Read tsonga Yohane 9 Bible Online

Yohane 9 - tsonga bible

Yohane 9

¹Yesu, kakuloko a hundza, a vona munhu loyi ka hari mpfhuka a tswariwa, a a file mahlo.

²Kutani vadyondzisiwa va yena va n'wi vutisa, va ku: “Rabi, i mani la dyoheke? Xana hi yena kumbe i vatswari va yena, leswi a nga tswariwa a file mahlo?”

³Yesu a hlamula, a ku: “A ku dyohanga yena, hambi va ri vatswari va yena, kambe hileswaku mitirho ya Xikwembu yi kombisiwa ha yena.

⁴Ndzi fanele ku tirha mitirho ya la ndzi rhumeke, dyambu ri nga si pela; vusiku bya ta lebyi munhu a nga tiki tirha ha byona.

⁵Loko ndza ha ri la emisaveni, ndzi ku vonakala ka misava.”

⁶Kuteloko a vulavurile sweswo, a tshwutela marhi ehansi, a pfuva ndzhope hi marhi, kutani a tota mahlo ya lowo fa mahlo hi ndzhope wolowo,

⁷a ku eka yena: “Famba u ya hlamba evuhlambelweni bya Silowama” (hileswaku xirhumiwa).

⁸Lava akeke na yena ni lava nga n'wi vona a ha file mahlo, va ku: “Xana a hi yena loyi a a tshamaka a kombela-ke?”

⁹Van'wana va ku: “Hi yena.” Van'wana va ku: “U fana na yena.” Kambe yena a ku: “Hi mina.”

¹⁰Kutani va ku eka yena: “Mahlo ya wena ma hanyanyisiwe ku yini?”

¹¹A hlamula, a ku: “Munhu loyi va nge i Yesu u pfuve ndzhope a ndzi tota mahlo ha wona, kutani a ku eka mina: ‘Famba evuhlambelweni bya Silowama, u hlamba’; kutani ndzi yile ndzi ya hlamba, kutani ndzi vona.”

¹²Va ku eka yena: “Yeloyi u kwihi?” A ku: “A ndzi n'wi tivi.”

¹³Va n'wi yisa eka Vafarisi loyi ingi a file mahlo.

¹⁴Kambe a ri ri siku ra Savata leri Yesu a nga endla ndzhope ha rona, a n'wi hanyisa mahlo.

¹⁵Vafarisi, na vona, va n'wi vutisa mukhuva lowu a nga hanyanyisiwa ha wona. A ku eka vona: “U ndzi vekele ndzhope emahlweni, kutani ndzi ya hlamba, kutani ndzi tlhela ndzi vona.”

¹⁶Hikwalaho Vafarisi van'wana va ku: “Munhu loyi a hi wa Xikwembu, hikuva a nga hlayisi Savata.” Van'wana va ku: “Mudyohi a nga endlisa ku yini masingita layo tano xana?” Kutani ku hambana ku va kona exikarhi ka vona.

¹⁷Va tlhela va ku eka loyi ingi a file mahlo: “Wena u ri yini ha yena, leswi a nga ku hanyisa mahlo?” A ku: “I muprofeta.”

¹⁸Kambe Vayuda a va pfumelanga leswaku a a file mahlo kutani a tlhela a vona, va kondza va vitana vatswari va yena,

¹⁹va va vutisa, va ku: “Xana loyi, i n'wana wa n'wina, loyi mi nge u tswariwile a file mahlo-ke? U vonisa ku yini sweswi?”

²⁰Vatswari va yena va va hlamula, va ku: “Ha n'wi tiva leswaku i n'wana wa hina ni leswaku u tswariwile a file mahlo;

²¹kambe loko wu ri mukhuva lowu a vonaka ha wona sweswi, a hi wu tivi, ni la n'wi hanyiseke mahlo, a hi n'wi tivi. U ni malembe, n'wi vutiseni, u ta tivula.”

²²Vatswari va yena va vurisa sweswo hi ku chava Vayuda; hikuva Vayuda a va kanerile leswaku loko munhu a n'wi vula Kriste, u ta hlongoriwa esinagogeni.

²³Hikwalaho vatswari va yena va nga te: “U ni malembe, n'wi vutiseni.”

²⁴Va engeta va vitana ra vumbirhi munhu loyi ingi a file mahlo, va ku eka yena: “Dzunisa Xikwembu, ha swi tiva leswaku munhu loyi i mudyohi.”

²⁵Kambe yena a hlamula, a ku: “Loko a ri mudyohi, a ndzi swi tivi; ndzo tiva xilo xin'we ntsena, hileswaku a ndzi file mahlo, kutani ndza vona sweswi.”

²⁶Va engeta va ku eka yena: “U ku endlisile ku yini-ke? U ku pfurile mahlo hi mukhuva wihi-ke?”

²⁷A va hlamula, a ku: “Ndzi tshama ndzi mi byela; xana a mi swi twanga? Xana mhaka leyi, mi rhandza ku yi twa kambe ha yini-ke? Xana na n'wina mi rhandza ku va vadyondzisiwa va yena-ke?”

²⁸Kutani va n'wi rhukana va ku: “Hi wena u nga mudyondzisiwa wa yena; hina hi vadyondzisiwa va Muxe.

²⁹Ha swi tiva leswaku Xikwembu xi vulavurile na Muxe; kambe yeloyi a hi n'wi tivi laha a humaka kona.”

³⁰Munhu loyi a va hlamula, a ku: “I mhaka leyi hlamarisaka kunene loko mi nga n'wi tivi laha a humaka kona, kasi u ndzi hanyanyisile mahlo!

³¹Ha swi tiva leswaku Xikwembu a xi yingisi vadyohi; kambe kungakuloko munhu a chava Xikwembu, a endla hi ku rhandza ka xona, xa n'wi yingisa.

³²A hi si swi twa ni siku ni rin'we leswaku munhu u hanyisile mahlo ya un'wana la nga tswariwa a file mahlo.

³³Loko loyi, a a nga ri wa Xikwembu, a a nga ti endla nchumu.”

³⁴Va n'wi hlamula, va ku: “Wena, u tswariwile eswivini wena hinkwako, kasi u hi dyondzisa-ke?” Kutani va n'wi hlongolela ehandle.

³⁵Yesu a swi twa leswaku va n'wi hlongolele ehandle; kuteloko a n'wi kumile, a ku eka yena: “Xana wa pfumela eka N'wana wa Xikwembu xana?”

³⁶A hlamula, a ku: “I mani, Hosi, ndzi ta pfumela eka yena?”

³⁷Yesu a ku eka yena: “U n'wi vonile, hi yena la vulavulaka na wena.”

³⁸Yena a ku: “Ndza pfumela, Hosi.” Kutani a n'wi khinsamela.

³⁹Yesu a ku: “Ndzi tile emisaveni leyi, ku avanyisa, leswaku lava nga voniki va vona; ni leswaku lava vonaka, va hundzuka lavo fa mahlo.”

⁴⁰Vafarisi van'wana lava ngi va ri na yena kwalaho, kakuloko va twa mhaka leyi, va ku eka yena: “Na hina hi file mahlo xana?”

⁴¹Yesu a ku eka vona: “Loko ingi mi file mahlo, a mi nga ti va na nandzu; kambe sweswi mi nge: ‘Ha vona,’ hikwalaho xidyoho xa n'wina xi tshama eka n'wina.