Read tsonga Timhaka 15 Bible Online

Timhaka 15 - tsonga bible

Timhaka 15

¹Van'wana lava humeke eYudiya, va dyondzisa vamakwavo, va ku: “Loko mi nga yimbanga hi nawu wa Muxe, mi nga ka mi nga poni.”

²Kambe Pawulo na Barnaba va hlamulana ngopfu na vona, va tengisana hi matimba; kutani ku kaneriwa leswaku Pawulo na Barnaba va ta ya eYerusalema, va ri ni van'wana va vona, ku ya vutisa mhaka leyi eka vaapostola ni ka vakulukumba.

³Kuteloko va rhumisiwile sweswo hi kereke, va tsemakanya Fenikiya na Samariya, va ri karhi va vula ku hundzuka ka vamatiko; kutani vamakwavo hinkwavo va tsakela mhaka leyi ngopfungopfu.

⁴Kuteloko va fikile eYerusalema, va amukeriwa hi kereke, ni vaapostola, ni vakulukumba; kutani va va byela hinkwaswo leswi Xikwembu xi swi endleke ha vona.

⁵Kambe van'wana va dyondzo ya Vafarisi, lava pfumeleke, va yima va ku: “Swa fanela leswaku vamatiko va yimba, va lerisiwa ni ku hlayisa nawu wa Muxe.”

⁶Kutani vaapostola ni vakulukumba va hlengeletana ku kamba mhaka leyi.

⁷Kuteloko va kanerile ngopfu, Petro a yima, a ku eka vona: “Vavanuna varikwerhu, ma swi tiva leswaku khale Xikwembu xi ndzi hlawurile exikarhi ka n'wina, leswaku vamatiko va yingisa rito hi nomu wa mina, va va va pfumela.

⁸Kambe Xikwembu lexi tivaka timbilu, xi vekile vumbhoni eka vona hi ku va nyika Moya lowo Kwetsima kukotisa hina;

⁹kambe a xi hambanyisanga nchumu exikarhi ka hina na vona, hikuva xi basisile timbilu ta vona hi ku pfumela.

¹⁰Kutani sweswi, mi ringela yini Xikwembu loko mi veka enhan'wini ya vadyondzisiwa mpingu lowu vatata wa hina, hambi hi ri hina, hi hlulekeke ku wu rhwala xana?

¹¹Kasi hi pfumela leswaku hi ta hanyisiwa hi tintswalo ta Hosi Yesu kukotisa vona.”

¹²Kavaloko ntshungu hinkwawo wu miyela; kutani va yingisa Barnaba na Pawulo loko va ri karhi va vula hilaha Xikwembu xi endleke swikombiso ha vona, ni masingita layo tala exikarhi ka matiko.

¹³Kuteloko va miyerile, Yakobo a vulavula a ku: “Vavanuna varikwerhu, ndzi yingiseni;

¹⁴Simoni u mi amberile hilaha Xikwembu xi nga sungula ku endzela vamatiko, ku tihumesela exikarhi ka vona tiko leri hlayisaka vito ra xona.

¹⁵Na tona timhaka ta vaprofeta ti pfumelelana kona, hilaha ku tsariweke leswaku:

¹⁶‘Endzhaku ka sweswo, ndzi ta vuya, ndzi pfuxeta tabernakela ya Davhida leyi weke, ndzi pfuxeta ni xita xa yona, ndzi xi yimisa,

¹⁷leswaku vanhu lava seleke va lava Hosi, na wona matiko hinkwawo lawa vito ra mina ri khongeriwaka ehenhla ka wona;

¹⁸ku vula Hosi leyi endlaka swilo leswi hinkwaswo leswi nga tiviwa hi yona, ni le ku sunguleni.’

¹⁹“Hikwalaho, ndzi avanyisa leswaku vamatiko lava hundzukelaka eka Xikwembu, va nga tshuki va karhatiwa,

²⁰kambe va tsaleriwa leswaku va tshika thyaka ra swifaniso, ni vuoswi, ni leswi dlayiweke hi xihluku, ni ngati;

²¹hikuva ku sukela etinxakeni ta khale, Muxe u ni lava n'wi vulaka emutini wun'wana ni wun'wana, leswi a hlayiwaka emasinagogeni hi masiku hinkwawo ya Savata.”

²²Hikwalaho, vaapostola ni vakulukumba, va ri ni kereke hinkwayo va vona leswaku swi nga saseka loko va hlawula vavanuna exikarhi ka vona, va ta va rhuma eAntiyoka, kun'we na Pawulo na Barnaba; mavito ya vona i Yuda la thyiweke Barsaba, na Silasi, va ri vavanuna lava tshembiweke exikarhi ka vamakwavo.

²³Va tsala teto ha vona, va ku: “Vaapostola, ni vakulukumba, ni vamakwavo, eka vamakwerhu vamatiko, lava nga eAntiyoka, na Siriya, na Kilikiya, xewani!

²⁴“Leswi hi tweke leswaku van'wana lava humeke eka hina va mi tshukisile hi ku vulavula ka vona, va tsekatsekisa mimoya ya n'wina, va ku: Mi fanele ku yimba, ni ku hlayisa nawu, kasi hina a hi va lerisanga nchumu;

²⁵kwalaho hi twanene hi ri mbilu yin'we, hi vonile leswaku swi sasekile loko hi hlawula vavanuna ni ku va rhumela eka n'wina va ri ni varhandziwa va hina,

²⁶Pawulo na Barnaba, va nga vavanuna lava tshikeleke vito ra Hosi ya hina Yesu Kriste vutomi bya vona.

²⁷Hikwalaho, hi mi rhumelaka Yuda na Silasi; kambe, na vona, va ta mi byela hi nomu timhaka ti ri tin'we.

²⁸Hikuva moya wa Xikwembu swin'we na hina, hi vonile leswaku swi sasekile loko hi nga mi tikerisi hi swin'wana, loko swi nga ri leswi fanelaka,

²⁹ku nga ku chava leswi tlhaveriweke swifaniso, ni ngati, ni leswi feke hi xihluku, ni vuoswi; loko mi titsona swilo leswi, mi ta va mi endle swinene. “Salani hi ku tsaka!”

³⁰Volavo, kakuloko va rhumiwile sweswo, va fika eAntiyoka, va hlengeleta vunyingi kutani va va nyika tsalwa leri.

³¹Kuteloko va ri hlayile, va tsaka ngopfu hi ku khongotela kuloko.

³²Kambe Yuda na Silasi, hikuva a va ri vaprofeta na vona, va khongotela vamakwavo hi marito layo tala, ni ku va tiyisa.

³³Kambe loko va xwile kona masiku, vamakwavo va va tshika va tlhelela hi ku rhula eka lava va va rhumeke.

³⁴Hambiswiritano, Silasi a rhandza ku tshama kona.

³⁵Kambe Pawulo na Barnaba va tshama eAntiyoka, va dyondzisa, va vula rito ra Evhangeli ya Hosi, va ri ni van'wana lavo tala.

³⁶Loko ku hundzile masiku man'wana, Pawulo a ku eka Barnaba: “A hi tlhele hi ya endzela vamakwerhu emitini hinkwayo leyi hi nga vula rito ra Hosi eka yona, hi vona hilaha va hanyaka hakona.”

³⁷Kavaloko Barnaba a rhandza ku teka Yohane, la thyiweke Marka.

³⁸Kambe Pawulo a anakanya leswaku a nga faneri ku teka loyi a nga va tshika ePamfiliya, a nga yanga na vona entirhweni wa vona.

³⁹Ku holovelana ku humelela hikwalaho exikarhi ka vona, va kondza va avana. Kutani Barnaba a teka Marka, a tlutela eKipra.

⁴⁰Kambe Pawulo a tihlawulela Silasi, kutani a suka, a nyiketiwile etintswalweni ta Xikwembu hi vamakwavo.

⁴¹Kutani a tsemakanya Siriya na Kilikiya, a ri karhi a tiyisa tikereke.