Read tsonga Timhaka 3 Bible Online

Timhaka 3 - tsonga bible

Timhaka 3

¹Petro na Yohane a va tlhandlukela kun'we etempeleni hi nkarhi wa xikhongelo; a wu ri wa ntlhanu na mune (nimadyambu).

²Kutani a ku rhwariwe munhu la nga tswariwa a ri xigono, a va n'wi veka hi masiku hinkwawo enyangweni ya tempele leyi va nge leyo Saseka, leswaku a ta kombela swo hananiwa eka lava nghenaka etempeleni.

³Munhu loyi, kakuloko a vona Petro na Yohane va lava ku nghena etempeleni, a kombela eka vona.

⁴Kambe Petro a n'wi honolela mahlo, swin'we na Yohane, a ku: “Hi langute.”

⁵Kutani yeloyi a va langutisisa, a ehleketa leswaku va ta n'wi nyika xanchumu.

⁶Kambe Petro a ku eka yena: “A ndzi na silivhere, hambi wu ri nsuku, kambe lexi ndzi nga na xona, ndza ku nyika: Hi vito ra Yesu Kriste wa Nazareta, yima, u famba!”

⁷Kutani a n'wi khoma hi voko ra xinene, a n'wi yimisa; kutani hi nomu lowu, mikondzo ni mahlakala ya yena swi tiyisiwa.

⁸Kutani a suka a nghena etempeleni na vona, a ri karhi a famba, a tlula, a dzunisa Xikwembu.

⁹Kutani vanhu hinkwavo va n'wi vona a famba, a dzunisa Xikwembu.

¹⁰Kambe a va n'wi tiva leswaku hi yena la tshameleke ku hananiwa eNyangweni leyo Saseka ya tempele; kutani va tala hi ku hloleriwa ni ku hlamala ni leswi a swi endleriweke.

¹¹Kutani, hikuva a a namarhela Petro na Yohane, vanhu hinkwavo va hlamala, va tsutsumela erikupakupeni leri va nge i ra Solomoni.

¹²Kakuloko Petro a swi vona, a byela vanhu, a ku: “Vavanuna va Israele, mi hlamalela yini mhaka leyi? Kumbe mi hi tlhavela yini hi mahlo kukota loko ingi hi fambisile munhu loyi hi matimba ya hina, kumbe hi vukhongeri bya hina.

¹³Xikwembu xa Abrahama, ni xa Isaka, ni xa Yakobo, Xikwembu xa vatata wa hina, xi dzunisile nandza wa xona, Yesu loyi mi n'wi nyiketeke Pilato, mi n'wi landzula emahlweni ka yena, kasi yena a a n'wi avanyisela ku n'wi tshunxa.

¹⁴Kambe n'wina mi landzurile la kwetsimeke, la lulameke kutani mi komberile ku nyikiwa mudlayi.

¹⁵Kasi mi dlele Hosi ya vutomi, yeloyi Xikwembu xi n'wi pfuxeke eku feni; kutani na hina hi timbhoni ta swona.

¹⁶Hikwalaho ka ku pfumela vito ra yena, hi rona vito ra yena leri tiyiseke munhu loyi mi n'wi vonaka, mi n'wi tivaka; kutani ku pfumela eka Yesu ku n'wi hanyisile swinene emahlweni ka n'wina hinkwenu.

¹⁷“Sweswi, vamakwerhu, ndza swi tiva leswaku mi endlise sweswo hi ku ka mi nga swi tivi, na tona tihosi ta n'wina;

¹⁸kambe Xikwembu xi hetisisile hi mukhuva wolowo timhaka leti xi nga rhanga xi ti vula hi milomu ya vaprofeta va xona hinkwavo, leswaku Kriste wa xona u ta twisiwa ku vaviseka.

¹⁹“Hundzukani hakona, mi tlhelela eka Xikwembu, leswaku swidyoho swa n'wina swi hlanguriwa,

²⁰leswaku ku nga fika nkarhi wa ku susa mikarhalo, lowu humaka eka Hosi ni leswaku a rhuma Yesu Kriste, loyi a mi vekeleke yena eku sunguleni,

²¹loyi tilo ri faneleke ku n'wi amukela, ku ko ku fika nguva ya ku vuyetela swilo hinkwaswo, leyi Xikwembu xi yi vuleke hi milomu ya vaprofeta lavo kwetsima hinkwavo va xona ka ha ri eku sunguleni.

²²Hikuva Muxe u vurile, a ku: ‘Hosi, Xikwembu xa n'wina, yi ta mi humesela exikarhi ka vamakwenu, muprofeta la fanaka na mina, mi ta n'wi yingisa eka hinkwaswo leswi a nga ta mi byela swona;

²³kutani ku ta endleka leswaku un'wana ni un'wana loyi a nga yingisiki muprofeta yeloyi, u ta susiwa exikarhi ka tiko.’

²⁴Na swona, vaprofeta hinkwavo lava nga vulavula, ku sungula eka Samiele ni lava n'wi tlhandlamaka, hinkwavo va bvumbhile masiku lawa.

²⁵Hi n'wina vana va vaprofeta ni va ntwanano lowu Xikwembu xi nga wu endla ni vatata wa hina, loko xi ku eka Abrahama: Tinxaka hinkwato ta misava ti ta katekisiwa hi vatukulu va wena.

²⁶Xikwembu xi sungurile ha n'wina, ku mi humesela nandza wa xona Yesu, xi n'wi rhuma ku ta mi katekisa, hi ku hundzuluxa un'wana ni un'wana wa n'wina eku biheni ka yena.”