Read tsonga Varhoma 4 Bible Online

Varhoma 4 - tsonga bible

Varhoma 4

¹Loko swi ri tano, hi ta ku yini? Xana Abrahama, tata wa hina u fuwe yini hitlhelo ra nyama-ke?

²Hikuva loko hi nga ku: Abrahama u hlayiwile la lulameke hikwalaho ka mitirho, u ni nkarhi wa ku tidzunisa; kambe ku nga ri emahlweni ka Xikwembu.

³Hikuva Tsalwa ri te yini? Ri te: “Abrahama u pfumerile eka Xikwembu, kutani u hlayeriwe swona leswaku i ku lulama ka yena.”

⁴Kasi, loko yi ri hakelo ya la tirhaka, a yi hlayiwi leswaku i tintswalo, kambe va ri i nandzu.

⁵Kutani la nga tirhiki, kambe a pfumela ntsena eka la khanisaka mudyohi, ku pfumela ka yena ku hlayiwa leswaku i ku lulama.

⁶Kukota loko na yena Davhida a vula ku kateka ka munhu loyi Xikwembu xi n'wi hlayaka la lulameke ku nga ri hi mitirho, loko a ku:

⁷“Ku katekile lava rivaleriweke ku homboloka ka vona, lava swidyoho swa vona swi funengetiweke!

⁸Ku katekile munhu loyi Hosi yi nga n'wi hlayeriki ku dyoha ka yena.”

⁹Loko swi ri tano, xana ku kateka loku ku tela lavo yimba ntsena xana? Xana a ku teri na vona lava nga yimbangiki xana? Hikuva ha ha ku vula leswaku Abrahama u hlayeriwile ku pfumela ka yena ku lulama.

¹⁰Xana u hlayeriwe a lo yini? Xana hi loko a yimbile, kumbe loko a nga si yimba? A hi loko a yimbile, kambe loko a nga si yimba.

¹¹Kutani a nyikiwa mfungho wa ku yimba ku tiyisa ku lulama ka ku pfumela, loku ngi a ri na kona loko a nga si yimba, leswaku a va tata wa hinkwavo lava pfumelaka hambi va nga yimbanga, leswaku na vona va hlayeriwa ku lulama;

¹²ni leswaku a va tata wa lavo yimba na vona va nga ri lavo yimba ntsena, kambe va ri lava fambaka hi mitila ya ku pfumela, loku tata wa hina Abrahama ingi a ri na kona, loko a nga si yimba.

¹³Hambi ku ri ku hlayeriwa leswaku a ta va mudyandzhaka wa misava, a ku nyikiwanga Abrahama ni vatukulu va yena hi nawu kambe ku nyikiwile hi ku lulama ka ku pfumela.

¹⁴Hikuva loko vadyandzhaka va ri vona hi nawu, ku pfumela ku hundzukile xilo xa hava, na kona ku tshembisiwa ku herisiwile,

¹⁵hikuva nawu wu humesa vukari, hikuva laha nawu wu nga riki kona, ni ku tlula a ku kona.

¹⁶Hikwalaho-ke, swi humelele hi ku pfumela, leswaku swi endliwa hi tintswalo, leswaku ku tshembisa ka Xikwembu ku ta tiya eka rixaka hinkwaro, ku nga ri eka rixaka leri nga rona hi nawu ntsena, kambe ku va ni ka leri nga rona hi ku pfumela ka Abrahama, loyi a nga tata wa hina hinkwerhu,

¹⁷kukota leswi ku tsariweke leswaku: “Ndzi ku vekile tata wa matiko layo tala”; u tano emahlweni ka Xikwembu lexi a pfumeleke eka xona, lexi hanyisaka lava feke, kutani xi vitana swilo leswi nga riki kona kukota loko ngi swi ri kona.

¹⁸Abrahama u pfumele hi ku tshemba, hambi wu nga ri nkarhi wa ku tshemba, kutani u endliwile hakona tata wa matiko layo tala, hi leswi a swi byeriweke leswaku: “Rixaka ra wena ri ta va lero tano.”

¹⁹Kutani, hikuva a nga tsanangi eku pfumeleni, a nga hlayangi miri wa yena lowu ngi wu file (kasi malembe ya yena a ma lava ku va dzana), a nga hlayanga ni ku fa ka mbeleko ya Sara;

²⁰kutani a nga vilelanga hi ku tshembisa ka Xikwembu hi ku ka a nga pfumeri; ntsena a tiyisiwa hi ku pfumela, a ri karhi a dzunisa Xikwembu,

²¹a kholwa swinene leswaku la n'wi tshembiseke u ni matimba ya ku endla;

²²hikwalaho, ku pfumela koloku, u ku hlayeriwile ku lulama.

²³Kambe loko ku tsariwile leswaku u ku hlayeriwile ku lulama, a ku vuriwi yena a ri swakwe,

²⁴kambe ku vuriwa na hina, leswaku hi ta ku hlayeriwa, hina lava pfumelaka ka loyi a pfuxeke Yesu, Hosi ya hina, eku feni,

²⁵a nga yena la nyiketiweke hikwalaho ka ku dyoha ka hina, kutani u pfuxiwile hikwalaho ka ku khanisiwa ka hina.