Read tsonga Timhaka 22 Bible Online

Timhaka 22 - tsonga bible

Timhaka 22

¹“Vavanuna varikwerhu na vatatana, yingisani sweswi ku tilandzula ka mina eka n'wina.”

²Kuteloko va twa leswaku a vulavula na vona hi ririmi ra Xiheveru, va engeta eku cocowa, kutani a ku:

³“Mina ndzi Muyuda, la velekiweke eTarso wa Kilikiya; ntsena ndzi kulele emutini lowu, emilengeni ya Gamaliele, ndzi dyondzisiwa nawu wa vatatana hi ku longoloxeriwa, ndzi va ni ku chivirikela Xikwembu, tanihi n'wina namuntlha,

⁴ndzi kondza ndzi xanisa dyondzo leyi, ku yisa eku dlayeni, ndzi boha vavanuna ni vavasati ndzi va nghenisa ekhotsweni,

⁵hilaha na yena muprista lonkulu a nga vaka mbhoni, ni nhlengeletano hinkwayo ya vakulukumba, hikuva ndzi tekile mapapila eka vona, ku ma mukisa eka varikwerhu va Damaska, ndzi ya kona ku boha lava akeke kona va dyondzo leyi, ni ku va tisa eYerusalema, leswaku va tshinyiwa.

⁶“Kakuloko ndzi ri karhi ndzi famba, ndzi tshinelela eDamaska, hi nkarhi wa nhlekanhi, kan'we ndzi rhendzeriwa hi ku vonakala loku pfaka etilweni.

⁷Ndzi wela ehansi, kutani ndzi twa rito leri nge eka mina: ‘Sawulo, Sawulo, u ndzi xanisela yini?’

⁸Ndzi hlamula, ndzi ku: ‘U mani, Hosi?’ A ku eka mina: ‘Ndzi Yesu wa Nazareta, loyi u n'wi xanisaka.’

⁹Sweswi, lava ngi va ri na mina, na vona va vonile ku vonakala, ntsena a va twanga rito ra loyi a vulavulaka na mina.

¹⁰Kutani ndzi ku: ‘Hosi, ndzi ta endla yini xana?’ Hosi yi ku eka mina: ‘Suka u yima, u ya eDamaska; hi kona u nga ta byeriwa hinkwaswo leswi u fanelaka ku swi endla.’

¹¹Kambe, hikuva a ndzi hluleka ku vona hikwalaho ka ku vonakala koloko, lava ingi a ndzi ri na vona va ndzi fambisa va ndzi khomile hi voko, kutani ndzi ya eDamaska.

¹²“Kavaloko Ananiya, munhu la gandzelaka Xikwembu hi mukhuva wa nawu, la dzunisiwaka hi Vayuda hinkwavo lava akeke eDamaska, a ta eka mina,

¹³a yima a ndzi byela, a ku: ‘Sawulo, makwerhu, pfuleka mahlo.’ Kutani hi nkarhi wolowo ndzi pfuleka mahlo, ndzi n'wi vona.

¹⁴Kambe a ku: ‘Xikwembu xa vatata wa hina xi tihlawulele wena leswaku u tiva ku rhandza ka xona, ni leswaku u vona La lulameke, ni leswaku u twa rito ra nomu wa yena;

¹⁵hikuva u ta va mbhoni ya yena emahlweni ka vanhu hinkwavo, ku tiyisa leswi u nga swi vona ni leswi u nga swi twa.

¹⁶Kutani sweswi, u hlwelela yini? Yima u khuvuriwa, u hlantswiwa ku dyoha ka wena hi ku khongela vito ra yena.’

¹⁷“Kute siku ndzi tlheleleke eYerusalema, loko ndzi ri karhi ndzi khongela etempeleni, ndzi tekiwa emoyeni;

¹⁸kutani ndzi n'wi vona, a ndzi byela, a ku: ‘Hatlisa u suka eYerusalema, hi ku angwetla, hikuva va nga ka va nga amukeri vumbhoni lebyi u ndzi vulaka ha byona.’

¹⁹Kutani ndzi ku: ‘Hosi, va tiva ngopfu leswaku hi mina la nga nghenisa ekhotsweni, ni ku ba hi mikhavi emasinagogeni, lava pfumeleke eka wena;

²⁰ni siku ku halatiwaka ngati ya Stefano mbhoni ya wena, na mina a ndzi ri kona, ndzi khensa ku dlawa ka yena, kutani ndzi langutela tinguvu ta lava n'wi dlayaka.’

²¹Kavaloko Hosi yi ku eka mina: ‘Famba, hikuva ndzi ta ku rhuma ekule eka vamatiko.’ ”

²²Va n'wi yingisela ku fikela eritweni lero, kutani va tlakusa marito ya vona, va ku: “N'wi suse emisaveni, munhu lowo tano, hikuva a nga fanekeri ku hanya.”

²³Kutani va huwelela, va tihandzulela tinguvu ta vona, va tsutsuxela ntshuri henhla.

²⁴Kutani ndhuna yi lerisa leswaku a yisiwa ekhokholweni, yi ku, a vutisiwa hi ku biwa hi mikhavi, leswaku yi ta tiva mhaka leyi va n'wi huwelelaka hikwalaho ka yona.

²⁵Kuteloko va n'wi bohile hi tinghole, Pawulo a ku eka ndhuna ya dzana leyi yimeke kwalaho: “Xana mi nga pfumeleriwa ku ba hi mikhavi munhu wa Murhoma a nga si avanyisiwa xana?”

²⁶Loko ndhuna yi twa sweswo, yi ya byela ndhuna leyikulu, yi ku: “U tivonela eka leswi u nga ta swi endla, hikuva munhu loyi i Murhoma.”

²⁷Kavaloko ndhuna leyikulu yi ta eka Pawulo, yi ku eka yena: “Wa nga ndzi byela swinene, xana kunene u Murhoma xana?” A hlamula, a ku: “E, ndzi yena!” Ndhuna yi ku:

²⁸“Xivongo xolexo, ndzi xi xavile hi mali leyo tala.” Pawulo a ku: “Kambe mina ndzi xi tswalelwe.”

²⁹Kutani lava ngi va ta n'wi vutisa hi ku n'wi ba va hatlisa va suka eka yena, kutani ndhuna yi chava na yona, loko yi twa leswaku i Murhoma, hikuva a a n'wi bohile.

³⁰Hi siku leri tlhandlamaka, hikuva a a rhandza ku tiva swinene lexi Vayuda va n'wi hehlaka ha xona, a n'wi tshunxa, kutani a lerisa leswaku vaprista lavakulu ni va huvo hinkwavo va hlengeletana; kutani a tisa Pawulo a n'wi veka emahlweni ka vona.