Read tsonga Varhoma 12 Bible Online

Varhoma 12 - tsonga bible

Varhoma 12

¹Vamakwerhu, ndza mi khongotela hi tintswalo ta Xikwembu, leswaku mi nyiketa miri wa n'wina, wu va mhamba leyi hanyaka, leyi kwetsimaka, leyi tsakisaka Xikwembu; hi rona gandzelo leri mi fanelaka.

²Mi nga tshuki mi tifanisa ni misava leyi, kambe mi hundzuka hi vuntshwa bya miehleketo ya n'wina, mi ta twisisa hakona leswaku ku rhandza ka Xikwembu, hi lokunene, ka tsakisa, ku hetisekile.

³Hikuva hi tintswalo leti ndzi ti nyikiweke, ndzi byela munhu un'wana ni un'wana exikarhi ka n'wina leswaku, a nga tshuki a tiringanisa hi vukulu ku tlurisa leswi fanelaka, kambe a a ve ni miehleketo ya ku titsongahata a ya hi mpimo wa ku pfumela loku Xikwembu xi ku aveleke un'wana ni un'wana.

⁴Hikuva kukota leswi hi nga ni swirho leswo tala emirini wu ri wun'we, kutani swirho hinkwaswo swi nga ri na ntirho wun'we;

⁵hi mukhuva wolowo, na hina, hambi hi tele, hi miri wun'we eka Kriste, kutani un'wana ni un'wana i xirho xa van'wana.

⁶Kambe leswi hi nga ni tinyiko leti hambaneke, hilaha hi nyikiweke tintswalo hakona, a hi tirheni ha tona loko hi ri ni ku profeta, a hi profeteni hi mpimo wa ku pfumela;

⁷la averiweke ntirho, a a tiye entirhweni; la dyondzisaka, a a tiye eku dyondziseni, la khongotelaka a a tiye eku khongoteleni;

⁸la hananaka, a a hanane hi mbilu leyo tenga; la lerisaka, a a lerise hi ku xiya; la endlaka mitirho ya tintswalo, a a endle hi ku tsaka.

⁹Rirhandzu ri nga tshuki ri va ni ku kanganyisa. Vengani leswo biha, mi namarhela leswinene.

¹⁰Tolovelanani hi rirhandzu ra vuxaka, mi ri karhi mi yisana emahlweni hi mafundzha.

¹¹Mi nga tshuki mi loloha ku tirhela van'wana kambe mi va ni ku hiseka emoyeni, mi tirhela Hosi.

¹²Tsakani eku languteleni, mi yingisela emaxangwini, mi chivirikela eku khongeleni.

¹³Pambulelani vakwetsimi loko va pfumala, mi va ni ku gingirika ku amukela vaendzi.

¹⁴Katekisani lava mi xanisaka; katekisani, mi nga tshuki mi rhukana.

¹⁵Tsakani ni lava tsakeke, mi rila ni lava rilaka.

¹⁶Mi namarhelana kun'we hi mbilu yin'we; mi nga tshuki mi navela leswi tlakukeke, kambe xaxamelani ni lava titsongahataka; mi nga tivoni lavo tlhariha.

¹⁷Mi nga tlheriseli ku biha hi ku biha, hambi ku ri ka mani na mani. Lavani leswinene emahlweni ka vanhu hinkwavo.

¹⁸Loko swi nga endleka, ni loko mi swi kota, tshamani hi ku tsakelana ni vanhu hinkwavo.

¹⁹Varhandziwa, mi nga tshuki mi tirihisela mi ri n'wina; kambe kendlukelani vukari bya Xikwembu, hikuva ku tsariwe leswaku: “Ku rihisa, i ka mina; hi mina loyi ndzi nga ta rihisa; ku vula Hosi.”

²⁰Hikwalaho, “la nga nala eka wena, loko a ri ni ndlala, n'wi phamele; loko a ri ni torha, n'wi siyele a nwa; hikuva, loko u endlisa sweswo, u n'wi hlengeletele mpfundze enhlokweni.”

²¹U nga tshuki u hluriwa hi leswo biha, kambe hlula leswo biha hi leswo saseka.