshungu lowu seleke ehase ka lwandle a wu vonile leswaku a ku nga ri na byatso kwalaho, loko ri nga ri rin'we ntsena leri vadyondzisiwa va yena va ngheneke eka rona, ni leswaku Yesu a nga nghenanga ni vadyondzisiwa va yena ebyatsweni, kambe vadyondzisiwa va yena a va fambile va ri swavo.

²³Kambe mabyatso man'wana lama humaka eTiberiyo a ma fikile ekusuhi ni laha va nga dyela kona swinkwa, loko Hosi yi khensile.

²⁴Kuteloko mitshungu yi vonile leswaku Yesu ni vadyondzisiwa va yena a va nga ha ri kona kwalaho, va nghena emabyatsweni, va ya eKapernawume va ri karhi va lava Yesu.

²⁵Kuteloko va n'wi kumile entsungeni wa lwandle, va ku eka yena: “Rabi, u tile rini la?”

²⁶Yesu a va hlamula, a ku: “Ndzi vurisile ndzi ri eka n'wina: Ma ndzi lava ku nga ri hi leswi mi nga vona masingita, kambe hi leswi mi nga dya xinkwa, mi va mi xurha.

²⁷Mi nga tirheleni swakudya leswi helaka, kambe tirhelani swakudya leswi nga ta va kona ni le vutomini lebyi nga heriki, leswi mi nga ta swi nyikiwa hi N'wana wa Munhu; hikuva hi yena loyi Xikwembu, a nga Tatana, xi n'wi fungheke.”

²⁸Va ku eka yena: “Hi ta endla yini ku tirha mitirho ya Xikwembu xana?”

²⁹Yesu a va hlamula, a ku: “Hi wona ntirho wa Xikwembu, hileswaku mi pfumela eka loyi xi n'wi rhumeke.”

³⁰Va ku eka yena: “U endla mahlori wahi hi ta ma vona, kutani hi ta pfumela eka wena?

³¹U endla ntirho wihi xana? Vatata wa hina va dyile manna emananga, hilaha ku tsariweke va ku: ‘U va hile vuswa lebyi humaka etilweni, va dya.’ ”

³²Kutani Yesu a ku eka vona: “Ndzi vurisile ndzi ri eka n'wina: Muxe a nga mi nyikanga vuswa lebyi humaka etilweni, kambe Tatana a mi nyika vuswa lebyinene lebyi humaka etilweni.

³³Hikuva vuswa bya Xikwembu hi lebyi xikaka hi le tilweni, lebyi nyikaka misava vutomi.”

³⁴Va ku eka yena: “Hosi, hi nyike vuswa byebyo hi masiku hinkwawo.”

³⁵Yesu a ku eka vona: “Hi mina vuswa bya vutomi; la taka eka mina, a nga ka a nga twi ndlala, ni la pfumelaka eka mina a nga ka a nga twi torha, ni siku ni rin'we.

³⁶Kambe ndzi mi byerile leswaku hambi mi ndzi vonile, a mi pfumelanga.

³⁷Hinkwaswo leswi ndzi swi nyikiwaka hi Tatana, swi ta ta eka mina; la taka eka mina, ndzi nga ka ndzi nga n'wi cukumeteli ehandle.

³⁸Hikuva ndzi xikile hi le tilweni, ku nga ri ku endla ku rhandza ka mina, kambe ku endla ku rhandza ka la ndzi rhumeke.

³⁹Kambe ku rhandza ka Tatana la ndzi rhumeke, hileswaku ndzi nga lahli nchumu wa hinkwaswo leswi a ndzi nyikeke swona, kambe ndzi n'wi pfuxa hi siku ra makumu.

⁴⁰Hi kona ku rhandza ka loyi a ndzi rhumeke, hileswaku un'wana ni un'wana la langutaka N'wana, a pfumela eka yena, a va ni vutomi lebyi nga heriki; kutani mina ndzi ta n'wi pfuxa hi siku ra makumu.”

⁴¹Kambe Vayuda va n'wi hleva hikuva a te: “Hi mina vuswa lebyi xikeke hi le tilweni.”

⁴²Kutani va ku: “Xana loyi a hi Yesu, n'wana wa Yosefa, loyi hi tivaka tata wa yena ni mana wa yena xana? Kutani u vurisa ku yini, leswaku: ‘Ndzi xikile hi le tilweni’?”

⁴³Kambe Yesu a va hlamula, a ku: “Mi nga tshuki mi n'unun'utela.

⁴⁴A ku na munhu la nga taka eka mina, loko a nga kokiwi hi Tatana la ndzi rhumeke, kutani mina ndzi ta n'wi pfuxa hi siku ra makumu.

⁴⁵Ku tsariwile ebukwini ya vaprofeta, va ku: ‘Va ta dyondzisiwa hinkwavo hi Xikwembu.’ Hikwalaho un'wana ni un'wana la yingiseke Tatana, kutani a dyondzisiwa hi yena, u ta eka mina.

⁴⁶A hileswaku munhu a vonile Tatana, loko a nga ri la humaka eka Xikwembu; hi yena la voneke Tatana.

⁴⁷“Ndzi vurisile ndzi ri eka n'wina: La pfumelaka eka mina, u ni vutomi lebyi nga heriki.

⁴⁸Hi mina vuswa bya vutomi.

⁴⁹Vatata wa n'wina va dyile manna emananga, kutani va file.

⁵⁰Hi byo lebyi, vuswa lebyi xikeke hi le tilweni, leswaku munhu la dyaka byona, a nga tshuki a fa.

⁵¹Hi mina vuswa lebyi hanyaka lebyi xikeke hi le tilweni; kungakuloko munhu a dya vuswa lebyi, u ta hanya hi masiku; kutani vuswa lebyi ndzi nga ta byi nyika, i nyama ya mina, leyi ndzi nga ta yi nyika misava, leswaku yi hanya.”

⁵²Vayuda va kanetana, va ku: “Xana yeloyi a nga hi nyikisa ku yini nyama ya yena, hi dya?”

⁵³Yesu a ku eka vona: “Ndzi vurisile ndzi ri eka n'wina: Loko mi nga dyi nyama ya N'wana wa Munhu, ni loko mi nga nwi ngati ya yena, a ku na vutomi eka n'wina.

⁵⁴La dyaka nyama yanga, ni la nwaka ngati yanga, u ni vutomi lebyi nga heriki; kutani ndzi ta n'wi pfuxa hi siku ra makumu.

⁵⁵Hikuva nyama ya mina i swakudya kunene, ni ngati ya mina i swakunwa kunene.

⁵⁶La dyaka nyama yanga, ni la nwaka ngati ya mina, u tshama eka mina, na mina eka yena.

⁵⁷Hilaha Tatana la hanyaka a ndzi rhumeke, kutani ndzi hanya ha Tatana, na yena la ndzi dyaka u ta hanya ha mina.

⁵⁸Vuswa lebyi xikeke hi le tilweni, hi byo lebyi; ku nga ri kukota vatata wa n'wina lava nga dya manna, kutani va file; la dyaka vuswa lebyo, u ta hanya hi masiku hinkwawo.”

⁵⁹Yesu a vula timhaka leti, eKapernawume, a ri karhi a dyondzisa esinagogeni.

⁶⁰Vadyondzisiwa va yena lavo tala, kuteloko va swi yingisile va ku: “Rito leri, ra nonon'hwa; la nga ri twisisaka i mani xana?”

⁶¹Kambe Yesu a a tiva hi ku titivela leswaku vadyondzisiwa va yena va n'unun'uta, hikwalaho ka swona, a ku eka vona: “Xana mhaka leyi, ya mi khunguvanyisa xana?

⁶²Swi to yini loko mi ta vona N'wana wa Munhu a tlhandlukela laha ingi a ri kona khale?

⁶³Moya hi wona lowu hanyisaka; nyama a yi pfuni nchumu. Timhaka leti ndzi mi byelaka tona, i moya ni vutomi.

⁶⁴Kambe van'wana va kona exikarhi ka n'wina lava nga pfumeriki.” (Hikuva Yesu a a tiva ka ha ri eku sunguleni leswaku lava nga pfumeriki i vamani, ni loyi a nga ta n'wi xenga.)

⁶⁵Kutani a ku: “Hikwalaho ndzi nga mi byela, ndzi ku: A ku na munhu la nga taka eka mina, loko a nga nyikiwi hi Tatana.”

⁶⁶Ku sungula hi nkarhi wolowo, vadyondzisiwa va yena lavo tala va tlhelela endzhaku, va nga ha tami va famba na yena.

⁶⁷Kutani Yesu a ku eka lava khume na vambirhi: “Xana na n'wina a mi rhandzi ku tifambela-ke?”

⁶⁸Simoni Petro a hlamula, a ku eka yena: “Hosi, hi nga ya eka mani xana? U ni marito ya vutomi lebyi nga heriki.

⁶⁹Kutani hina hi pfumerile, hi va hi swi tiva leswaku hi wena Kriste, Muhlawuriwa wa Xikwembu.”

⁷⁰Yesu a va hlamula, a ku: “Xana a hi mina ndzi nga mi hlawula, n'wina va khume na vambirhi? Kasi un'wana wa n'wina i demona.”

⁷¹A a vula Yudasi Iskariyota, n'wana Simoni, hikuva hi yena loyi a taka n'wi xenga, yena, un'wana wa lava khume na vambirhi.