Read tsonga 1 Vakorinto 16 Bible Online

1 Vakorinto 16 - tsonga bible

1 Vakorinto 16

¹Loko wu ri nhlengo lowu hlengeleteriwaka vakwetsimi, mi ta endla hilaha ndzi leriseke hakona etikerekeni ta Galatiya.

²Hi siku ro rhanga ra vhiki, un'wana ni un'wana wa n'wina a a tivekele hitlhelo, leswi a swi hlengeletaka, hilaha a swi nyikiweke hakona, ku nga languteriwi ku ta ka mina ku humesa mihlengo.

³Kutani kutakuloko ndzi fikile, ndzi ta rhuma hi mapapila vanhu lava mi va tshembaka, va ta heleketa nhlengo wa n'wina wa tintswalo eYerusalema.

⁴Loko swi ndzi fanela ku ya ndzi ri mina, va ta famba na mina.

⁵Kambe ndzi ta ya eka n'wina, loko ndzi hundzile eMakedoniya; hikuva ndzi ta hundza eMakedoniya.

⁶Kumbe ndzi ta xwa masiku eka n'wina, hambi ndzi pindzuka, vusika byi ko byi hundza; kutani mi ta ndzi heleketa hinkwako laha ndzi nga ta ya kona.

⁷Hikuva sweswi a ndzi rhandzi ku mi hambukela ntsena, kambe ndza tshemba leswaku ndzi ta xwa nkarhinyana eka n'wina, loko Hosi yi pfumela.

⁸Kambe ndzi ta tshama eEfesa ku ko ku fika Pentekosta;

⁹hikuva kona ndzi pfuleriwile nyangwa leyikulu ya ntirho lowu nga katekisiwa; kambe ku ni vakaneti lavo tala.

¹⁰Kutakuloko Timotiya a fika eka n'wina, mi vona leswaku a hlayisiwa exikarhi ka n'wina, a nga chavi nchumu, hikuva u tinyiketile entirhweni wa Hosi kukota mina.

¹¹A nga tshuki a soriwa hi munhu, kambe mi n'wi heleketa hi ku tsaka, a vuya eka mina, hikuva ndza n'wi langutela ni vamakwavo.

¹²Loko a ri Apolosi, makwerhu, ndzi n'wi khongotele ngopfu leswaku a ta eka n'wina ni vamakwavo, kambe a nga pfumelanga ni switsongo ku ta sweswi; hambiswiritano, u ta ta siku a kumaka nkarhi.

¹³Hitekani, mi tiya eku pfumeleni, mi endlisa hi vununa, mi tinyika matimba;

¹⁴swilo hinkwaswo leswi mi swi endlaka, swi endleni hi rirhandzu.

¹⁵Ndza ha mi khongotela, vamakwerhu, hikuva ma swi tiva leswaku va yindlu ya Stefanasi, hi vona lava nga mativula ya Akaya, ni leswaku va tinyiketile swinene ku tirhela vakwetsimi.

¹⁶Yingiselani vanhu lavo tano, ni hinkwavo lava khomeke ntirho swin'we na hina lava tiyiselaka kona.

¹⁷Ndzi tsakile hi ku ta ka Stefanasi, na Fortunato, na Akayiko, hikuva va ndzi endlerile ematshan'weni ya n'wina, leswi mi tsandzekeke ku ndzi endlela swona.

¹⁸Hikuva va miyetile mbilu yanga ni timbilu ta n'wina. Xiximani vanhu lavo tano.

¹⁹Tikereke ta Asiya ta mi rungula. Akwila na Prisila, ni kereke leyi nga endlwini ya vona, va mi rungula ngopfu eHosini.

²⁰Vamakwavo hinkwavo va mi rungula. Rungulanani hi ku ntswontswana loku tengeke.

²¹Mina Pawulo, ndza mi rungula hi voko ra mina.

²²Kungakuloko munhu a ri kona la nga rhandziki Hosi Yesu, a a endliwe anathema! Maranatha! (Hosi ya ta!)

²³Tintswalo ta Hosi Yesu Kriste a ti ve na n'wina!

²⁴Rirhandzu ra mina ri na n'wina hinkwenu, eka Yesu Kriste. Amen!