Read tsonga 1 Vakorinto 5 Bible Online

1 Vakorinto 5 - tsonga bible

1 Vakorinto 5

¹Ku twele hinkwako leswaku vuoswi byi kona exikarhi ka n'wina, byi nga vuoswi lebyi nga vuriwiki exikarhi ka matiko, va te, un'wana u ni nsati wa tata wa yena.

²Kasi mi tikurisile! Kasi a mi rilanga, leswaku ku susiwa exikarhi ka n'wina loyi a endleke sweswo!

³Loko ndzi ri mina, hambi ndzi nga ri kona hi miri, kambe leswi ndzi nga kona exikarhi ka n'wina hi moya, ndzi avanyisile munhu la endleke mhaka leyo tano, kukotisa loko ngi ndzi ri kona.

⁴Hi vito ra Hosi ya hina, Yesu Kriste, hi ri karhi hi hlengeletene, n'wina ni moya wa mina, hi matimba ya Hosi ya hina Yesu Kriste,

⁵ndzi avanyisile leswaku munhu yeloyi a nyiketiwa Satana, leswaku ku onhaka nyama ya yena, moya wu ta hanyisiwa hi siku ra Hosi Yesu.

⁶A mi na mfanelo ya ku tidzunisa. Xana a mi swi tivi leswaku comelanyana xi kukumuxa mbila hinkwayo xana?

⁷Susani-ke, comela xa khale eka n'wina, mi ta va mbila leyintshwa, leswi mi nga riki na comela; hikuva Paseka ya hina, a nga Kriste, u tlhaveriwe hina.

⁸A hi endleni nkhuvo hakona, ku nga ri hi comela xa mona ni xo biha, kambe ku va hi xinkwa lexi nga riki na comela, lexo tenga ni xa ntiyiso.

⁹Ndzi mi tsalele e-epistoleni ya mina leswaku mi nga tshuki mi tolovelana ni swipombolo;

¹⁰a hileswaku mi avanele makumu ni swipombolo swa misava leyi, kumbe ni lava navelaka rifuwo, ni makhamba, ni lava gandzelaka swifaniso, hikuva loko ngi swi ri tano, a mi ta fanela ku huma emisaveni.

¹¹Kambe sweswi, ndzi mi tsalela leswaku mi nga tshuki mi tolovelana ni la tivulaka makwenu, kambe a ri muoswi, kumbe la navelaka rifuwo, ni loko a ri la gandzelaka swikwembu swahava, ni loko a ri mulumbeti, kumbe mupyopyi, kumbe khamba; mi nga tshuki mi dya ni lowo tano.

¹²Hikuva ndzi ni mhaka yihi ku avanyisa lava nga ehandle? Xana n'wina a mi va avanyisi ha yini lava nga endzeni?

¹³Loko va ri lava nga ehandle, hi xona Xikwembu lexi nga ta va avanyisa. “Susani-ke lowo biha exikarhi ka n'wina.”