Read tsonga Varhoma 6 Bible Online

Varhoma 6 - tsonga bible

Varhoma 6

¹Hi ta ku yini-ke? Xana hi ta tshama eku dyoheni leswaku tintswalo ti ta andza xana?

²Swi nga tshuki swi va tano! Leswi hina hi feke hitlhelo ra vudyoho, hi ta engeta hi hanya eka byona hi mukhuva wihi xana?

³Xana a mi swi tivi leswaku hina hinkwerhu lava hi khuvuriweke eka Yesu Kriste, hi khuvuriwile erifuni ra yena xana?

⁴Hikwalaho hi yimberiwile swin'we na yena erifuni ra yena hi ku khuvuriwa, leswaku kukota leswi Kriste a pfuxiweke eku feni hi ku kwetsima ka Tatana, hi mukhuva wolowo, na hina, hi hanya hi mukhuva lowuntshwa.

⁵Hikuva, kungakuloko hi endliwile nsinya wu ri wun'we na yena hi ku fana na yena eku feni ka yena, hi ta fanisa na yena sweswo eku pfukeni ka yena:

⁶hi ri karhi hi swi tiva leswaku munhu wa hina wa khale u vambiwile swin'we na yena leswaku miri wa vudyoho wu herisiwa, leswaku hi nga ha ti tlhela hi va makhumbi ya vudyoho.

⁷Hikuva loyi a feke u tshunxiwe evudyohweni.

⁸Kutani sweswi, loko hi file na Kriste, ha pfumela leswaku, na kona, hi ta hanya na yena;

⁹hikuva ha swi tiva leswaku Kriste, loko a pfukile eku feni, a nga ka a nga ha fi; rifu a ra ha ri na matimba ehenhla ka yena.

¹⁰Hikuva eku feni ka yena, u fele vudyoho kan'we; kambe eku hanyeni ka yena, u hanyela Xikwembu.

¹¹Hi mukhuva wolowo, na n'wina, ringanisani leswaku mi fele vudyoho ni leswaku mi hanyela Xikwembu ha Yesu Kriste.

¹²Kutani sweswi vudyoho byi nga tshuki byi fuma emirini wa n'wina lowu faka, leswaku mi nga byi yingisi eku naveleni ka byona.

¹³Kambe mi nga tshuki mi nyiketa vudyoho swirho swa n'wina ku va swilo leswi tirhelaka ku homboloka; kambe tinyiketeni eka Xikwembu kukota lava hanyaka, lava ingi va file, kutani mi veka swirho swa n'wina eka Xikwembu ku tirha leswo lulama.

¹⁴Hikuva vudyoho byi nga ka byi nga mi fumi, hikuva a mi le hansi ka nawu, kambe mi le hansi ka tintswalo.

¹⁵Hi ta ku yini? Xana hi ta dyoha leswi hi nga riki hansi ka nawu kambe hi nga hansi ka tintswalo xana? E-e, swi nga tshuki swi va tano.

¹⁶Xana a mi swi tivi leswaku loko mi tiendla makhumbi ya un'wana ku n'wi yingisa, mi makhumbi ya loyi mi n'wi yingisaka, hambi ya vudyoho lebyi yisaka eku feni, hambi ya ku yingisa loku yisaka eku lulameni?

¹⁷Kambe a ku khensiwe Xikwembu, hikuva, hambi ngi mi ri makhumbi ya vudyoho, mi yingisile hi mbilu ku famba hi mitila ya ku dyondza loku mi dyondzisiweke kona.

¹⁸Kutani sweswi, leswi mi tshunxiweke evudyohweni, mi hundzukile malandza ya ku lulama.

¹⁹Ndzi vula hi mukhuva wa vanhu, hikwalaho ka ku tsana ka nyama ya n'wina, ndzi ri: Kukota leswi ingi mi nyiketile swirho swa n'wina ku va makhumbi ya thyaka ni ya ku homboloka, mi yisiwa hakona eku hombolokeni, hi mukhuva wolowo sweswi, nyiketani swirho swa n'wina, ma va makhumbi ya ku lulama, mi fika hakona eku kwetsimeni.

²⁰Hikuva loko ma ha ri makhumbi ya vudyoho, a mi tshunxiwile hitlhelo ra ku lulama.

²¹Emikarhini yoleyo a mi tshovela yini xana? Mi khomisiwa tingana ha swona sweswi, hikuva makumu ya swona i rifu.

²²Kambe sweswi, leswi mi tshunxiweke evudyohweni, kutani mi hundzukeke malandza ya Xikwembu, mi titshovelela ku kwetsima, ni ndzhaku ka swona vutomi lebyi nga heriki.

²³Hikuva hakelo ya vudyoho i rifu, kambe ku nyika ka tintswalo ta Xikwembu, i vutomi lebyi nga heriki, ha Yesu Kriste, Hosi ya hina.