Read tsonga Vaefesa 6 Bible Online

Vaefesa 6 - tsonga bible

Vaefesa 6

¹Vana, yingisani vatswari va n'wina eHosini, hikuva swi lulamile sweswo.

²“U va ni xichavo eka tata wa wena,” ni mana wa wena (hi wona nawu lowo rhanga lowu nga ni ku tshembisa),

³“leswaku u va ni ku kateka, u va u hanya ngopfu emisaveni leyi.”

⁴Na n'wina vatatana, mi nga tshuki mi dyisa vana va n'wina mbitsi, kambe va kuriseni eku layeni ni le ku dyondziseni ka Hosi.

⁵N'wina malandza, yingisani vini va n'wina enyameni hi xichavo, ni ku rhurhumela, timbilu ta n'wina ti basile, kukotisa loko mi yingisa Kriste,

⁶mi nga va tirheli ntsena loko va mi langutile, leswo ngi mi rhandza ku tsakisa vanhu, kambe mi va tanihi malandza ya Kriste, mi endla ku rhandza ka Xikwembu hi mbilu,

⁷mi va tirhela hi rirhandzu, kukotisa Hosi, va nga ri vanhu,

⁸hi ku tiva leswaku un'wana ni un'wana, hambi a ri la fuyiweke, hambi a ri la nga fuyiwangiki, u ta nyikiwa hi Hosi hi mpimo wa leswo saseka leswi a swi endleke.

⁹Na n'wina vini, endlisani sweswo eka vona, mi tshika ku va phika, mi ri karhi mi tiva leswaku Hosi ya vona ni ya n'wina yi kona ematilweni, ni leswaku ku ya hi nghohe ku hava eka yona.

¹⁰Loko swi ri tano, tiyani eHosini ni le matimbeni ya yona lama nga tsandziwiki ha nchumu.

¹¹Hakarhani matlhari hinkwawo ya Xikwembu, leswaku mi ta tiva ku hlula miringo ya Diyavulosi.

¹²Hikuva eku lweni ka hina, a hi lwi na nyama na ngati, kambe hi lwa ni vafumi, ni leswa matimba, ni tihosi hinkwato ta munyama, ni mimoya leyo biha ya swivandla swa le henhla.

¹³Hikwalaho-ke hlomani matlhari hinkwawo ya Xikwembu, mi ta tiva ku tiya hi siku ra khombo, ni ku yima mi hlurile hinkwaswo.

¹⁴Tiyani hikwalaho, mi ri karhi mi titsimbile swifungha hi vamba ra ntiyiso, mi ambele exifuveni xisirhelelo xa leswo lulama;

¹⁵emilengeni ya n'wina mi havaxela ku hiseka loku nyikiwaka hi Evhangeli ya ku rhula;

¹⁶ehenhla ka leswo hinkwaswo, mi tamela xitlhangu xa vupfumeri, lexi mi nga ta tiva ku timela ha xona miseve hinkwayo leyi pfurhaka ya nyavuntswaka.

¹⁷Rhwalani xihuku xa ku hlayiseka, mi va mi tamela fumu ra Moya, ri nga Rito ra Xikwembu;

¹⁸mi khongela hi Moya hi mikarhi hi mikhongelo hinkwayo ni ku chivirikela kona, mi hanyanya kona hi ku tiyisela hinkwako, mi ri karhi mi khongelela vakwetsimi hinkwavo.

¹⁹Na mina, mi ndzi khongelela, leswaku ndzi nyikiwa ku vulavula erivaleni, ndzi ta tiva ku hlavutela vanhu ndzi nga chavi nchumu xihundla xa Evhangeli,

²⁰leyi ndzi nga ntsumi ya yona, hambi ndzi bohiwile hi timpecana, leswaku ndzi vulavula hi matimba timhaka ta yona, hilaha ndzi fanelaka ku ti vula hakona.

²¹Kambe, leswaku na n'wina mi tiva ku hanya ka mina, ni leswi ndzi swi endlaka, Tixiko, makwerhu la rhandziwaka, ni nandza la tshembekeke wa Hosi, u ta mi tivisa hinkwaswo.

²²Hikwalaho ndzi n'wi rhumeke ka n'wina, a ta mi tivisa ta ku hanya ka hina, a ta chavelela ni timbilu ta n'wina.

²³Ku rhula ni rirhandzu, swin'we ni ku pfumela, a swi ve ni vamakwerhu, swi huma eka Xikwembu Tatana, ni ka Hosi Yesu Kriste.

²⁴Tintswalo a ti ve ni hinkwavo lava rhandzaka Hosi ya hina, Yesu Kriste, hi rirhandzu leri nga onhakiki.