Read tsonga Timhaka 17 Bible Online

Timhaka 17 - tsonga bible

Timhaka 17

¹Kuteloko va hundzile eAmfipoli na Apoloniya, va ta eTesalonika, laha sinagoga ya Vayuda ingi yi ri kona.

²Kutani Pawulo, hilaha a toloveleke hakona, a nghena eka vona; kutani hi Tisavata tinharhu a hlamulana na vona hi Matsalwa.

³A va hlamusela, ni ku va komba leswaku a swi fanela leswaku Kriste a twisiwa ku vaviseka, ni ku pfuka eku feni, kutani a ku: “Kriste loyi, hi yena Yesu yeloyi ndzi mi byelaka yena.”

⁴Kutani van'wana exikarhi ka vona va pfumela, va hlangana na Pawulo na Silasi, va ri ni vunyingi lebyikulu bya Vagriki lava gandzelaka Xikwembu, ni vavasati lavo tala lavakulu.

⁵Kambe Vayuda va tala mavondzo, va teka vavanuna van'wana vo biha entsendzeleni, va endla ntshungu, va pfilunganya muti; kutani va rhendzela yindlu ya Yasoni, va lava Pawulo na Silasi ku va yisa emahlweni ka tiko.

⁶Kuteloko va nga va kumi, va kokela Yaso ni vamakwavo van'wana emahlweni ka tindhuna ta muti, va huwelela, va ku: “Vanhu lava pfilunganyeke misava hinkwayo, va tile ni le halenu, kambe Yasoni u va amukerile;

⁷kasi vona hinkwavo va ala ku lerisa ka Khezari, va ku: ‘Hosi yin'wana yi kona, a nga Yesu.’ ”

⁸Sweswo va pfuxa tiko ni tindhuna ta muti leti nga twa timhaka teto.

⁹Kambe, kuteloko ti nyikiwe xikhensanandzu hi Yasoni ni van'wana, ti va tshika va famba.

¹⁰Nivusiku, vamakwavo va hatlisa va rhuma Pawulo na Silasi eBeriya. Kuteloko va fikile kona, va nghena esinagogeni ya Vayuda.

¹¹Vona va tlurisa Vatesalonika hi mafundza, va amukela rito hi ku hatlisa ngopfu, va kambela tibuku hi masiku hinkwawo, ku tiva leswaku timhaka ti tano xana.

¹²Kutani lavanyingi exikarhi ka vona va pfumela, ni vavasati lavakulu va Vagriki, ni vavanuna lavo tala.

¹³Kambe Vayuda va Tesalonika, loko va twa leswaku rito ra Xikwembu ri vulavuriwa hi Pawulo ni le Beriya, va ya kona, va pfilunganya tiko.

¹⁴Hikwalaho vamakwavo va hatlisa va humesa Pawulo a ya tlhelo ra lwandle; kambe Silasi na Timotiya va sala kona.

¹⁵Kutani lava heleketaka Pawulo, va n'wi fikisa eAtena, kambe va tlhela loko va lerisiwile ku byela Silasi na Timotiya leswaku va hatlisa va ya eka yena.

¹⁶Pawulo, kakuloko a ha va langutela eAtena, moya wa yena wu tlhaveka endzeni ka yena, loko a vona muti wu tele hi swifaniso leswi gandzeriwaka.

¹⁷Kutani a hlamulana esinagogeni ni Vayuda ni lava chavaka Xikwembu, a endlisa sweswo ni le hubyeni hi masiku hinkwawo ni lava a hlanganaka na vona.

¹⁸Kambe tintlhari tin'wana ta dyondzo ya Epikuro ni ya Switoyika, va hlamulana na yena; kutani van'wana va ku: “Xana xivulavuri lexi, xi ri yini?” Van'wana va ku: “Wa ngi i mufundhisi wa swikwembu swin'wana,” hikuva a a va byela ta Yesu ni ta ku pfuka ka vafi.

¹⁹Kutani va n'wi khoma, va n'wi yisa ehubyeni ya Areyopago, va ku: “Xana hi nga tiva dyondzo leyintshwa leyi u yi vulaka xana?

²⁰Hikuva u tisile timhaka tin'wana leti hlamarisaka etindleveni ta hina; hikwalaho hi rhandzaka ku ti tiva leswaku hi leto yini.”

²¹Kambe loko va ri va Atena hinkwavo, ni lava luveleke kona, a va nga tirhi nchumu loko ku nga ri ku rungula, kumbe ku yingisa timhaka letintshwa. Kavaloko Pawulo a yima exikarhi ka Areyopago, a ku:

²²“Vavanuna va Atena, ndzi vona leswaku eka swilo hinkwaswo, mi vanhu lava chavaka swikwembu ku tlurisisa.

²³Hikuva loko ndzi famba ndzi languta magandzelo ya n'wina, ndzi kumile alitari laha ku tsariweke va ku: ‘Eka Xikwembu lexi nga tiviwiki!’ Sweswi, Xikwembu lexi mi xi gandzelaka mi nga xi tivi, hi lexi ndzi mi byelaka xona.

²⁴Xikwembu lexi nga endla misava ni hinkwaswo leswi nga eka yona, yi nga yona Hosi ya matilo ni misava, xi nga ka xi nga aki etitempeleni leti akiweke hi mavoko;

²⁵na kona, a xi tirheriwi hi mavoko ya vanhu, swange hiloko xi pfumala xilo ni xin'we; kasi hi xona xi nyikaka hinkwavo vutomi, ni ku hefemula, ni swilo hinkwaswo.

²⁶Kambe xi endlile vanhu va tinxaka hinkwato hi ngati yin'we, ku aka ehenhla ka misava hinkwayo; xi lerisile tinguva leti hlawuriweke hi xona ni mindzilekana ya ku aka ka vona,

²⁷swi ri leswaku va lava Xikwembu, leswaku kumbexana va nga xi ambamba, ni ku xi kuma, hambi xi nga ri kule eka un'wana ni un'wana wa hina;

²⁸hikuva eka yena hi ni vutomi, ni ku fambafamba, ni ku hanya; kukotisa loko vabumabumeri van'wana va n'wina va nga vula, va ku: ‘Hi rixaka ra xona kunene.’

²⁹Kutani leswi hi nga rixaka ra Xikwembu, a hi fanelanga ku anakanya leswaku vukwembu byi fana ni nsuku, hambi ntsopfu, kumbe ribye, yi nga mitirho ya vutlhari ni miehleketo ya vanhu.

³⁰Kambe Xikwembu xi tshikile masiku leswaku ma hundza walawo ya ku pfumala ku tiva, kutani sweswi, xi lerisa vanhu hinkwavo, ematikweni hinkwawo, leswaku va hundzuka.

³¹Hikuva xi vekile siku leri xi nga ta avanyisa misava ha rona hi mukhuva lowo lulama, hi wanuna loyi xi n'wi hlawuleleke swona; kutani xi tiyisile eka hinkwavo mhaka leyi, hi ku n'wi pfuxa eku feni.”

³²Kambe loko va twa mhaka ya ku pfuka ka vafi, van'wana va hleka van'wana va ku: “Ha ha ta tlhela hi ku yingisa kambe emhakeni leyi.”

³³Kavaloko Pawulo a suka exikarhi ka vona.

³⁴Kambe vavanuna van'wana va n'wi namarhela, va pfumela; exikarhi ka vona, un'wana a a ri Diyonisiyo wa Areyopago, ni wansati loyi va nge i Damarisi, va ri ni van'wana.