Read tsonga 2 Vakorinto 10 Bible Online

2 Vakorinto 10 - tsonga bible

2 Vakorinto 10

¹Loko ndzi ri mina, Pawulo, ndza mi khongotela hi vunene ni tintswalo ta Kriste, ndzi nga yena yeloyi va nge ndza titsongahata loko ndzi ri exikarhi ka n'wina; kambe loko ndzi nga ri kona, ndzi mi endlela hi matimba;

²ndza mi kombela leswaku mi nga ndzi sindzisi loko ndzi fike eka n'wina, ku mi endla hi matimba lawa ndzi nga anakanya ku endla eka van'wana lava vulaka leswaku hi famba hi nyama.

³Hikuva hambi hi famba hi nyama, a hi lwi hi mukhuva wa nyama.

⁴Hikuva matlhari ya hina a hi ya nyama, kambe ma ni matimba ha Xikwembu ku wisa makhokholo,

⁵ni ku hlanhla makungu, ni rirhangu hinkwaro leri tlakukeke, leri sivelaka ku tiva ka Xikwembu, ni ku byisa mianakanyo hinkwayo eku yingiseni ka Kriste;

⁶kutani hi tilunghisele ku tshinya ku tiarisa hinkwako, siku ku yingisa ka n'wina ku nga ta hetiseka.

⁷Xana mi languta nghohe xana? Kungakuloko un'wana eka n'wina a tshemba leswaku i wa Kriste, a a anakanye kambe leswaku, kukota leswi yena a nga wa Kriste, na hina hi va Kriste.

⁸Kasi loko ndzi nga tidzunisa ku tlurisa hi matimba walawo hi ma nyikiweke hi Hosi ku mi akisa, ku nga ri ku mi hangalasa, ndzi nga ka ndzi nga khomiwi hi tingani;

⁹swi nga ti kotisa leswo ngi ndzi rhandza ku mi chavisa hi tiepistola ta mina.

¹⁰Hikuva van'wana va ri: “Tiepistola ta yena ta tika, ti ni matimba; kambe loko a humelela hi miri, va ri: I munhu la tsaneke, ni marito ya yena ma soleka.”

¹¹La vulaka sweswo a nga anakanya leswaku, lexi hi nga xona hi marito etiepistoleni ta hina, loko hi nga ri kona, ha ha ri xona emitirhweni, siku hi nga kona.

¹²Hikuva hi chava ku tiringanisa ni ku hlambanyisa ni van'wana lava tisaselaka; kasi vona loko va tipima ha voxe, ni loko va tiringanisa ha voxe, a va endli hi ku anakanya.

¹³Loko hi ri hina, hi nga ka hi nga tidzunisi ku tlurisa mpimo, kambe hi ta endlisa sweswo hi mpimo wa ku averiwa loku Xikwembu xi hi pambuleleke kona, hilaha xi hi fikiseke ni le ka n'wina.

¹⁴Hikuva a hi tihumelerisi ku tlurisa, kukota leswo ngi a hi fikanga eka n'wina, kasi hi fikile eka n'wina hi Evhangeli ya Kriste.

¹⁵A hi tidzunisi hi leti nga hi ringaniki, yi nga mitirho ya van'wana, kambe hi tshembile leswaku ku pfumela ka n'wina, loko ku ri karhi ku kula, hi ta hundzela emahlweni ngopfu eku averiweni loku hi lerisiweke,

¹⁶hilaha hi nyikiweke ku vula Evhangeli eka vamatiko lava nga emahlweni ka n'wina, hi nga ti tshuka hi tidzunisa hi leswi nga endliwa eku averiweni ka van'wana.

¹⁷Kambe la tidzunisaka, a a tidzunisele eHosini.

¹⁸Hikuva la dzunisiwaka, a hi la tiyimelaka, kambe hi loyi Hosi yi n'wi yimelaka.