Read tsonga 1 Vakorinto 7 Bible Online

1 Vakorinto 7 - tsonga bible

1 Vakorinto 7

¹Loko ti ri timhaka leti mi ndzi tsaleleke tona, ndzi nga ku: Swi lulamile loko munhu a nga khumbi wansati.

²Kambe, hikwalaho ka vuoswi, wanuna un'wana ni un'wana a a ve ni nsati wa yena, ni wansati un'wana ni un'wana a a ve ni nuna wa yena.

³Wanuna a a nyike nsati leswi faneleke, ni wansati a endlise sweswo eka nuna wa yena.

⁴Miri wa nsati a wu le ku fumeni ka yena, kambe wu le ku fumeni ka nuna; ni miri wanuna a wu le ku fumeni ka yena, kambe wu le ku fumeni ka nsati wa yena.

⁵Mi nga tshuki mi tsonana, loko ku nga ri hi ku pfumelelana, hi nkarhi wun'wana, loko mi rhandza ku titsona swakudya ni ku khongela, kutani ndzhaku, mi tlhela mi hlangana, Satana a nga ti tshuka a mi ringa hi ku navela ka n'wina loku mi hlulaka.

⁶Ndzi vula sweswo hi ku mi twela vusiwana, ku nga ri hi ku lerisa;

⁷hikuva ndzi nga rhandza leswaku vanhu hinkwavo va fana na mina; kambe munhu un'wana ni un'wana u ni ku nyikiwa ka yena loku ku n'wi lulameleke, loku ku humaka eka Xikwembu; un'wana hi mukhuva lowo karhi, un'wana hi mukhuva wun'wana.

⁸Loko ti ri tinghwendza, ni vavasati va tinoni, ndzi ri eka vona: Swi nga va swinene eka vona ku tshama kukotisa mina.

⁹Kambe loko va hluleka ku tiya, a va teke ni ku tekiwa hikuva loko ku ri ku teka hambi ku tekiwa ni ku tshwa, i swinene ku teka.

¹⁰Loko va ri lava tekaneke, ndza va lerisa, ndzi nga ri mina, kambe i Hosi, ndzi ri: Wansati a nga tshuki a tshika nuna wa yena.

¹¹Ni loko a n'wi tshikile, a a titshamele a nga tekiwi, kumbe a vuyelana ni nuna wa yena; na yena wanuna, a nga tshuki a tshika nsati wa yena.

¹²Kambe loko va ri van'wana, ndza va byela ndzi ri mina, yi nga ri Hosi, ndzi ri: Loko un'wana makwerhu a ri ni nsati la nga pfumeriki, a nga tshuki a n'wi tshika, loko wansati a rhandza ku tshama na yena;

¹³kambe wansati la nga ni nuna la nga pfumeriki, loko a pfumela ku tshama na yena, a nga tshuki a n'wi tshika.

¹⁴Hikuva nuna la nga pfumeriki u kwetsimisiwa hi nsati, ni nsati la nga pfumeriki u kwetsimisiwa hi nuna; loko swi nga ri tano vana va n'wina va ta va vana va thyaka, kasi sweswi, va kwetsimile.

¹⁵Kambe la nga pfumeriki, loko a tshika la pfumeleke, u fanele ku n'wi tshika; loko swi ri tano makwerhu wa wanuna, kumbe wa wansati, a nga ka a nga bohiwi. Kambe Xikwembu xi hi vitanele ku rhuleni.

¹⁶Hikuva wena wansati, u swi tiva ha yini leswaku u ta ponisa nuna wa wena xana? Na wena, wanuna, u swi tiva ha yini leswaku u ta ponisa nsati wa wena xana?

¹⁷Ntsena munhu un'wana ni un'wana a a hanye hilaha Hosi yi n'wi aveleke hakona, ni hilaha Xikwembu xi n'wi vitaneke hakona. Ndzi lerisa tikereke hinkwato xisweswo.

¹⁸Munhu loko a vitiwile a yimbile, a nga tshuki a tlhelela evukhuneni. Munhu loko a vitiwile a nga si yimba, a nga tshuki a yimba.

¹⁹Ku yimba a hi nchumu, ni vukhuna a hi nchumu, kambe mhaka i ku hlayisa milawu ya Xikwembu.

²⁰Munhu un'wana ni un'wana a a tshame eku averiweni loku ngi a a ri na kona hi nkarhi a vitiwaka.

²¹Xana u vitiwile u ri la fuyiweke? U nga tshuki u vilela hakona; kambe loko u nga tshunxiwa, u tihlawulela swona.

²²Hikuva la vitiweke hi Hosi a ri khumbi, i muntshunxiwa wa Hosi; na yena la vitiweke a nga ri khumbi, u fuyiwile hi Kriste.

²³Mi xaviwile hi nxavo lowo nonon'hwa; mi nga tshuki mi hundzuka makhumbi ya vanhu.

²⁴Vamakwerhu, munhu un'wana ni un'wana a a tshame emahlweni ka Xikwembu eku averiweni loku ngi a ri na kona hi nkarhi a vitiwaka.

²⁵Loko yi ri mhaka ya vanhwana, kona, a ndzi na nawu wa Hosi, ntsena ndzi vula mhaka hilaha ndzi nga munhu la tsetseleriweke hi Hosi leswaku ndzi tshembiwa.

²⁶Kutani sweswi loko ndzi ringanisa, ndzi ri: Swi nga va swinene eka munhu ku titshamela sweswo, hikwalaho ka makhombo ya nguva leyi.

²⁷Loko u tibohile eka wansati, u nga tshuki u lava ku tshunxeka. Loko u nga tibohanga eka wansati, u nga tshuki u lava nsati.

²⁸Kambe loko u teka, a ku dyohi; ni wanhwana loko a tekiwa, a nga dyohi; kambe lavo tano va ta va ni ku xaniseka enyameni, kutani mina ndzi mi twela vusiwana.

²⁹Leswi ndzi swi vulaka, vamakwerhu, hileswaku sweswi, kutani, nkarhi wu komile; lava nga ni vasati, va va kukota loko ngi va nga ri na vona,

³⁰lava rilaka va va kukota loko ngi va nga rili; lava tsakaka va va kukota loko ngi va nga tsakanga; ni lava xavaka va va kukota loko ngi va nga fuwanga nchumu;

³¹ni lava tipfunaka hi swa misava leyi, va va kukota loko va nga pfuniwi ha swona, hikuva maendlelo ya misava leyi, ma hela.

³²Ndzi rhandza leswaku mi nga vi na ku vilela. La nga tekangiki u xiya leswi nga swa Hosi hilaha a nga yi tsakisaka hakona;

³³kambe la tekeke u xiya swa misava leyi, hilaha a nga tsakisaka nsati wa yena hakona.

³⁴Nsati la tekiweke a nga fani ni wanhwana: La nga tekiwangiki u xiya swa Hosi, u ta kwetsima emirini ni le moyeni; kambe la tekiweke u xiya swa misava leyi, ni hilaha a nga tsakisaka nuna wa yena hakona.

³⁵Ndzi vurisa sweswo hi ku ringanisa leswinene eka n'wina, ku nga ri ku mi rhiya hi ntlhamu; kambe hileswaku mi endla hi ku xiya leswi lulameke, ni leswi mi bohelaka eka Hosi, mi nga hambukisiwi ha nchumu.

³⁶Kambe loko munhu a anakanya leswaku yi nga va mhaka ya tingana loko wanhwana wa yena a hundza swiluva swa vuntshwa bya yena a nga si tekiwa, kutani swi fanele leswaku a tekiwa; a nga endla hilaha a rhandzaka hakona; a nga dyohi, wanhwana u fanele ku tekiwa.

³⁷Kambe la tiyiselaka embilwini ya yena a nga byisiwi ha nchumu, kambe a tiendlela hi ku tirhandzela ka yena; loyi a kaneleke embilwini ya yena leswaku wanhwana wa yena a ta tshama eka yena, u endla swinene.

³⁸Kutani sweswi, la tekisaka n'wana wa yena u endla swinene, kambe la nga n'wi tekisiki u endla swinene ku tlurisisa.

³⁹Wansati u bohiwile eka nuna wa yena hi nawu, emikarhini hinkwayo ya ku hanya ka nuna wa yena; kambe loko nuna wa yena a file, u tshunxekile; a nga tekana ni loyi a n'wi rhandzaka, kambe a ku ve eHosini.

⁴⁰Hambiswiritano, hi nomu wa mina, ndzi ri: Loko a titshamela ntsena, a nga tsaka ku tlurisa. Kambe ndzi ringanisa leswaku na mina ndzi ni Moya wa Xikwembu.