Read tsonga Timhaka 10 Bible Online

Timhaka 10 - tsonga bible

Timhaka 10

¹Emutini wa Khezariya a ku ri ni munhu loyi va nge i Korneliyo; a a ri ndhuna ya dzana entlaweni lowu vuriwaka Italiya;

²a a ri munhu wa vukhongeri, la chavaka Xikwembu kun'we ni va yindlu ya yena hinkwavo; a a hanana ngopfu eka swisiwana swa tiko; a nga rhuteri ku khongela Xikwembu.

³Siku rin'wana, a vona mahlori hi nkarhi wa ntlhanu na mune; a vonisisa ntsumi ya Xikwembu yi nghena eka yena, yi ku eka yena: “Korneliyo!”

⁴Yena loko a yi langutile, a tshuka hi ku chava, a ku: “Ku ni yini, Hosi?” Yi ku eka yena: “Mikhongelo ni ku hanana ka wena swi tlhandlukele emahlweni ka Xikwembu swi va switsundzuko eka xona.

⁵Sweswi rhuma eYopa vavanuna, va ya teka Simoni la thyiweke Petro.

⁶U hambukele eka munhu loyi va nge i Simoni, mutlhuvutsi, loyi yindlu ya yena yi nga ekusuhi ni lwandle.”

⁷Kuteloko ntsumi leyi vulavuleke na yena yi sukile, a vitana malandza mambirhi ya yena swin'we ni nhenha leyi chavaka Xikwembu eka lava tshamaka na yena;

⁸kutani a va byela timhaka hinkwato, a va rhuma eYopa.

⁹Siku leri tlhandlamaka, kakuloko va ha ri endleleni, va ri karhi va tshinelela muti, Petro a tlhandlukela elwangwini a ya khongela; a ku lava ku va nkarhi wa ntlhanu na wun'we.

¹⁰Kutani a twa ndlala, a rhandza ku dya. Kakuloko va ha n'wi lunghisela swakudya, a vona mahlori.

¹¹A vona tilo ri handzuriwile, ni xilo lexi fanaka ni nguvu leyikulu, xi xikela eka yena xi bohiwile etinhleni ta mune, xi nembeletiwa emisaveni;

¹²endzeni ka xona, a ku ri ni hinkwaswo leswi hanyaka emisaveni, swa mune wa milenge, ni leswi kokovaka, ni tinyanyana ta tilo.

¹³Kutani rito ri fika eka yena, ri ku: “Petro! Suka u yima, u tlhava, u dya!”

¹⁴Kambe Petro a ku: “Swi nga tshuki swi va tano, Hosi, hikuva a ndzi si dya xilo lexi yilaka, hambi xi ri lexi nyameke.”

¹⁵Rito ri engeta ri ku eka yena ra vumbirhi: “Swilo leswi Xikwembu xi nga swi basisa u nga vuli leswaku swa yila.”

¹⁶Kutani swoleswo swi endliwa kanharhu; kutani xilo lexi xi tlhela xi tlhandlukiseriwa etilweni.

¹⁷Petro, loko a ri karhi a anakanya mahlori lawa a ma voneke, leswaku ma yisa kwihi, ku fika vavanuna lava rhumiweke hi Korneliyo, va vutisa yindlu ya Simoni, va yime enyangweni.

¹⁸Kuteloko va vitanile va vutisa leswaku xana Simoni loyi va nge i Petro u tshama kona-ke.

¹⁹Kutani Petro loko a ri karhi a ha anakanya mahlori lawa, Moya wu ku eka yena: “Vona, vavanuna vanharhu va ku lava;

²⁰yima u xika, u famba na vona u nga kanakani, hikuva hi mina ndzi va rhumeke.”

²¹Kutani Petro a xikela eka vavanuna lava, a ku: “Hi mina loyi mi n'wi lavaka; mi tile hi mhaka yihi?”

²²Va ku: “Korneliyo ndhuna ya dzana, wanuna la lulameke, la chavaka Xikwembu, la dzunisiwaka hi tiko hinkwaro ra Vayuda, u lerisiwile hi ntsumi leyo kwetsima ya Xikwembu ku ku vitanela emutini wa yena, a ta yingisa leswi u nga ta n'wi byela swona.”

²³Kutani Petro a va vitanela endlwini, a va rhurhela kona. Ni mixo, Petro a suka na vona; kambe vamakwavo van'wana va Yopa va famba na yena.

²⁴Siku leri tlhandlamaka, va nghena eKhezariya. Kambe Korneliyo a a va langutele, a a vitanile maxaka ya yena, ni vanakulobye va nga varhandziwa va yena.

²⁵Kakuloko Petro a nghena, Korneliyo a hlangana na yena, a tiwisela emilengeni ya yena, a n'wi khinsamela.

²⁶Kambe Petro a n'wi pfuxa, a ku: “Pfuka, na mina ndzi munhu ntsena.”

²⁷Kavaloko a nghena na yena, va ri karhi va vulavula swin'we; kutani a kuma vanhu lavo tala va hlengeletene kona.

²⁸Kutani a ku eka vona: “Ma swi tiva leswaku Muyuda a nga pfumeleriwi ku hlangana ni wamatiko, hambi ku ri ku nghena ekaya ka yena; kambe Xikwembu xi ndzi kombisile leswaku ndzi nga tshuki ndzi vula munhu, hambi a ri mani na mani, leswaku u ni thyaka, kumbe u nyamile.

²⁹Hikwalaho, loko ndzi vitaniwa, ndzi tile ntsena, a ndzi alanga; kutani sweswi, ndza mi vutisa mhaka leyi mi ndzi vitaneleke yona.”

³⁰Kavaloko Korneliyo a hlamula, a ku: “Ku hundzile mune wa masiku ku fika sweswi, ndzi titsona swakudya, ndzi khongela endlwini ya mina hi nkarhi wa ntlhanu na mune; kutani ndzi vona munhu a yimile emahlweni ka mina, a ambele tinguvu leti vangamaka, a ku:

³¹‘Korneliyo, mikhongelo ya wena yi yingisiwile, ni ku hanana ka wena ku fikile emahlweni ka Xikwembu xi va xitsundzuxo eka xona.

³²Sweswi, rhuma vanhu eYopa va ya vita Simoni la thyiweke Petro; u hambukele endlwini ya Simoni mutlhuvutsi, leyi nga ekusuhi ni lwandle; kutakuloko a tile, hi yena la nga ta vulavula na wena.’

³³Hikwalaho ndzi hatliseke ku rhuma vanhu eka wena; kambe u endlile swona loko u tile; sweswi, hinkwerhu hi tshamile la, kun'we emahlweni ka Xikwembu, ku yingisa hinkwaswo leswi Xikwembu xi ku leriseke swona.”

³⁴Kutani Petro a ahlamisa nomu a ku: “Kunene ndza swi vonisisa leswaku Xikwembu a xi yi hi nghohe ya vanhu;

³⁵kambe exikarhi ka matiko hinkwawo, loyi a xi chavaka, a endla leswi lulameke, xa n'wi tsakela.

³⁶Hi rona rito leri xi ri rhumeleke vana va Israele loko xi vula ku rhula ha Yesu Kriste yi nga Hosi ya hinkwavo.

³⁷Ma ti tiva na tona timhaka leti humeleleke etikweni hinkwaro ra Yudiya, leti sunguleke hi ra Galeliya, endzhaku ka ku khuvula loku dyondzisiweke hi Yohane;

³⁸ti nga ta Yesu wa Nazareta, leswaku Xikwembu xi n'wi cherile hi Moya lowo Kwetsima ni matimba a va a famba hinkwako, a ri karhi a endla swinene, a horisa hinkwavo lava fumiweke hi Diyavulosi, hikuva Xikwembu a xi ri na yena.

³⁹Kutani hina hi timbhoni ta timhaka hinkwato leti a ti endleke etikweni ra Vayuda, ni le Yerusalema; kambe va n'wi dlayile hi ku n'wi hayeka emhandzeni.

⁴⁰Kambe Xikwembu xi n'wi pfuxile eku feni esikwini ra vunharhu, kutani xi n'wi humesile erivaleni,

⁴¹ku nga ri ka tiko hinkwaro, kambe ku ri ka timbhoni leti Xikwembu xi ti hlawuleke eku sunguleni, hi nga hina lava hi nga dya, hi nwa na yena, loko a pfukile eku feni.

⁴²Kutani u hi lerisile ku dyondzisa tiko ni ku tiyisa leswaku hi yena la vekiweke hi Xikwembu a va muavanyisi wa lava hanyaka ni lava feke.

⁴³Hi yena vaprofeta hinkwavo va n'wi vuleke hi mhaka leyi nge: Un'wana ni un'wana la pfumelaka eka yena, u ta kuma ku khomeriwa ka swidyoho hi vito ra yena.”

⁴⁴Kakuloko Petro a ha vulavula marito walawo, Moya lowo Kwetsima wu xikela ehenhla ka hinkwavo lava yingisaka rito.

⁴⁵Kutani vapfumeri hinkwavo lava ngi va ri va ku yimba, lava teke na Petro, va hlamala loko va vona leswaku nyiko ya Moya lowo Kwetsima yi cheleriwa ni ka vamatiko,

⁴⁶hikuva va va twa va vulavula tindzimi tin'wana, va dzunisa Xikwembu.

⁴⁷Kutani Petro a hlamula, a ku: “Xana sweswi, i mani la nga alaka ni mati, leswaku va nga khuvuriwi, kasi va amukele Moya lowo Kwetsima kukotisa hina?”

⁴⁸Kutani a lerisa leswaku va khuvuriwa hi vito ra Yesu Kriste. Kambe va n'wi kombela leswaku a xwa na vona masiku ma nga ri mangani.