Read tsonga Vaefesa 3 Bible Online

Vaefesa 3 - tsonga bible

Vaefesa 3

¹Hikwalaho-ke, mina Pawulo, ndzi nga mubohiwa wa Yesu Kriste hikwalaho ka n'wina vahedeni.

²Loko ngi mi yingisile ku averiwa ka tintswalo ta Xikwembu leti ndzi nga nyikeriwa n'wina,

³hi laha ndzi tivisiweke xihundla lexi hi ku hlavuteriwa, kukotisa lexi ndza ha ku mi tsalelaka hi marito ma nga ri mangani;

⁴hilaha, loko mi hlaya, mi nga twa ku twisisa loku ndzi nga na kona eka xihundla xa Kriste.

⁵Xihundla xolexo a xi kombisiwanga vana va vanhu etinxakeni ti n'wanyana hilaha xi hlavuteriweke hakona emikarhini leyi, hi Moya, eka vaapostola va yena lavo kwetsima ni ka vaprofeta,

⁶xi nga leswaku vahedeni i vadyandzhaka swin'we ni Vaisraele va miri wu ri wun'we va ni ku averiwa kun'we eku tshembiseni ka Yesu Kriste eEvhangelini,

⁷yoleyo ndzi endliweke mutirheri wa yona hi ku nyika ka tintswalo ta Xikwembu leti ndzi ti nyikiweke hi mitirho ya matimba ya xona;

⁸mina yeloyi, ndzi nga lontsongo eka vakwetsimi hinkwavo; ndzi nyikiwile tintswalo leti ta ku tivisa vamatiko ku fuwa loku nga ringanisiwiki eka Kriste,

⁹ni ku vonakarisa emahlweni ka hinkwavo, ku averiwa ka xihundla lexi ngi xi fihliwile, ka hari mpfhuka wo sungula, eka Xikwembu lexi nga endla hinkwaswo,

¹⁰leswaku vutlhari bya Xikwembu lebyi mikhuva ya byona yi nga tala hilaha ku nga hlayiwiki, byi kombisiwa sweswi hi Kereke, eka vakulukumba ni ka vafumi va le matilweni,

¹¹hi makungu lawa xi ma endleke ka hari emikarhini ya ku sungula, xi ma hetisela ha Yesu Kriste, Hosi ya hina,

¹²yeloyi hi pfumeleriweke ha yena ku tshinelela Xikwembu hi ku tshemba, hi ku pfumela eka yena.

¹³Hikwalaho ndza kombela, ndzi ri: Ku nga herisiwi timbilu hi nhlomulo lowu nga ndzi humelela hikwalaho ka n'wina, hikuva i ku dzunisiwa ka n'wina.

¹⁴Hikwalaho ndzi khinsamaka hi matsolo emahlweni ka Tatana,

¹⁵loyi rixaka rin'wana ni rin'wana leri nga etilweni ni le misaveni ri vitaniwaka eka yena,

¹⁶ndzi kombela leswaku a mi nyika hi rifuwo ra ku kwetsima ka yena, ku tiyisiwa hi matimba emunhwini la nga xikarhi, hi Moya wa yena,

¹⁷ni leswaku Kriste a aka etimbilwini ta n'wina hi ku pfumela,

¹⁸ni leswaku, loko mi simekiwile erirhandzwini, ni loko mi tshamile emasungulweni ya rona, mi va lava twisisaka swin'we ni vakwetsimi hinkwavo, ku anama ka rona ni ku leha ka rona, ni ku enta ka rona, ni ku tlakuka ka rona,

¹⁹mi ta tiva rirhandzu ra Kriste leri tlurisaka ku tiva hinkwako, mi va mi tatiwa hi ku tala hinkwako ka Xikwembu.

²⁰Kambe eka yena, loyi a nga endlaka ku tlurisa ngopfungopfu hinkwaswo leswi hi nga swi kombelaka, ni leswi hi nga swi ehleketaka hi matimba lama tirhaka eka hina,

²¹eka yena a ku ve ku kwetsima eKerekeni leyi nga eka Yesu Kriste, etinxakeni hinkwato hi mikarhi ni mikarhi. Amen!