Read tsonga 1 Vakorinto 9 Bible Online

1 Vakorinto 9 - tsonga bible

1 Vakorinto 9

¹Xana a ndzi muapostola-ke? Xana a ndzi muntshunxiwa-ke? Xana a ndzi yi vonangi Hosi ya hina, Yesu Kriste xana? A mi ntirho wa mina eHosini xana?

²Kambe, hambi ndzi nga ri muapostola eka van'wana eka n'wina, ndzi yena, hikuva hi n'wina mi nga mfungho wa vuapostola bya mina eHosini.

³Hi kona ku tihlamulela ka mina eka lava ndzi avanyisaka.

⁴Xana a swi hi fanelanga ku dya ni ku nwa-ke?

⁵Xana a hi lulamelanga ku heleketana ni makwerhu wa xisati la nga nsati wa mina, kukota vaapostola van'wana, ni vamakwavo va Hosi, na Kefasi xana?

⁶Kumbe hi mina na Barnaba ntsena hi nga riki na matimba ya ku tshika ku tirha-ke? I mani la yaka eku lweni hi mbuva ya yena?

⁷I mani la simekelaka vhinya, kutani a nga dyi mihandzu ya yona-ke? I mani la risaka ntlhambi, kutani a nga dyi ntswamba wa ntlhambi xana?

⁸Xana timhaka teto, ndzi ti vula hi mukhuva wa vanhu xana? Nawu a wu vurisi sweswo, na wona-ke?

⁹Hikuva ku tsariwile enawini wa Muxe leswaku: “U nga tshuki u siva nomu wa homu loko yi hula.” Xana mi ri: Xikwembu xi vurisa sweswo ku tsetselela tihomu xana?

¹⁰A ndzi ku: Timhaka teto, xi ti vula ngopfu hikwalaho ka hina; kunene hikwalaho ka hina ku tsariwile leswaku, la rimaka u fanele ku rima hi ku tshemba, ni la hulaka, a hula hi ku tshemba leswaku, na yena u ta kuma ku dya.

¹¹Loko hi mi byalela swa moya, xi nga va xilo lexikulu loko hi tshovela swa n'wina swa nyama xana?

¹²Kutani loko van'wana swi va lulamela ku endlisa sweswo eka n'wina, xana ngopfungopfu a hi hina xana? Kasi a hi endlanga hi mfanelo yoleyo; kambe hi yingisela hinkwaswo hi nga ti tshuka hi sivela Evhangeli ya Kriste ha nchumu.

¹³Xana a mi swi tivi leswaku lava tirhaka leswi kwetsimaka, va dya leswo kwetsima, ni leswaku lava tirhaka ealitarini, va dya swa alitari xana?

¹⁴Hikwalaho, Hosi yi lerisile leswaku lava vulaka Evhangeli, va ta hanya hi Evhangeli.

¹⁵Kambe, loko ndzi ri mina a ndzi tipfunanga hi xin'wana xa sweswo; kutani, hambi ndzi tsala timhaka teto, a hileswaku vanhu va ta ndzi endlisa sweswo; hikuva, loko swi ri leswaku munhu a endla ku dzunisa kuloku ka mina swahava, ndzi nga tihlawulela ku fa.

¹⁶Hikuva hambi ndzi vula Evhangeli, kwalaho a ndzi na lexi ndzi nga tidzunisaka ha xona, hikuva nawu wu kona lowu ndzi boheke; kutani ku ni khombo eka mina loko ndzi nga vuri Evhangeli!

¹⁷Loko ndzi endlisa sweswo hi ku swi rhandza, ndzi kuma hakelo kona; kambe loko ndzi nga endli hi ku swi rhandza, ntirho, wona, wu vekiwile ehenhla ka mina.

¹⁸Xana hakelo ya mina hi yihi-ke? Hi leyi: Loko ndzi vikela vanhu Evhangeli, ndzi ta va vikela hi mukhuva lowu nga tikiki, leswaku ndzi nga ti tshuka ndzi tipfuna hi mfanelo ya mina, leyi ndzi nga na yona eEvhangelini.

¹⁹Hikuva hambi ndzi nga fuyiwanga hi munhu, ndzi tiendle nandza wa hinkwavo leswaku ndzi ta nghenisa lavo tala.

²⁰Eka Vayuda, ndzi tiendle Muyuda, leswaku ndzi nghenisa Vayuda; eka lava nga enawini, ndzi tiendle la nga enawini, hambi ndzi nga ri enawini, ndzi ta nghenisa lava nga enawini;

²¹eka lava nga riki enawini, ndzi tiendle la nga riki enawini, leswaku ndzi ta nghenisa lava nga riki enawini, (hambi ndzi nga ri loyi a nga riki na nawu eka Xikwembu), kasi ndzi le nawini wa Kriste.

²²Eka lava tsaneke, ndzi tiendle la tsaneke leswaku ndzi nghenisa lava tsaneke; ndzi tiendle hinkwaswo eka hinkwavo, leswaku ndzi ponisa van'wana hi leswo hinkwaswo.

²³Kambe ndzi endlisa sweswo hikwalaho ka Evhangeli, leswaku, na mina, ndzi va ni ku averiwa kona.

²⁴Xana a mi swi tivi leswaku loko va ri lava tsutsumaka eku siyisaneni, va tsutsuma hinkwavo, kambe ku amukela un'we hakelo? Tsutsumani hakona leswaku mi ta yi kuma.

²⁵Kambe un'wana ni un'wana la nga ni mpika ya ku kamana, u titsona hinkwaswo; kasi vona va endlisa sweswo leswaku va nyikiwa harhi leyi bolaka; kambe hina hi endlela leyi nga boriki.

²⁶Hikwalaho, na mina, loko ndzi tsutsuma, a ndzi tsutsumi kukota loko ngi ndzi nga swi tivi, ni loko ndzi lwa, a ndzi lwi kukota loko ngi ndzi ba moya ntsena;

²⁷kambe ndzi laya miri wa mina, ndzi wu endla khumbi, ndzi nga ti tshuka mina ndzi dyondziseke van'wana ndzi kumiwa ndzi nga lulamelanga ku amukeriwa.