Read tsonga Timhaka 8 Bible Online

Timhaka 8 - tsonga bible

Timhaka 8

¹Kambe Sawulo u khensile ku dlawa ka Stefano. Enkarhini wolowo, kereke ya Yerusalema yi humeleriwa hi ku xaniseka lokukulu, va hangalasiwa hinkwavo ematikweni ya Yudiya ni ya Samariya; ku sala vaapostola ntsena.

²Kutani vavanuna van'wana va vakhongeri, va lahla Stefano; va ba nkosi lowukulu ehenhla ka yena.

³Kambe Sawulo a a ri karhi a hlasela kereke, a nghena endlwini yin'wana ni yin'wana, a kokela vavanuna ni vavasati, a va nyiketa ku nghenisiwa ekhotsweni.

⁴Kutani lava ingi va hangalasiwile, a va ri karhi va vula rito hinkwako laha va yaka kona.

⁵Loko a ri Filipi, a xikela emutini wa tiko ra Samariya, a vula Kriste kona.

⁶Kutani vunyingi byi va mbilu yin'we ku yingisa leswi vuriwaka hi Filipi loko byi twa, ni loko byi vona mahlori lawa a ma endlaka.

⁷Hikuva mimoya ya thyaka a yi suka eka lavo tala lava ngheniweke hi yona, yi huwelela hi rito lerikulu; kutani lavo tala lava ingi va khwanyale swirho, ni swigono a va hanyisiwa.

⁸Kutani ku tsaka lokukulu ku va kona emutini wolowo.

⁹Wanuna, loyi va nge i Simoni, a a ri kona emutini wolowo, a tirha ntirho wa vungoma, a hlamarisa tiko ra Samariya, a tivula munhu lonkulu.

¹⁰A va n'wi namarhela hinkwavo, ku sungula hi lontsongo ku fikela eka lonkulu, va ku: “Loyi, i matimba lamakulu ya Xikwembu.”

¹¹Va n'wi namarhelisa sweswo, hikuva ni khale, a a va hlamarisile hi vungoma bya yena.

¹²Kambe kuteloko va pfumela eka Filipi, loyi a va byelaka Evhangeli ya ku fuma ka Xikwembu, ni vito ra Yesu Kriste, vavanuna ni vavasati van'wana va khuvuriwa.

¹³Na yena Simoni a pfumela, kutani a khuvuriwa, a namarhela Filipi; kambe a hlamala ngopfu hi ku vona swikombiso ni masingita lamakulu lama endliwaka.

¹⁴Kambe vaapostola lava seleke eYerusalema, loko va twa leswaku Vasamariya va amukela rito ra Xikwembu, va va rhumela Petro na Yohane;

¹⁵volavo kuteloko va fikile, va va khongelela leswaku va nyikiwa Moya lowo Kwetsima;

¹⁶hikuva a wu nga si xikela ni ka un'we wa vona; a va khuvuriwile ntsena hi vito ra Yesu.

¹⁷Kutani va va tlhandleka mavoko ehenhla, kutani va amukela Moya lowo Kwetsima.

¹⁸Kambe Simoni, kakuloko a vona leswaku Moya lowo Kwetsima wu nyikiwa hi ku tlhandleka ka mavoko ya vaapostola, a va humesela mali, a ku:

¹⁹“Ndzi nyikeni, na mina, matimba lawa, leswaku un'wana ni un'wana loyi ndzi nga ta n'wi tlhandleka mavoko ehenhla, a nyikiwa Moya lowo Kwetsima.”

²⁰Kambe Petro a ku eka yena: “Mali ya wena a yi love na wena, leswi u nga ehleketa leswaku ku nyika ka Xikwembu ku xaviwa hi mali!

²¹A ku na ku averiwa ni ku pambuleriwa emhakeni leyi, hikuva mbilu ya wena a yi lulamanga emahlweni ka Xikwembu.

²²Hikwalaho, hundzuka eku biheni ka wena, u khongela Hosi leswaku kumbexana u nga khomeriwa ku anakanya ka mbilu ya wena;

²³hikuva ndzi vona leswaku u tele nyongwa leyi bavaka ngopfu, ni ku bohiwa hi ku homboloka.”

²⁴Simoni a hlamula, a ku: “Ndzi khongeleleni mi ri n'wina eka Hosi, leswaku ndzi nga tshuki ndzi humeleriwa hi xilo xin'we xa leswi mi swi vuleke.”

²⁵Kuteloko vaapostola va vula vumbhoni bya rito ra Hosi, va tlhelela eYerusalema, va ri karhi va vula Evhangeli emitini leyo tala ya Vasamariya.

²⁶Kutani ntsumi ya Hosi yi byela Filipi, yi ku: “Suka, u ya tlhelo ra dzonga endleleni leyi xikaka hi le Yerusalema, yi rhelela eGaza,” laha ku nga mananga;

²⁷kutani a suka a famba. Kutani a vona wanuna wa Muetiyopiya, a nga mutsheniwa ni ndhuna leyikulu ya Kandake, hosi ya wansati ya Etiyopiya, ni mulanguteri wa rifuwo ra yona hinkwaro, loyi ngi a tile eYerusalema, ku ta gandzela kambe a a tlhelela ekaya,

²⁸a tshamile egolonyini ya yena, a hlaya buku ya muprofeta Esaya.

²⁹Moya wu ku eka Filipi: “Famba, u tshinelela golonyi leyiya.”

³⁰Kutani Filipi a tsutsuma, kuteloko a n'wi yingisile a hlaya buku ya muprofeta Esaya, a ku eka yena: “Xana wa twisisa lexi u xi hlayaka xana?”

³¹Yeloyi a ku: “Ndzi nga twisisisa ku yini loko ndzi nga ri na muhlamuseri?” Kutani a kombela leswaku Filipi a khandziya, a ta tshama na yena.

³²Ndzimana ya buku leyi ingi a yi hlaya hi leyi: “U yisiwile ku tlhaviweni kukota nyimpfu, kambe a ri tanihi xinyimpfana xa mbheveve emahlweni ka la xi tsemelaka voya, kutani a xi ahlamisinga nomu wa xona.

³³Ku avanyisiwa ka yena ku hetisiwile eku titsongahateni ka yena; kambe i mani la nga vulaka rixaka ra yena? Hikuva vutomi bya yena byi susiwile emisaveni.”

³⁴Kutani ndhuna yi vutisa Filipi, yi ku: “Wa nga ndzi byela; xana muprofeta u vula mani hi mhaka leyi? Xana wa tivula, kumbe u vula un'wana-ke?”

³⁵Kutani Filipi a ahlamisa nomu, a sungula hi tsalwa leri, a n'wi byela Evhangeli ya Yesu.

³⁶Va ku va ha famba endleleni, va fika laha mati ingi ma ri kona, kutani ndhuna yi ku: “Vona, mati hi lawa; ku nga sivela yini leswaku ndzi khuvuriwa xana?”

³⁷Filipi a ku: “Loko u pfumela hi mbilu ya wena hinkwayo, u nga pfumeleriwa.” A hlamula, a ku: “Ndza pfumela leswaku Yesu Kriste i n'wana wa Xikwembu.”

³⁸Kuteloko a lerisile leswaku golonyi yi yima, va ngirimela ematini havambirhi, Filipi ni ndhuna; kutani Filipi a yi khuvula.

³⁹Kuteloko va tlhandlukile ematini, Moya wa Hosi wu susa Filipi, kutani ndhuna a yi vuyanga ya ha n'wi vona; kambe yi ya emahlweni endleleni ya yona hi ku tsaka lokukulu.

⁴⁰Kambe Filipi a tshuka a va le Azoto; kutani a famba a ri karhi a vula Evhangeli emitini hinkwayo a kondza a fika eKhezariya.