Read tsonga Varhoma 5 Bible Online

Varhoma 5 - tsonga bible

Varhoma 5

¹Kutani leswi hi nga hlayiwa lava lulameke hi ku pfumela, hi ni ku rhula eka Xikwembu ha Yesu Kriste Hosi ya hina,

²a nga yena loyi hi kumeke ha yena hi ku pfumela, nkarhi wa ku tshinelela tintswalo leti hi yimeke ka tona, kutani hi tidzunisa eku languteleni ka ku kwetsima ka Xikwembu.

³A hi sweswo ntsena, kambe hi tidzunisa ni le maxangwini hikuva ha swi tiva leswaku maxangu ma humesa ku yingisela;

⁴kutani ku yingisela ku humesa ku dzuniseka, kutani ku dzuniseka ku humesa ku langutela;

⁵kutani ku langutela a ku khomisi munhu tingana, hikuva rirhandzu ra Xikwembu ri cheriwile etimbilwini ta hina hi Moya lowo Kwetsima lowu hi wu nyikiweke.

⁶Hikuva loko hi nga si va na matimba, Kriste u fele vasandzi hi nkarhi lowu faneleke.

⁷Kasi swa nonon'hwa eka un'wana ku fela la lulameke; swimbe un'wana a nga tiyisa mbilu ku fela la endleke swinene.

⁸Kambe Xikwembu xi kombisile ngopfu rirhandzu ra xona eka hina, hileswaku loko ha ha ri vadyohi, Kriste u hi ferile.

⁹Kutani sweswi, loko hi hlayiwile lava lulameke hikwalaho ka ngati ya yena, ngopfungopfu hi ta ponisiwa evukarini hikwalaho ka yena!

¹⁰Hikuva loko ha ha ri valala, hi hlanganisiwile ni Xikwembu hi ku fa ka N'wana wa xona, ngopfungopfu leswi hi hlanganisiweke, hi ta hanyisiwa hi ku hanya ka yena.

¹¹A hi leswi ntsena kambe hi ni ku tidzunisa eka Xikwembu ha Hosi ya hina Yesu Kriste, loyi hi nyikiweke, ni sweswi, ku hlanganisiwa ha yena.

¹²Hikwalaho, kukota leswi ku dyoha ku ngheneke emisaveni hi munhu a ri un'we, kutani rifu ri kona hikwalaho ka ku dyoha; hi mukhuva wolowo, rifu ri funengete vanhu hinkwavo, hikuva va dyohile hinkwavo.

¹³Hikuva ku ko ku fika nawu, vudyoho a byi ri kona emisaveni; kambe vudyoho a byi hlayeriwi munhu nawu wu nga ri kona.

¹⁴Hambiswiritano, rifu ri fumile ku sungula ka Adamu ku yisa eka Muxe, ri va ni le henhla ka lava nga dyohangiki hi ku dyoha loku fanaka ni ka Adamu, la nga xifaniso xa loyi a nga ta ta.

¹⁵Kambe ku nyika ka tintswalo a ku fani ni ku dyoha hikuva, loko lavo tala va file hikwalaho ka ku dyoha ka munhu a ri un'we, tintswalo ta Xikwembu, ni ku nyika ka tintswalo, loku teke hi munhu a ri un'we, a nga Yesu Kriste, na swona swi andzele lavo tala ku tlurisa swonghasi.

¹⁶Kambe ku nyika a ku fani ni leswi humeleleke hi ku dyoha ka munhu a ri un'we, hikuva ku avanyisa ku tile hikwalaho ka ku dyoha ku ri kun'we; kambe tintswalo ti tisile ku lulama, hambi ku dyoha ku ri lo ko tala.

¹⁷Hikuva loko ku ri hikwalaho ka ku dyoha ka munhu a ri un'we, rifu ri fumile ha munhu loyi a ri un'we, ngopfungopfu lava nyikiwaka ku tala ka tintswalo ni ka nyiko ya ku lulama, va ta fuma evutomini ha un'we, a nga Yesu Kriste.

¹⁸Hikwalaho, kukota leswi ku dyoha ka munhu a ri un'we ku nga humesa ku avanyisa ehenhla ka vanhu hinkwavo, hi mukhuva wolowo, ku lulama ka munhu a ri un'we, ku humesela vanhu hinkwavo ku lulama loku nyikaka vutomi.

¹⁹Hikuva kukotisa leswi lavo tala va endliweke vadyohi hi ku ka munhu un'we a nga yingisanga, hi mukhuva wolowo, lavo tala va ta vekiwa lava lulameke hi ku yingisa ka un'we.

²⁰Kambe nawu wu humelele leswaku ku dyoha ku andza; kambe laha ku dyoha ku andzeke kona, tintswalo ti andzile hi ku tlurisa,

²¹swi va leswaku, kukotisa loko ku dyoha ku fumile hi rifu, tintswalo na tona ti fumisa sweswo hi ku lulama loku yisaka evutomini lebyi nga heriki, ha Yesu Kriste, Hosi ya hina.