Read tsonga Timhaka 19 Bible Online

Timhaka 19 - tsonga bible

Timhaka 19

¹Apolosi, kakuloko a ri Korinto, Pawulo a tsemakanya matiko ya eAsiya hitlhelo ra le henhla, a ta eEfesa;

²kuteloko a kumile kona vadyondzisiwa van'wana, a ku eka vona: “Xana mi amukerile Moya lowo Kwetsima siku mi pfumeleke xana?” Va ku eka yena: “A hi si twa leswaku ku ni Moya lowo Kwetsima.”

³A ku eka vona: “Mi khuvuriwile hi ku khuvula kwihi-ke?” Va ku: “Hi ku khuvula ka Yohane.”

⁴Kutani Pawulo a ku: “Kunene, Yohane u khuvurile hi ku khuvula ka ku hundzuka, a ri karhi a byela tiko leswaku va pfumela eka loyi a taka endzhaku ka yena, a nga Yesu.”

⁵Kuteloko va twa sweswo, va khuvuriwa hi vito ra Hosi Yesu.

⁶Kuteloko Pawulo a va tlhandlekile mavoko, Moya lowo Kwetsima wu ta ehenhla ka vona; kutani va vulavula hi tindzimi, va ri karhi va profeta.

⁷Vavanuna lavo a va lava ku va khume na vambirhi.

⁸Kutani Pawulo a nghena esinagogeni, a vulavula a nga chavi, a hlamulana ni Vayuda hi tin'hweti tinharhu, a va khorwisa etimhakeni ta ku fuma ka Xikwembu.

⁹Kambe van'wana, kakuloko va ti nonon'hwisa ni ku tialela, va sola ni ndlela ya Hosi emahlweni ka vunyingi, a suka eka vona, a hlawula vadyondzisiwa; kutani a dyondzisa hi masiku hinkwawo exikolweni xa Tirano.

¹⁰Timhaka teto ti tshama ti va tano hi malembe mambirhi; hikwalaho, hinkwavo lava akeke eAsiya, Vayuda ni Vagriki, va yingisa rito ra Hosi.

¹¹Kambe Xikwembu a xi ri karhi xi endla mahlori lama hlamarisaka ngopfu hi mavoko ya Pawulo;

¹²va kondza va veka ehenhla ka lava vabyaka maduku ni tinguvu leti khumbeke miri wa yena, kutani mavabyi ma suka, ni mimoya leyo biha yi huma eka vona.

¹³Kambe Vayuda van'wana, ti nga tin'anga leti vulaka leswaku ti humesa mademona, ti ringa ku khongela vito ra Hosi Yesu henhla ka lava ngheniweke hi mimoya leyo biha, ti ku: “Ha mi lerisa ha Yesu loyi Pawulo a n'wi vulaka.”

¹⁴Kutani lava endlaka sweswo, a va ri ntlhanu na vambirhi, va ri vana va Skeva, Muyuda, muprista lonkulu.

¹⁵Kambe moya lowo biha wu va hlamula, wu ku: “Ndza n'wi tiva Yesu, ndzi tiva na Pawulo, kambe n'wina mi vamani-ke?”

¹⁶Kutani munhu loyi demona ri nga eka yena, a va pfukela, a va hlula, a va vavisa hi matimba, va ko va tsutsuma, va huma endlwini leyi, va nga ha ri na tinguvu, va ri ni timbanga.

¹⁷Mhaka leyi, yi tiviwa hi Vayuda ni Vagriki, kutani va wela hinkwavo hi nchavo lowukulu; kutani vito ra Hosi Yesu ri dzunisiwa.

¹⁸Kutani lava pfumeleke lavo tala va ta va tivula, va vula swiendlo swa vona.

¹⁹Kambe lavo talanyana eka lava nga tirha swa vutlhari bya munyama, va tisa tibuku ta vona, va ti hisa emahlweni ka hinkwavo; kutani loko ku hlayiwa nxavo wa tona, va kuma leswaku wu ringana macheleni ya ntlhanu wa makume ya madzana.

²⁰Hi mukhuva wolowo, rito ra Hosi ri andza, ri kuma matimba.

²¹Hinkwaswo leswo loko swi herile, Pawulo a ehleketa ku ya eYerusalema, a ta hundza eMakedoniya, ni le Akaya, a ku: “Kutakuloko ndzi yile kona, ndzi fanela ni ku vona eRhoma.”

²²Kavaloko a rhumela eMakedoniya vambirhi va lava n'wi tirhelaka, a ri Timotiya na Erasto; loko a ri yena, a xwa masiku man'wana eAsiya.

²³Kambe enkarhini wolowo, dzolonga lerikulukumba ngopfu ri humelela hikwalaho ka ndlela ya Hosi.

²⁴Hikuva mufuri un'wana wa nsuku, loyi va nge i Demetriyo, la fulaka titempelenyana ta Artemi ta silivhere, a a fuwise vatirhi va yena;

²⁵kuteloko a va hlengeletile swin'we ni vatirhi va ntirho wolowo, a ku eka vona: “Vavanuna, ma swi tiva leswaku ku tsaka ka hina ku huma ebindzwini leri;

²⁶kutani ma swi vona, ni ku swi twa leswaku Pawulo loyi, u khorwisile vanhu lavo tala, ku nga ri eEfesa ntsena, kambe swi lava ku va etikweni ra Asiya hinkwaro, a va hambukisa, a ku: ‘Swikwembu leswi endliweke hi mavoko a hi swikwembu.’

²⁷Kambe a hi faneri ku chava ntsena leswaku ntirho wa hina wu nga soriwa, swi nga tshuka kumbe ni xigandzelo xa Artemi, xikwembu lexikulu, xi nga endliwa mafenya, kutani vuhosi bya loyi a gandzeriwaka hi tiko ra Asiya hinkwaro, ni matiko hinkwawo, byi nga hundzuka mafenya.”

²⁸Kakuloko va twa sweswo, va tala hi vukari, va ba huwa, va ku: “U nkulu, Artemi wa Vaefesa!”

²⁹Kutani muti hinkwawo wu tala dzolonga, kuteloko va khomile Gayo na Aristarka, Vamakedoniya, vanakulobye va Pawulo, va tsutsuma swin'we eteatro.

³⁰Kakuloko Pawulo a rhandza ku humelela emahlweni ka tiko; vadyondzisiwa va n'wi sivela;

³¹ni van'wana va le Asiya, lava nga vanakulobye va yena, va rhumela eka yena, va n'wi khongela leswaku a nga tshuki a humelela eteatro.

³²Kavaloko van'wana va huwelela swin'wana, van'wana swin'wana, hikuva nhlengeletano a yi endla dzolonga, kutani vunyingi a byi nga tivi lexi byi xi tsombaneleke.

³³Kambe va humesa Aleksandro evunyingini, a susumeteriwa emahlweni hi Vayuda; kutani Aleksandro a koweta hi voko, a rhandza ku tihlamulela eka tiko.

³⁴Kambe, kuteloko va vonile leswaku i Muyuda, va huwelela hinkwavo hi rito rin'we, hi mikarhi leyi laveke ku va mimbirhi, va ku: “U nkulu, Artemi wa Vaefesa!”

³⁵Kavaloko mutsari wa muti a miyeta vunyingi, a ku: “Vavanuna va Efesa, hi wihi munhu la nga tiviki leswaku muti wa Vaefesa wu hlawuleriwile ku hlayisa Artemi, xikwembu lexikulu, ni xifaniso xa xona lexi weke hi le tilweni?

³⁶Kutani timhaka teto loko ti nga ri na ku kanetiwa, swi fanela leswaku mi miyela, mi nga tshuki mi endla nchumu hi ku hatlisisa;

³⁷hikuva vavanuna lava mi va tiseke kwala, a hi vaonhi hambi vasandzi va xikwembu xa n'wina.

³⁸Demetriyo ni vatirhi va yena, loko va ri ni ku tengisana ni un'wana, huvo yi pfulekile, ni vaavanyisi va kona: A va hehlane!

³⁹Kambe kungakuloko mi ri ni mhaka leyi mi yi tengaka, yi nga avanyisiwa enhlengeletanweni leyi nga ni mfanelo.

⁴⁰Hikuva kumbe hi nga va ekhombyeni ra ku vutisiwa nandzu wa dzolonga ra namuntlha; kasi a ku na mhaka leyi hi nga tilandzulaka ha yona hikwalaho ka nhlengeletano leyi.”

⁴¹Kuteloko a vurile timhaka teto, a hangalasa nhlengeletano.