Read tsonga Timhaka 2 Bible Online

Timhaka 2 - tsonga bible

Timhaka 2

¹Siku ra Pentekosta, kuteloko ri fikile, a va hlengeletanile hinkwavo exivandleni xi ri xin'we.

²Kutani hi nomu lowu, ku twakala mpfumawulo lowu humaka etilweni, wu fana ni wa xidzedze; kutani yindlu hinkwayo leyi va tshameke eka yona yi tala wona.

³Kutani tindzimi leti avanaka, ti fana ni malangavi ya ndzilo, ti va humelela, ti tshama ehenhla ka un'wana ni un'wana wa vona.

⁴Kutani hinkwavo va tala hi Moya lowo Kwetsima, va sungula ku vulavula hi tindzimi tin'wana, hilaha Moya wu nga va vulavurisa hakona.

⁵Kambe a ku ri ni Vayuda lava akeke eYerusalema, lava chavaka Xikwembu, va huma ematikweni hinkwawo lama nga ehansi ka tilo.

⁶Kuteloko mpfumawulo lowu wu yingisiwa, vunyingi byi hlengeletana, byi tshuka ngopfu, hikuva un'wana ni un'wana a a va yingisa va vulavula hi ririmi leri nga ra rikwavo.

⁷Kutani va hloleriwa hinkwavo, va hlamala va vutisana, va ku: “Vonani! Vanhu lava hinkwavo lava vulavulaka, a hi Vagaleliya xana?

⁸Swi endlisa ku yini loko hi va yingisa va vulavula hi ririmi leri un'wana ni un'wana wa hina a tswariweke eka rona?

⁹Hina Vaparta, ni Vameda, ni Vaelamu ni lava akeke eMesopotamiya, na Yudiya, na Kapadokiya, na Ponto, na Asiya,

¹⁰ni le Frigiya, na Pamfiliya, na Egipta, ni matlhelo ya Libiya la nga ekusuhi na Kirene; ni lava luveleke eRhoma, Vayuda ni vaproselita,

¹¹Vakreta ni Maarabu, hinkwerhu hi va yingisisa ku yini va vulavula timhaka letikulu ta Xikwembu hi tindzimi ta hina xana?”

¹²A va tshukile hinkwavo, va nga tivi leswi va nga ta anakanya swona va vutisana, va ku: “Mhaka leyi, yi yisa kwihi xana?”

¹³Kambe van'wana va mona va ku: “Va xurhe vhinyo leyo tsokombela.”

¹⁴Kambe Petro a yima ni va khume na un'we, a tlakusa rito, a va byela a ku: “Vavanuna va Yudiya, na n'wina hinkwenu vaaki va Yerusalema, tivani leswo, mi yingisa swinene timhaka ta mina.

¹⁵Vanhu lava, a va pyopyiwanga hilaha mi anakanyaka hakona, hikuva wa ha ri nkarhi wa vunharhu.

¹⁶Kambe i mhaka leyi vuriweke hi muprofeta Yuwele, loko a te:

¹⁷‘Hi masiku ya makumu, ku vula Xikwembu, ndzi ta chela nyama hinkwayo hi Moya wa mina; vana va n'wina va xinuna ni va xisati va ta bvumbha, lavantshwa va n'wina va ta vona mahlori; ni swidyuhati swa n'wina swi ta lorha milorho.

¹⁸Hi masiku lawa, ndzi ta chela malandza ya mina ya xinuna ni ya xisati hi Moya wa mina, kutani va ta bvumbha.

¹⁹Ndzi ta endla masingita ehenhla etilweni, ni swikombiso ehansi emisaveni, ngati, ni ndzilo, ni hunguva ya musi.

²⁰Dyambu ri ta hundzuriwa munyama, ni n'weti wu ta hundzuriwa ngati, siku lerikulu ra Hosi, leri hatimaka, ri nga si ta.

²¹Kutani ku ta humelela leswaku un'wana ni un'wana la nga ta khongela vito ra Hosi, u ta ponisiwa.’

²²“Vavanuna va Israele, yingisani timhaka leti: Yesu wa Nazareta wanuna loyi a kombisiweke eka n'wina hi Xikwembu hi mahlori, ni masingita, ni swikombiso leswi Xikwembu xi swi endleke ha yena exikarhi ka n'wina, hilaha mi swi tivaka hakona na n'wina,

²³yeloyi-ke, u nyiketiwile hi makungu lama tiyeke ya Xikwembu ni ku titivela ka xona ka khale; kutani mi n'wi dlayile hi ku n'wi vamba hi mavoko ya swidyohi;

²⁴loyi, Xikwembu xi n'wi pfuxile, xi n'wi tshunxile etinsingeni ta rifu, hikuva a ku nga ri na hilaha a nga bohiwaka hakona.

²⁵Hikuva Davhida loko a vula swa yena, u te: ‘A ndzi vona Hosi hi masiku emahlweni ka mina, hikuva u le vokweni ra mina ra xinene, leswaku ndzi nga ti tsekatsekisiwa.

²⁶Hikwalaho, mbilu ya mina yi tsakile, ni ririmi ra mina ri tsakisisa swonghasi, na yona nyama ya mina yi ta wisa hi ku tshemba;

²⁷hikuva u nga ka u nga tshiki moya wa mina exivandleni xa vafi; u nga ka u nga pfumeleri muhlawuriwa wa wena leswaku a vona ku bola.

²⁸U ndzi tivisile tindlela ta vutomi; u ta ndzi xurhisa hi ku tsaka loku humaka emahlweni ka wena.’

²⁹“Vavanuna varikwerhu, ndzi nga tiyisa ndzi mi byela leswaku mupatriarka Davhida u file, a va a lahliwa, kutani sirha ra yena ri le xikarhi ka hina, ni namuntlha.

³⁰Kambe, leswi ngi a ri muprofeta, ni ku tiva leswaku Xikwembu xi n'wi tshembisile hi ku hlambanya leswaku xi ta tshamisisa exiluvelweni xa yena un'wana wa rixaka ra yena;

³¹hi ku tivonela loku ka khale, u vurile ku pfuka ka Kriste, a ku: Moya wa yena a wu tshikiwanga exivandleni xa vafi, ni nyama ya yena a yi vonangi ku bola.

³²Hi yena Yesu loyi Xikwembu xi nga n'wi pfuxa, kutani hinkwerhu hi timbhoni ta mhaka leyi.

³³Kakuloko a tlakusiwile hi voko ra xinene ra Xikwembu, u amukerile eka Tatana, ku tshembisa ka Moya lowo Kwetsima, kutani u chelerile leswi mi swi vonaka, ni leswi mi swi twaka.

³⁴Hikuva Davhida a nga tlhandlukelanga ematilweni, kambe hi yena la nga te: ‘Hosi yi te eka Hosi yanga: Tshamisa evokweni ra mina ra xinene,

³⁵ndzi ko ndzi endla valala va wena vunavelo bya milenge ya wena.’

³⁶Hikwalaho, yindlu hinkwayo ya Israele yi fanele ku tiva swinene leswaku Xikwembu xi n'wi endle Hosi ni Kriste, Yesu loyi mi n'wi vambeke.”

³⁷Kuteloko va swi yingisile va tlhaveka timbilu; kutani va ku eka Petro ni ka vaapostola van'wana: “Vavanuna varikwerhu, hi ta endla yini?”

³⁸Petro a ku eka vona: “Hundzukani, kutani un'wana ni un'wana a khuvuriwa hi vito ra Yesu Kriste, eku khomeriweni ka swidyoho; kutani mi ta amukela nyiko wu nga Moya lowo Kwetsima.

³⁹Hikuva ku tshembisa loku, ku hlayeriwe n'wina ni vana va n'wina, ni hinkwavo lava nga ekule, lava va ha taka vitiwa hi Hosi, Xikwembu xa hina.”

⁴⁰Kutani a tiyisa vumbhoni bya yena hi marito man'wana layo tala, a va khongotela, a ku: “Tiponiseni erixakeni leri ra ku homboloka.”

⁴¹Vona-ke, lava amukeleke rito ra yena hi ku tsaka, va khuvuriwa; kutani ku engeteriwa siku lero vanhu lava lavaka ku va makume manharhu ya madzana.

⁴²Kutani a va chivirika edyondzweni ya vaapostola, ni le ku hlanganeni ka vona, ni le ku phemeni ka vuswa ni le mikhongelweni.

⁴³Kambe ku chava a ku ri embilwini ya un'wana ni un'wana: Kutani mahlori layo tala ni swikombiso a swi ri karhi swi endliwa hi vaapostola.

⁴⁴Hinkwavo lava nga pfumela a va tshama kun'we va pfanganyeta swilo hinkwaswo swa vona;

⁴⁵va xavisa masimu ya vona, ni xuma xa vona, kutani va avela vanhu hinkwavo, hilaha un'wana ni un'wana a pfumaleke hakona.

⁴⁶Na swona a va tiyisela etempeleni hi masiku hinkwawo, va ri ni mbilu yin'we, va ri karhi va phema vuswa endlwini yin'wana ni yin'wana, va dya swakudya swa vona hi ku tsaka, ni timbilu leti tengeke,

⁴⁷va ri karhi va dzunisa Xikwembu, va tsakeriwa hi tiko hinkwaro. Kutani siku rin'wana ni rin'wana Hosi yi engetela kereke hi vanhu lava ponisiweke.